1 Kronika 28:1-21
28 Kenca si e, pepulung Daud kerina pejabat Israel ku Jerusalem, eme peminpin-peminpin suku, peminpin kelompok-kelompok+ si ngelayani raja, peminpin si ngawasi seribu kalak ras peminpin si ngawasi seratus kalak,+ peminpin si ngawasi kerina erta raja, si njaga asuh-asuhen raja,+ si ngurus anak-anak raja,+ bage pe kerina pegawai istana ras kerina kalak si megegeh ras si banci iandalken.+
2 Tedis Raja Daud janah nina,
“O senina-seninaku ras bangsaku, begikenlah aku. Ersura-sura aku mbangun rumah si jadi ingan Peti Perjanjin* Jahwe, bage pe si jadi ingan nahe Dibatata.+ Enggo kuban persikapen guna mbangunsa.+
3 Tapi nina Dibata si benar man bangku, ‘Labo pagi kam si mbangun rumah man gelarKu,+ sebap kam sekalak prajurit janah enggo melala bunuhndu kalak.’*+
4 Amin pe bage, arah kerina keluarga bapakku, aku si ipilih Jahwe Dibata Israel jadi raja Israel seh rasa lalap.+ IpilihNa Juda jadi peminpin.+ Arah kerina keturunen Juda, pilihNa keluarga bapakku.+ Arah kerina anak bapakku si dilaki, aku si pilihNa jadi raja man kerina kalak Israel.+
5 Enggo enterem ibereken Jahwe man bangku anak dilaki.+ Arah kerina anakku e, pilihNa Salomo+ guna kundul bas tahta kerajan Jahwe guna merentah Israel.+
6 “Nina man bangku, ‘Kalak si mbangun rumahKu ras halamenna eme Salomo, sebap enggo Kupilih ia jadi anakKu janah Aku jadi bapakna.+
7 Adi tutus atena ndalanken perentahKu ras undang-undangKu+ bagi si enggo dalankenna gundari, Kuban pagi kerajanna paguh seh rasa lalap.’+
8 Emaka kukataken i lebe-lebe kerina kalak Israel, i lebe-lebe umat Jahwe, bage pe i lebe-lebe Dibata: Angkai janah patuhi kena lah perentah Jahwe Dibata kena, alu bage banci aloken kena negri si mejile+ janah warisken kena man keturunen kena seh rasa lalap.
9 “Janah kam o Anakku Salomo, arus tandaindu Dibata si isembah bapakndu. Meriah janah bulat min ukurndu+ i bas ngelayani Ia, sebap Jahwe mereksa kerina pusuh kalak+ janah itehNa kerina sura-sura ras kai si lit bas ukurna.+ Adi daramindu Ia, pasti pediatNa kam njumpai Ia,+ tapi adi tadingkenndu Ia, pasti tulakNa pagi kam seh rasa lalap.+
10 O Anakku, enggo pilih Jahwe kam guna mbangun rumah si jadi ingan si badia. Emaka arus kam perpang janah lakokenlah dahinndu.”
11 Kenca si e, bereken Daud man anakna Salomo rancangen+ guna mbangun teras+ bage pe ruangen si debanna, termasuk gudang-gudang, ruangen-ruangen si lit bas teruh atap, ruangen si arah bas, bage pe ruangen ingan* pendamen.+
12 Berekenna ka man bana rancangen kerna kerina si enggo datna arah kesah si badia, eme guna mbangun halamen+ rumah Jahwe, kerina ruangen guna ingan man bage pe si lit i sekelilingna, ingan nimpan erta bas rumah Dibata si benar, bage pe ingan nimpan kai pe si ipebadiaken.+
13 Bereken Daud ka petunjuk kerna kelompok imam-imam+ ras kalak Lewi, kerna kerina tugas pelayanen i bas rumah Jahwe, bage pe kerna kerina alat-alat si ipake guna ngelayani bas rumah Jahwe.
14 Selain si e, bereken Daud ka petunjuk kerna asa kai buena emas ras pirak si arus igunaken guna erban kerina alat-alat si iperluken i bas ngelayani,
15 bage ka pe asa kai buena emas si iperluken guna erban erbage-bage ingan lampu+ ras lampuna, bage pe asa kai buena pirak si iperluken guna erban erbage-bage ingan lampu ras lampu si deban menurut gunana masing-masing i bas pelayanen.
16 Janah asa kai buena emas si iperluken guna erban tiap meja guna ingan roti persembahen,*+ ras asa kai buena pirak si iperluken guna erban meja-meja pirak,
17 bage pe asa kai buena emas si iperluken guna erban garpu ras mangkok,+ janah asa kai buena emas murni si iperluken guna erban tiap teko si kitik, asa kai buena emas guna erban mangkok si kitik, janah asa kai buena pirak si iperluken guna erban mangkok si kitik.
18 Itentukenna ka asa kai buena emas murni si iperluken guna erban ingan nutung* persembahen,+ bage pe guna erban kerubim-kerubim si kabengna kimbang, eme si jadi tanda gereta Dibata.+ Bayangen kerubim-kerubim+ e nutupi Peti Perjanjin Jahwe.
19 Nina Daud, “Tan Jahwe kap si negu-negu aku, janah iberekenNa man bangku pengangkan guna nulisken kerina rancangen bangunen+ e alu jelas.”+
20 Kenca si e, nina Daud man Salomo anakna, “Perpanglah janah megegehlah, lakokenlah dahin e. Ula mbiar ntah pe gentar, sebap itemani Dibata Jahwe nge pagi kam, Ia kap Dibataku.+ Labo pagi kam tadingkenNa janah pasti kam perdiatekenNa.+ TemaniNa pagi kam seh ngasa dung ibangun rumah Jahwe.
21 Enda ndai me kelompok-kelompok imam+ ras kalak Lewi+ si ngelayani bas rumah Dibata si benar. Lit enterem kalak si ermeriah ukur erdahin ras kam, janah kalak e ahli bas erbage-bage dahin.+ Selain si e, kerina pejabat+ ras rakyat pe patuh pagi man kerina petunjukndu.”
Cataten i teruh
^ Ntah “Peti Perpadanen.”
^ As. “melala amburkenndu dareh.”
^ Ntah “guna tutup.”
^ Ntah “roti lapis.”
