1 Petrus 1:1-25
1 Petrus, sekalak rasul+ Jesus Kristus, nulis surat enda man penduduk sementara eme kalak si ipilih si tersebar bas Pontus, Galati, Kapadokia,+ Asia, ras Bitinia.
2 Kena ipilih Dibata, Bapakta+ sesuai ras rencanaNa, pebadiaNa kena alu kesah si badia+ gelah patuh kena ras badia alu dareh Jesus Kristus.+
Mbera-mbera terbuen dat kena kiniulin si luar biasa ras kedamen.
3 Terpujilah Dibata, Bapak Tuanta Jesus Kristus, perban perkuah ateNa si mbelin, banNa kita lahir mulihi+ gelah lit arapenta si paguh+ perban Jesus Kristus ipegeluh arah si mate nari.+
4 BereNa kita warisen si la banci masap, la najis, ras la banci ceda.+ Si e isimpan i surga guna kena.+
5 Lindungi kuasa Dibata kena perban kena erkiniteken, gelah dat kena keselamaten si icidahken pagi bas wari pendungi.
6 Emaka ermeriah ukurlah kerna si e, amin pe gundari arus kena erceda ate ntisik perban erbage-bage percuban si dat kena.+
7 Alu bage, kiniteken kena si enggo iuji+ erban kena ndatken pujin, kemulian, ras kehamaten sanga cidahken Jesus Kristus pagi kuasana.+ Kiniteken si bage ndauh ergan asangken emas si banci hancur amin pe enggo iuji alu api.
8 Keleng ate kena ia amin pe lenga idah kena. Amin pe lenga idah kena ia gundari, tapi erkiniteken kena man bana janah meriah kel ukur kena alu keriahen ukur si mbelin ras mulia, si la terbelasken alu kata-kata.
9 Sebap tek kena maka kiniteken kena banci nelamatken kena.+
10 Keselamaten enda kap si ipereksa nabi-nabi alu mbages janah tutus. Ernubuat mbarenda nabi-nabi e kerna kiniulin si luar biasa si bereken Dibata man kena.+
11 Sope si e, ersaksi kesah si badia bas kalak e kerna kiniseran si nandangi iadapi Kristus+ bage pe kerna kemulian si nandangi alokenna kenca si e kerina. Emaka terus pereksa kalak e kai si nandangi terjadi man Kristus+ janah ndigan si e terjadi.
12 Ikataken man nabi-nabi e maka kalak e labo ngelayani dirina tapi ngelayani kena. Tulis kalak e kerna kai si enggo iberitaken man kena, si begi kena arah kalak si mberitaken berita si meriah alu penampat kesah si badia si ikirim arah surga nari.+ Kerna si e, malekat-malekat pe merhat kel metehsa.
13 Emaka sikapkenlah ukur kena gelah banci tutus ate kena erdahin.+ Jagalah perukuren kena gelah tetap benar.+ Ngaraplah man kiniulin si luar biasa si nandangi aloken kena sanga cidahken Jesus Kristus kuasana.
14 Selaku anak-anak si patuh, ula nai kena ipengaruhi* sura-sura kena si mbarenda sanga lenga lit pemeteh kena.
15 Tapi badia min kena bas kerina perbahanen kena, bagi Dibata si ndilo kena pe badia kap,+
16 perban lit tertulis, “Kena arus badia, sebap Aku pe badia.”+
17 Adi erlebuh kena man Bapak si la mbeda-bedaken+ sanga ngakimi sesuai ras perbahanen tiap kalak, arah perbahanen kena arus teridah maka mbiar kena baNa+ sanga kena jadi penduduk sementara i doni enda.
18 Kena enggo ibebasken* arah kegeluhen si la erguna, si aloken kena arah nini bulang kena nari. Kena ibebasken labo alu barang si banci masap, bagi emas ntah pirak.+
19 Tapi kena ibebasken alu dareh Kristus si merga,+ bagi dareh anak biri-biri si la lit cacatna ras bersih.+
20 Payo, ia enggo ipilih Dibata sope doni enda ijadiken,*+ tapi cidahkenna dirina bas wari-wari pendungi guna kena.+
21 Perban ia, tek kena man Dibata,+ si enggo mpegeluh ia arah si mate nari+ janah bereNa kemulian man bana.+ Alu bage, kena erkiniteken janah erpengarapen man Dibata.
22 Gundari enggo pebadia kena diri kena alu matuhi kebenaren. Alu bage, kekelengen kena la munapik man turang senina kena.+ Emaka, tuhu-tuhulah kena sikeleng-kelengen arah pusuh nari.+
23 Kena enggo ilahirken mulihi,+ labo arah benih si banci kernep,+ tapi arah benih si la banci ikernepken, eme alu kata arah Dibata si nggeluh, si lit rasa lalap.+
24 Lit tertulis, “Kerina manusia bagi dukut, kerina kemulianna bagi bunga i juma. Dukut jadi melus, bunga pe dungna naktaken,
25 tapi kata Jahwe* tetap lit seh rasa lalap.”+ “Kata” si imaksud eme berita si meriah si enggo iberitaken man kena.+
