1 Petrus 2:1-25
2 Emaka tadingkenlah kerina si jahat,+ ula nai nipu, munapik, rate cian, ntah pe ncikurakken kalak.
2 Bagi bayi si mbaru lahir,+ pebelinlah sura-sura kena guna minem susu si la icampur, eme kata Dibata, gelah reh belinna kena janah iselamatken,+
3 perban enggo gejapken kena maka mehuli kel Tuan e.
4 Tuanta eme batu si nggeluh, si tulak manusia.+ Tapi pilih Dibata ia janah merga kapNa ia.+ Sanga dahi kena ia,
5 kena si jadi batu-batu si nggeluh, ibangun jadi rumah rohani+ gelah kena jadi imam-imam si badia guna mpersembahken korban-korban rohani+ si aloken Dibata arah Jesus Kristus.+
6 Lit ayat si ngataken, “Nenlah! Enggo Kupilih sada batu si merga, si Kutamaken i Sion jadi batu si utama. Ise pe si erkiniteken man bana, labo pernah ikecewaken.”*+
7 Merga akap kena ia perban tek kena man bana. Tapi man kalak si la tek, “batu si tulak tukang bangunen,+ enggo jadi batu si utama,”+
8 ras “jadi batu si erban kalak tertuktuk ras batu si erban kalak ndabuh.”+ Tertuktuk kalak e perban la patuhina kata e. E me kedungen si nimai kalak e.
9 Tapi kena kap “bangsa pilihen, imam-imam si jadi raja, bangsa si badia,+ umat Dibata si istimewa,+ gelah beritaken kena kemulian”*+ Dibata, si enggo maba kena ndarat arah gelap nari ku terangNa si luar biasa.+
10 Mbarenda kena labo umat Dibata, tapi gundari kena enggo jadi umatNa.+ Mbarenda la dat kena perkuah ateNa, tapi gundari enggo dat kena.+
11 Turang senina si kukelengi, mindo kel aku gelah kena selaku kalak asing ras penduduk sementara,+ terus min tulak kena sura-sura daging si erdosa+ si erperang ngelawan kena.+
12 Mehuli min lagu langkah kena i tengah bangsa-bangsa,+ gelah adi tuduh kalak e kena ngelakoken kai si la mehuli, kalak e banci jadi saksi mata perbahanen kena si mehuli,+ hasilna muliaken kalak e Dibata sanga kerehenNa guna ngakimi.
13 Guna Tuanta, patuhlah man kerina pemerentah manusia+ ras man raja+ si ganjangen kedudukenna asangken kena,
14 bage pe man gubernur-gubernur si isuruh raja guna ngukum kalak si jahat janah muji kalak si mehuli.+
15 Sura-sura Dibata eme gelah mehuli perbahanen kena, alu bage banci pesinik kena kalak si enggo nuduh kena perban la lit pemetehna.+
16 Nggeluhlah bagi kalak bebas,+ tapi ula ban kebebasen kena guna nutupi perbahanen si salah,+ tapi nggeluhlah bagi budak Dibata.+
17 Hamatilah erbage-bage jelma,+ kelengilah kerina teman si sada kiniteken,+ mbiarlah man Dibata,+ janah mehamatlah man raja.+
18 Budak-budak arus patuh janah mehamat man tuanna,+ labo saja man tuan si mehuli ras erpengangka, tapi man tuan si mesera muat ukurna pe.
19 Ngena ate Dibata man kalak si setia* ngadapi kiniseran bage pe man kalak si susah kapna perban la adil iban man bana, sebap bersih tena pusuh peratenna i lebe-lebe Dibata.+
20 Kai gunana tahanken kena ipekpeki sanga lakoken kena dosa?+ Adi ertahan kena ngadapi kiniseran perban ngelakoken si mehuli, ngena ate Dibata man kena.+
21 Situhuna, kena ipilih Dibata guna ndalani kegeluhen si bage. Perban Kristus pe ngadapi kiniseran guna kena,+ ia jadi usihen gelah ikutken kena dalan-dalanna alu megermet.+
22 La lakokenna dosa,+ la pernah ia erbual.+
23 Sanga ia ihina,+ la hinana mulihken.+ Sanga adapina kiniseran,+ la ancamna kalak si erbanca ia dat kiniseran. Tapi serahkenna kerina man Hakim+ si adil.
24 Alu dagingna tanggungna dosa-dosata+ sanga ia ipakuken bas tiang,*+ gelah banci kita ibebasken arah dosa nari janah nggeluh guna ngelakoken kai si benar. Selain si e “perban lukana, kena enggo ipepalem.”+
25 Mbarenda kena bagi biri-biri si papak.+ Tapi gundari, kena enggo mulihken ku permakan kena+ ras si njagai kegeluhen kena.
Cataten i teruh
^ As. “ipermelaken.”
^ Maksudna, sipat-sipat ras perbahanenNa si patut ipuji.
^ Ntah “megenggeng.”
^ Ntah “kayu.”
