1 Kronika 21:1-30
21 Kenca si e, ilawan Setan* me Israel janah banna tersuruh ukur Daud gelah kirana* jumlah kalak Israel.+
2 Nina Daud man Joap+ bage pe man peminpin-peminpin si deban, “To lawes kam, kiralah jumlah kalak Israel mulai arah Berseba seh ku Dan,+ jenari laporken man bangku gelah kuteh asa kai buena.”
3 Tapi nina Joap, “Mbera-mbera jumlah bangsa e tambah 100 kali lipat iban Jahwe. O Tuanku Raja, la kin budakndu nge kalak e kerina? Tapi engkai maka bage atendu banndu, Tuan? Ula min banndu bangsa Israel jadi ersalah.”
4 Amin pe bage, kata-kata raja nge si tetap erdalan, labo kata-kata Joap. Emaka lawes Joap ku kerina daerah Israel, jenari mulih ia ku Jerusalem.+
5 Laporken Joap man Daud jumlah kalak si enggo kirana. Arah kerina kalak Israel lit 1.100.000 kalak si make pedang, janah arah kerina kalak Juda lit 470.000 kalak si make pedang.+
6 Tapi la kira Joap kalak Lewi ras kalak Benyamin,+ sebap segat ate Joap man perentah raja e.+
7 Segat kel ate Dibata si benar ngidah si e, emaka hukumNa kalak Israel.
8 Emaka nina Daud man Dibata si benar, “Enggo kulakoken dosa+ si mbelin alu ngelakoken si enda. Gundari, ampuni min dosa budakndu enda,+ sebap enggo motu kel perbahanenku.”+
9 Gat me si dat pengenehenen* arah Dibata nari guna ipeseh man Daud. Ngerana Jahwe man Gat,+ nina,
10 “Laweslah janah katakenlah man Daud, ‘Bagenda nina Jahwe, “Kubereken man bandu telu pilihen. Pilihlah si apai atendu si arus Kulakoken man bandu.”’”
11 Emaka idahi Gat me Daud janah nina, “Bagenda nina Jahwe, ‘Pilihlah:
12 Nggit nge kam terjadi kelihen bas negrindu enda telu tahun dekahna?+ Ntah nggit nge kam iserang janah italuken musuhndu alu pedang telu bulan dekahna?+ Ntah nggit nge kam negrindu iserang alu pedang Jahwe telu wari dekahna?+ Sedekah telu wari e, reh pagi malekat Jahwe erban kerina kalak bas negri Israel kena wabah penakit.’+ Ukuri manjar-anjar jawapen kai si arus kupeseh man Dibata si enggo nuruh aku ndahi kam.”
13 Nina Daud man Gat, “Enda erban latih kel ukurku. Mindo kel aku, pediatlah aku ndabuh ku tan Jahwe sebap mbelin kel perkuah ateNa.+ Tapi ula pediat aku ndabuh ku tan manusia.”+
14 Emaka ban Jahwe kalak Israel kena wabah penakit.+ Lit 70.000 kalak Israel mate perban penakit e.+
15 Suruh Dibata si benar ka malekat ku Jerusalem guna engkernepkenca. Tapi sanga idah Jahwe lakoken malekat e atena perentahNa, ceda kel ukurNa perban bencana penakit e,+ emaka nina man malekat si engkernepken e, “Enggo bias!+ Penusur tanndu.” Malekat Jahwe e sangana tedis i deher ingan ngerik* Ornan+ kalak Jebusi.+
16 Sanga inen Daud ku das, idahna tedis malekat Jahwe i antara doni ras langit, janah ijemak malekat e pedang+ si pengalana ku Jerusalem. Emaka mis sujud Daud ras peminpin-peminpin si deban si sangana make kain guni.+
17 Nina Daud man Dibata si benar, “La kin aku si nuruhsa gelah kalak e ikira? Aku kap si erdosa janah aku kap si ersalah.+ Tapi biri-biri enda, kai kin salahna? O Jahwe Dibataku, man bangku sajalah ras man keluarga bapakku sajalah ban tanNdu. Ula ban wabah penakit e engkenai umatNdu.”+
18 Jenari, isuruh malekat Jahwe me Gat+ ngataken man Daud gelah lawes ia erban ingan nutung* persembahen man Jahwe i bas ingan ngerik Ornan kalak Jebusi e.+
19 Emaka lawes Daud kenca begina kata-kata Gat e, bagi si perentahken Jahwe arah Nabi Gat e.
20 Paksa si e, Ornan sangana ngerik gandum. Tulihkenna ku pudi janah idahna malekat e, emaka cebuni empatna anakna si dilaki si lit ras ia.
21 Sanga reh Daud ndahi Ornan, idah Ornan me Daud janah mis ia ndarat arah ingan ngerik e, jenari sujud ia man Daud.
22 Nina Daud man Ornan, “Dayakenlah ingan ngerik enda man bangku, gelah banci kuban i jenda ingan nutung persembahen man Jahwe. Banlah ergana bagi si arusna janah dayakenlah e man bangku, gelah ngadi wabah penakit si engkenai bangsata e.”+
23 Tapi nina Ornan man Daud, “O Tuanku Raja, buatndu saja e jadi jangndu. Lakokenlah kai pe si mehuli akapndu. Enda lembu-lembu man persembahen tutungen, enda papan ingan ngerik+ man rantingna, janah enda gandum guna jadi persembahen biji-bijin.* Kerina enda kubereken man bandu.”
24 Tapi nina Raja Daud man Ornan, “La banci bage, arus kutukur e janah banlah ergana bagi si arusna, sebap la banci kubuat jangndu e janah kubereken man Jahwe. Labo banci kupersembahken korban tutungen adi la kin lit pengorbanen arah aku nari.”+
25 Emaka galari Daud man Ornan kira-kira 6,8 kilo* emas guna nukur ingan e.
26 Iban Daud i je ingan nutung persembahen+ man Jahwe, jenari persembahkenna i je korban tutungen bage pe korban persadan. Erlebuh ia man Jahwe, kenca si e jawapNa ia alu mpenusur api+ arah langit nari ku batar-batar persembahen tutungen.
27 Suruh Jahwe gelah tama malekat e+ pedangna mulihken ku inganna.
28 Perban idah Daud maka enggo jawap Jahwe ia bas ingan ngerik Ornan kalak Jebusi e, emaka terus persembahkenna korban i je.
29 Paksa si e, kemah ingan ersembah man Jahwe si iban Musa i taneh mesawang* ras ingan nutung persembahen tutungen lit i bas ingan si meganjang i Gibeon.+
30 Tapi Daud la lawes ku je guna mindo petunjuk Dibata, sebap mbiar ia man pedang malekat Jahwe.
Cataten i teruh
^ Ntah “sensusna.”
^ Ntah banci saja “ilawan si ngelawan.”
^ Eme kerna kai pe si cidahken Dibata ku bas pikiren sekalak jelma.
^ Taneh si mbelang si jarang iingani.
