1 Kronika 29:1-30
29 Nina Raja Daud man kerina kalak si pulung i je, “Kalak si pilih Dibata eme anakku Salomo,+ ia nguda denga janah la lit pengalamenna,*+ tapi dahin e seh kel belinna, sebap rumah pertoton* si nandangi ibangun e labo man manusia tapi man Dibata Jahwe.+
2 Asa gegehku enggo kusikapken persedian guna mbangun rumah Dibataku. Enggo kusikapken emas, pirak, tembaga, besi,+ kayu,+ batu oniks, batu permata si debanna, batu si warna-warni si iban jadi hiasen, kerina jenis batu si merga, ras batu marmar si seh kel lalana.
3 Selain si e, perban jadi kel ateku rumah Dibataku,+ kubereken ka ertaku+ man rumah Dibataku, eme emas ras pirak. Enggo ka kusikapken man rumah si badia
4 lit 102 ton 600 kilo* emas Opir+ ras lit 239 ton 400 kilo* pirak murni guna ngelapisi dingding rumah e.
5 Kusikapken ka emas guna erban barang-barang arah emas, pirak guna erban barang-barang arah pirak, ras kai pe si iperluken tukang-tukang si ahli guna ngelakoken dahinna. Jadi gundari, ise si atena mereken sumbangen man Jahwe i bas wari enda?”+
6 Emaka peminpin-peminpin arah keluarga bapak, peminpin-peminpin arah suku Israel, peminpin-peminpin si ngawasi seribu kalak ras si ngawasi seratus kalak,+ bage pe peminpin-peminpin si ngurus urusen raja+ nggit mereken sumbangen.
7 Ibereken kalak e 171 ton* emas, 10.000 darik,* 342 ton* pirak, 615 ton 600 kilo* tembaga, ras 3.420 ton* besi. Sumbangen e kerina guna mbangun rumah Dibata si benar.
8 Ise pe si lit bas ia batu si merga, itamakenna ku bas ingan nimpan erta rumah Jahwe, si ijaga Jehiel+ kalak Gerson.+
9 Meriah ukur bangsa e mereken sumbangen e, alu bulat ukur berekenna sumbangen e jadi persembahen man Jahwe.+ Raja Daud pe meriah kel ukurna.
10 Jenari ipuji Daud me Jahwe i lebe-lebe kerina kalak si pulung i je. Nina Daud, “O Jahwe Dibata Israel, Dibata nini bulang kami, mbera-mbera Kam ipuji seh rasa lalap.
11 O Jahwe, Kam Dibata si mbelin,+ megegeh, hebat,+ luar biasa, ras mulia.*+ Sebap Kam kap si mpuna kerina si lit bas surga bage pe si lit bas doni.+ O Jahwe, Kam kap si mpuna kerajan.+ BanNdu Kam jadi penguasa nandangi kerinana.
12 Kerina kebayaken ras kemulian reh bas Kam nari.+ Kam si erkuasa nandangi kerinana.+ I bas tanNdu lit kuasa ras gegeh,+ janah ngasup+ tanNdu erban kerina kalak jadi mbelin+ ras megegeh.+
13 Gundari, o Dibata kami, ngata bujur kami man baNdu janah puji kami gelarNdu si mulia.
14 “Ise kin aku janah ise kin bangsaku maka banci bere kami sumbangen si bagenda? Kerinana e rehna arah Kam nari, janah kai pe si bereken kami man baNdu rehna arah tanNdu nari.
15 I lebe-lebeNdu, kami enda penduduk asing ras penduduk sementara, bali bagi nini bulang kami.+ Geluh kami bas doni enda bali bagi bayangen+ saja janah la lit arapen kami.
16 O Jahwe Dibata kami, kerina si enggo sikapken kami guna mbangun rumah man gelarNdu si badia e rehna arah tanNdu nari, janah kerina e Kam kap punana.
17 O Dibataku, kuteh maka Kam kap si mereksa pusuh,+ janah ngena ateNdu kalak si setia.+ Arah pusuhku si bersih ras bujur, kupersembahken kerina sumbangen e, janah meriah kel ukurku ngidah umatNdu si lit i jenda ikut mereken sumbangen man baNdu.
18 O Jahwe, Kam kap Dibata si isembah Abraham, Isak, bage pe nini bulang kami Israel. Sampati min umatNdu e gelah terus meriah ukurna i bas mere ras ngelayani Kam alu bulat ukur.+
19 Sampati min anakku Salomo gelah ersura-sura ia ngelayani Kam alu bulat ukur,+ alu bage banci patuhina perentahNdu,+ pengingetNdu, bage pe undang-undangNdu. Sampati min ia ngelakoken si e kerina ras mbangun rumah pertoton* si enggo kusikapken persedian-persedianna.”+
20 Jenari nina Daud man kerina kalak si pulung i je, “Gundari pujilah Jahwe Dibata kena.” Emaka kerina kalak e muji Jahwe, Dibata nini bulang kalak e, janah sujud kalak e i lebe-lebe Jahwe ras i lebe-lebe raja.
21 Lalap persembahken kalak e korban man Jahwe bage pe korban persembahen tutungen+ man Jahwe seh ku paginna. Persembahken kalak e 1.000 lembu jantan si nguda denga, 1.000 biri-biri jantan, 1.000 anak biri-biri jantan, bage pe persembahen inemen.+ Melala kel korban si ipersembahken kalak e guna kepentingen kerina kalak Israel.+
22 Bas wari e, lalap kalak e man ras minem i lebe-lebe Jahwe alu ermeriah ukur,+ janah pedua kaliken ilantik kalak e Salomo anak Raja Daud jadi peminpin i lebe-lebe Jahwe,+ janah Sadok si jadi imam.+
23 Emaka kundul Salomo i tahta Jahwe+ selaku raja bas istana Daud bapakna. Berhasil ia jadi raja, janah kerina kalak Israel patuh man bana.
24 Kerina pejabat,+ pejuang-pejuang si megegeh,+ bage pe kerina anak Raja Daud si dilaki+ patuh man Raja Salomo.
25 Iban Jahwe me Salomo jadi raja si hebatna i lebe-lebe kerina kalak Israel. Salomo si muliana i bas kerina raja si pernah merentah kalak Israel.+
26 Daud anak Isai enggo merentah nandangi kerina Israel,
27 lit 40 tahun dekahna ia merentah bas Israel. Bas Hebron lit 7 tahun dekahna ia merentah,+ janah bas Jerusalem lit 33 tahun dekahna.+
28 Mate ia, umurna seh kel tuana.+ Puas ia ndalani kegeluhenna, bayak, ras imuliaken. Kenca si e Salomo anakna jadi raja nggantiken ia.+
29 Sejarah kerna Raja Daud, mulai tangtangna nari seh ku pendungina itulis Nabi Natan,+ Samuel si lit pengenehenenna,* bage pe Gat+ si dat pengenehenen.*
30 Itulis kalak e kerna pemerentahenna, kemulianna, kejadin-kejadin si terjadi man bana ras man Israel, bage pe kerina kerajan si lit i sekelilingna.
Cataten i teruh
^ Ntah “istana.”
^ Ntah “janah lemah.”
^ As. “7.000 talenta.”
^ As. “10.000 talenta.”
^ As. “100.000 talenta.”
^ As. “18.000 talenta.”
^ Darik eme sen logam emas Persia.
^ Ntah “ras si meganjangna.”
^ Ntah “istana.”
^ Bas bahasa Heber, kata enda ngertiken kengasupen sekalak jelma si bereken Dibata guna meteh sura-suraNa.
^ Eme kerna kai pe si cidahken Dibata ku bas pikiren sekalak jelma.