1 Kronika 23:1-32
23 Sanga Daud enggo metua janah nandangi mate, banna anakna Salomo jadi raja Israel.+
2 Jenari pepulungna kerina pejabat Israel, imam-imam,+ bage pe kalak Lewi.+
3 Tiap kalak Lewi si umurna 30 tahun bage pe si 30 tahun ku datas ikira+ sada per sada, janah lit 38.000 kalak teremna.
4 Arah kalak e ndai kerina, lit 24.000 kalak si ertugas ngawasi dahin i rumah Jahwe, lit 6.000 kalak si jadi pegawai ras hakim,+
5 lit 4.000 kalak si jadi penjaga gerbang,+ bage pe lit 4.000 kalak si muji+ Jahwe alu alat-alat musik. Alat-alat musik e iban Daud guna muji Dibata.
6 Kenca si e, aturken Daud kalak e i bas piga-piga kelompok+ menurut anak Lewi si dilaki eme Gerson, Kohat, ras Merari.+
7 Arah keturunen Gerson eme Ladan ras Simei.
8 Lit telu anak Ladan si dilaki eme Jehiel, Setam, ras Joel.+ Jehiel me si jadi peminpinna.
9 Lit telu anak Simei si dilaki eme Selomit, Hasiel, ras Haran. Kalak e ndai me si jadi peminpin keluarga bapakna. Bapak kalak e eme Ladan.
10 Anak Simei si dilaki eme Jahat, Sina,* Jeus, ras Beria. Kalak e empatna anak Simei.
11 Jahat si jadi peminpin janah Zizah anak nomor dua. Tapi perban la enterem anak Jeus ras Beria si dilaki, kalak e ianggap jadi sada keluarga i bas keluarga bapakna, janah ibereken tugas si seri man kalak e.
12 Lit empat anak Kohat eme Amram, Ishar,+ Hebron, ras Ussiel.+
13 Anak Amram si dilaki eme Harun+ ras Musa.+ Tapi Harun ras anak-anakna si dilaki me si ipisahken+ guna mpebadia Ingan Sibadiana, mpersembahken korban i lebe-lebe Jahwe, ngelayani Ia, bage pe masu-masu kalak alu gelar Dibata.+ Enda me dahin si terus lakoken kalak e.
14 Musa eme pelayan Dibata si benar. Ia ras anak-anakna si dilaki termasuk i bas suku Lewi.
15 Anak Musa si dilaki eme Gersom+ ras Elieser.+
16 Arah keturunen Gersom, si jadi peminpinna eme Sebuel.+
17 Arah keturunen Elieser, si jadi peminpinna eme Rehabia.+ Rehabia ngenca anak Elieser. Tapi enterem kel anak Rehabia si dilaki.
18 Arah keturunen Ishar,+ si jadi peminpinna eme Selomit.+
19 Lit piga-piga anak Hebron si dilaki. Jeria me si jadi peminpinna. Amaria anak nomor dua, Jahasiel nomor telu, janah Jekameam+ si nomor empat.
20 Anak Usiel si dilaki+ eme Miha ras Isiah. Miha me si jadi peminpinna, janah Isiah anak nomor dua.
21 Anak Merari si dilaki eme Mahli ras Musi.+ Anak Mahli si dilaki eme Eleasar ras Kis.
22 Mate me Eleasar, janah la lit anakna dilaki, diberu ngenca anakna. Emaka anak-anakna si diberu e erjabu ras turangna eme anak-anak Kis.
23 Lit telu anak Musi si dilaki eme Mahli, Eder, ras Jeremot.
24 Gelar kalak e ndai me si lit i bas keturunen Lewi menurut keluarga bapak kalak e bage pe menurut peminpin keluarga bapakna. Kalak e si umurna 20 tahun bage pe si 20 tahun ku datas ngelayani i bas rumah Jahwe.
25 Nina Daud, “Jahwe Dibata Israel enggo mereken kedamen man umatNa,+ janah tading Ia i Jerusalem seh rasa lalap.+
26 Kalak Lewi pe lanai perlu maba kemah ingan ersembah ntah alat-alat kai pe si ipake guna ngelayani.”+
27 Bagi perentah Daud si perpudi, ikira me kalak Lewi si umurna 20 tahun bage pe si 20 tahun ku datas.
28 Kalak e itugasken nampati anak-anak Harun si dilaki+ si ngelayani bas rumah Jahwe, ngawasi halamen-halamen+ ras ruangen-ruangen guna man, mpebadia kai pe si badia, janah ngelakoken kai pe si iperluken i bas ngelayani i rumah Dibata si benar.
29 Sampati kalak e ka nikapken roti persembahen,*+ tepung halus guna persembahen pangan,* roti si menipes si la itama ragi,+ roti si iban bas belanga si rata, tepung si iaduk,+ janah nentuken uga buena ras asa galangna.
30 Selain si e, tiap erpagi-pagi+ ras karaben dahin kalak e ngataken bujur ras muji Jahwe.+
31 Tiap ipersembahken korban tutungen man Jahwe i bas wari Sabat,+ bas bulan mbaru,+ bage pe i bas musim perayan,+ ikut kalak e nampatisa menurut kai si enggo itetapken bas undang-undang. Si e lakoken kalak e alu ratur i lebe-lebe Jahwe.
32 Kalak e pe itugasken ka njaga kemah perjumpan ras ingan si badia, bage pe nampati senina-seninana eme anak Harun guna ngelayani i rumah Jahwe.
