1 Kronika 22:1-19
22 Kenca si e nina Daud, “Enda rumah Jahwe Dibata si benar, janah enda ingan nutung* persembahen bangsa Israel guna mpersembahken persembahen tutungen.”+
2 Perentahken Daud gelah kerina kalak asing+ si lit i negri Israel ipepulung, janah suruhna kalak e jadi sierdahin guna motong ras mbentuk batu-batu si ipake guna mbangun rumah Dibata si benar.+
3 Sikapken Daud melala besi guna erban paku-paku gerbang ras alat guna njepit. Sikapken Daud ka melala kel tembaga seh asa lanai tertimbang.+
4 Bage ka pe kayu aras+ si lanai tanggung buena, sebap seh kel lalana kayu aras si ibaba kalak Sidon+ ras kalak Tirus+ man Daud.
5 Nina Daud, “Rumah si nandangi ibangun Salomo man Jahwe arus mehaga kel janah mejile,+ gelah rumah e bage pe kerna jilena+ terkenal ku kerina negri.+ Tapi anakku Salomo nguda denga janah la lit pengalamenna.+ Emaka kubanlah persikapen man bana.” Jadi ope lenga Daud mate, melala kel sikapkenna bahan bangunen.
6 Emaka lebuh Daud me Salomo anakna janah perentahken Daud gelah bangunna rumah man Jahwe Dibata Israel.
7 Nina Daud man Salomo, “Situhuna sura-suraku, kubangun min sada rumah man gelar Jahwe Dibataku.+
8 Tapi nina Jahwe man bangku, ‘Enggo mbue kel dareh si amburkenndu janah rusur kam erperang. Labo pagi kam si mbangun rumah man gelarKu,+ sebap enggo mbue kel dareh si amburkenndu ku taneh i lebe-lebeKu.
9 Lit pagi anakndu+ si ngenanami kedamen, janah Kuban pagi ia bebas arah kerina musuh si lit i sekelilingna.+ Gelarna pagi eme Salomo*+ janah Kuban pagi dame ras aman bas masa pemerentahenna.+
10 Ia pagi si mbangun rumah man gelarKu.+ Ia pagi jadi anakKu, janah Aku pagi jadi bapakna.+ Kuban pagi tahta kerajanna i bas Israel ertahan seh rasa lalap.’+
11 “Emaka Nakku, mbera-mbera Jahwe lit ras kam. Mbera-mbera berhasil kam mbangun rumah Jahwe Dibatandu, bali bagi si katakenNa kerna kam.+
12 Sanga ban Jahwe pagi kam erkuasa i bas Israel, mbera-mbera berekenNa man bandu kepentaren, janah banNa kam erpengangka,+ gelah banci dalankenndu undang-undang Jahwe Dibatandu.+
13 Adi tutus atendu ngikutken undang-undang+ bage pe peraturen si bereken Jahwe man bangsa Israel arah Musa,+ pasti kam berhasil. Perpanglah janah megegehlah. Ula mbiar ntah pe gentar.+
14 Enggo kupekeri kel gegehku guna rumah Jahwe. Enggo kusikapken 3.420 ton* emas, 34.200 ton* pirak, bage pe seh kel lalana tembaga ras besi+ seh asa lanai tertimbang. Enggo kusikapken ka melala kayu ras batu.+ Tapi, arus denga nge pagi tambahindu.
15 Enterem kap sierdahinndu. Lit si jadi tukang motong batu, tukang mbentuk batu,+ tukang kayu, bage pe tukang-tukang si ahli si debanna.+
16 Enggo isikapken emas, pirak, tembaga, ras besi si lanai tanggung buena.+ Emaka enggo banci mulaindu erdahin, mbera-mbera Jahwe lit ras kam.”+
17 Emaka suruh Daud gelah kerina pejabat Israel nampati Salomo anakna, nina,
18 “La kin Jahwe Dibata kena lit ras kena? La kin enggo bebaskenNa kena arah kerina musuh si lit i sekeliling kena? Enggo serahkenNa kerina penduduk negri e man bangku, janah negri enda enggo kuasai Jahwe bage pe umatNa.
19 Emaka alu bulat ukur daramilah Jahwe Dibata kena+ asa ngasup kena. Janah bangunlah ingan si badia guna Jahwe Dibata si benar,+ gelah Peti Perjanjin* Jahwe bage pe peralaten si badia Dibata si benar,+ banci ibaba ku rumah si ibangun guna gelar Jahwe.”+
Cataten i teruh
^ Arah bahasa Heber si ertina “Dame.”
^ As. “1.000.000 talenta.”
^ Ntah “Peti Perpadanen.”
