1 Petrus 5:1-14
5 Aku pe pertua ka nge, bagi kena. Kusaksiken kiniseran Kristus janah ikut aku dat kemulianna si icidahken pagi.+ Emaka kubereken nasehat-nasehat enda man pertua-pertua si lit i tengah-tengah kena:
2 Permakanilah rarasen biri-biri Dibata+ si enggo berekenNa man kena. Ngelayanilah kena selaku pengawas,* labo alu terpaksa tapi alu ukur meriah i lebe-lebe Dibata,+ labo alu ndarami keuntungen si la jujur+ tapi alu semangat.
3 Ula perentah kena kalak si enggo iserahken* man kena+ tapi jadilah usihen man rarasen.+
4 Sanga cidahken kepala permakan e+ pagi dirina, aloken kena pagi mahkota si mulia si la banci ceda.+
5 Bage ka pe kena dilaki-dilaki si terngudan, patuhlah kena man kalak si tertuan.*+ Meteruk ukurlah kena bas erurusen ras kalak, sebap kalak si meganjang rukur itulak Dibata, tapi man kalak si meteruk ukur berekenNa kiniulin si luar biasa.+
6 Emaka peteruklah diri kena i teruh tan Dibata si megegeh, gelah peganjangNa kena bas waktu si tepat.+
7 Benterkenlah kerina kekuatiren* kena man Dibata,+ sebap perdiatekenNa kap kena.+
8 Jagalah perukuren kena janah tetaplah erjaga-jaga!+ Sebap musuh kena, Iblis, erdalan ku jah ku je bagi singa si erngaung ndarami si man panganenna.*+
9 Tapi lawanlah ia+ alu kiniteken si paguh. Bagi si enggo teh kena, kerina teman kena pe si sada kiniteken i belang-belang doni, dat kiniseran si seri.+
10 Tapi kenca dat kena kiniseran bas waktu si ntisik, Dibata si dem alu kiniulin si luar biasa, si ngelebuh kena ku kemulian si rasa lalap+ bas persadan ras Kristus, Ia si ndungi pelatihen kena, banNa kena paguh,+ banNa kena megegeh,+ janah banNa kena nteguh.
11 Dibata kap si erkuasa seh rasa lalap. Amin.
12 Surat si gendek enda kuban man kena alu penampat Silvanus,*+ eme sekalak turang seninata si kuanggap kalak si setia. Kupegegehi ateku kena ras kubereken kesaksin, maka enda tuhu-tuhu kiniulin Dibata si luar biasa. Tetaplah kam bas kiniulin si luar biasa e.
13 Diberu* si lit i Babilon eme kalak si ipilih bagi kena, ras anakku Markus,+ kirim salam man kena.
14 Alo-alolah sada ras si debanna alu dem kekelengen.*
Mbera-mbera kerina kena si ersada ras Kristus banci nggejapken kedamen.
Cataten i teruh
^ Ntah “si ngepkep.”
^ Ntah “iwarisken Dibata.”
^ Ntah “man pertua-pertua.”
^ Ntah “kearun ate.”
^ Ntah “terkamenna.”
^ Igelari ka ia Silas.
^ Mungkin maksudna sada runggun.
^ As. “alu ciumen si jadi tanda kekelengen.”
