1 Kronika 5:1-26
5 Ruben+ eme anak Israel sintua, janah lit piga-piga anak Ruben si dilaki. Amin pe ia anak sintua, ia kebenen hakna selaku anak sintua perban enggo erhubungen seks ia ras gundik* bapakna.*+ Hak selaku anak sintua ibereken man anak-anak Jusup si dilaki.+ Jusup e anak Israel.
2 Amin gia hebaten Juda+ asangken senina-seninana janah arah ia nari rehna kalak si jadi peminpin,+ tapi Jusup si ndatken hak anak sintua.
3 Ruben eme anak Israel sintua. Anak-anak Ruben eme Henoh, Pallu, Hesron, ras Karmi.+
4 Anak Joel eme Semaya. Anak Semaya eme Gog. Anak Gog eme Simei.
5 Anak Simei eme Miha. Anak Miha eme Reaya. Anak Reaya eme Baal.
6 Anak Baal eme Beerah. Beerah me si itaban Raja Tilgat-pilneser+ arah Assur nari. Beerah e peminpin kalak Ruben.
7 Menurut silsilah keluarga kalak e, senina-senina Beerah eme Jeiel (ia si jadi kepala kalak e), Sakaria,
8 ras Bela (Bela e anak Asas. Asas e anak Sema. Sema e anak Joel). Bela me si tading i daerah Aroer+ seh ku Nebo ras Baalmeon.+
9 Melala kel asuh-asuhen kalak e i Gileat.+ Emaka tading kalak e i daerah bagin timur seh asa dalan masuk ku taneh mesawang* si lit i Lau Eprat.+
10 I bas jaman Saul, erperang kalak e ras kalak Hagri janah taluken kalak e kalak Hagri. Emaka, tading kalak e bas kemah-kemah kalak Hagri bas kerina daerah si lit i bagin timur Gileat.
11 Keturunen Gat tading i sebelah keturunen Ruben, eme i daerah Basan seh ku Saleka.+
12 Joel kap si jadi peminpin i Basan. Sapam jadi si nomor dua. Selain si e lit ka Janai ras Sapat i je.
13 Lit pitu senina kalak e arah keluarga bapakna eme Mikael, Mesullam, Syeba, Jorai, Jakan, Sia, ras Eber.
14 Kalak e ndai anak Abihail. Abihail e anak Huri. Huri e anak Jaroa. Jaroa e anak Gileat. Gileat e anak Mikael. Mikael e anak Jesisai. Jesisai e anak Jahdo. Jahdo e anak Bus.
15 Ahi si jadi peminpin i bas keluarga bapak kalak e. Ahi e anak Abdiel. Abdiel e anak Guni.
16 Kalak e tading i Gileat,+ i Basan,+ i bas kota-kota si lit i sekelilingna, bage pe i bas kerina mbalmbal si lit i belang-belang Saron.
17 Kalak e icatat bas silsilah keluargana i bas jaman Jotam+ raja Juda bage pe bas jaman Jerobeam*+ raja Israel.
18 Lit 44.760 pejuang si megegeh si terlatih erperang bas suku Ruben, Gat, ras setengah arah suku Manase nari. Kalak e kerina maba perisai,* pedang, janah beluh make panah.
19 Kalak e erperang ngelawan kalak Hagri,+ kalak Jetur, kalak Napis,+ ras kalak Nodap.
20 Pindo kalak e penampat Dibata i bas perang e, janah sampatiNa kalak e perban tuhu-tuhu tek kel kalak e man baNa. Emaka serahken Dibata ku tan kalak e kalak Hagri bage pe kerina si debanna.+
21 Rampas kalak e asuh-asuhen musuhna eme 50.000 unta, 250.000 biri-biri, ras 2.000 kelede. Lit 100.000 kalak si tabanna.
22 Enterem si mate bas perang e, sebap si erperang eme Dibata si benar.+ Tading kalak e i je seh asa masa penabanen.+
23 Keturunen arah setengah suku Manase+ tading i daerah Basan seh asa Baal Hermon, i Senir, ras i Gunung Hermon.+ Seh kel teremna kalak e.
24 Enda me si jadi peminpin bas keluarga bapak kalak e: Eper, Isi, Eliel, Asrel, Jeremia, Hodawia, ras Jahdiel. Kalak e kerina pejuang si megegeh, kalak si terkenal, janah kalak e me peminpin bas keluarga bapakna.
25 Tapi, kalak e la setia man Dibata nini bulangna. Sembah kalak e dibata-dibata arah bangsa-bangsa si enggo ikernepken Dibata i lebe-lebe kalak e bagi pelacur.+
26 Emaka ban Dibata Israel tersuruh ukur Pul raja Assur+ (eme Raja Tilgat-pilneser+ arah Assur nari) guna naban suku Ruben, suku Gat, ras setengah arah suku Manase nari. Babana kalak e ku Halah, Habor, Hara, ras Lau Gosan.+ I je kalak e tading seh ngasa gundari.
Cataten i teruh
^ As. “perban enggo najis banna ingan medem bapakna.”
^ Taneh si mbelang si jarang iingani.
^ Maksudna, Jerobeam II.
^ Ntah “ampang-ampang.”
