1 Raja-Raja 1:1-53
1 Gundari enggo metua kel Raja Daud.+ Amin pe ia enggo iselimuti, mbergeh denga kapna lalap.
2 Emaka nina pelayan-pelayanna man bana, “O Tuanku Raja, pediatlah darami kami sekalak singuda-nguda man bandu, gelah urusna kam janah jagana. Medem kari ia deherndu gelah melas kapndu.”
3 Emaka darami kalak e bas kerina daerah Israel sekalak singuda-nguda si mejile, janah datna Abisah+ arah Sunem nari,+ jenari babana ku raja.
4 Singuda-nguda e seh kel jilena. Ia si ngurus ras si njagai raja, tapi raja la erhubungen seks ras ia.
5 Adonia+ anak Hagit sombong kel ngerana, nina, “Aku kari si jadi raja!” Emaka suruhna kalak nikapken gereta perang guna ia, bage pe prajurit si erkuda, ras 50 kalak gelah kiam i lebe-lebena.+
6 Tapi la pernah persingeti* bapakna ia, la pernah katakenna, “Engkai maka bage banndu?” Adonia pe seh kel gantengna. Ia lahir kenca Absalom.
7 Arih-arih Adonia ras Joap anak Seruya bage pe ras Imam Abiatar,+ emaka idukung kalak e Adonia ras sampatina.+
8 Tapi Imam Sadok,+ Benaya+ anak Joyada, Nabi Natan,+ Simei,+ Rei, ras pejuang-pejuang Daud si megegeh,+ la ndukung Adonia.
9 Persembahken Adonia korban+ biri-biri, lembu, bage pe binatang-binatang si mbur i deher Batu Nipe* si lit i deher Enrogel, janah undangna kerina senina-seninana eme anak-anak raja, bage pe kerina kalak Juda pelayan-pelayan raja.
10 Tapi la undangna Nabi Natan, Benaya, bage pe pejuang-pejuang si megegeh, ntah pe Salomo seninana.
11 Kenca si e, nina Natan+ man mamak Salomo+ eme Batseba,+ “Lenga kin tehndu Adonia+ anak Hagit enggo jadi raja? Janah sitik pe la teh tuanta Daud kerna si e.
12 Emaka adi keleng kin atendu kesahndu ras kesah anakndu Salomo, begikenlah nasehatku.+
13 Dahilah Raja Daud, janah kataken bana, ‘O Tuanku Raja, la kin kam enggo ersumpah man bangku budakndu enda, maka anakku Salomo pagi si jadi raja kenca kam, janah ia pagi si kundul bas tahtandu?+ Engkai maka gundari Adonia si jadi raja?’
14 Sanga ngerana kari kam ras raja, reh kari aku guna ngataken man raja maka tuhu si katakenndu e.”
15 Emaka lawes Batseba njumpai raja ku kamarna. Raja enggo metua kel janah Abisah+ kalak Sunem e sangana njagai raja.
16 Sujud Batseba man raja, emaka sungkun raja ia, “Kai atendu?”
17 Jawapna, “O Tuanku Raja, enggo ersumpah kam man bangku budakndu enda bas gelar Jahwe, maka anakku Salomo pagi si jadi raja kenca kam, janah ia pagi si kundul bas tahtandu.+
18 Tapi gundari Adonia enggo jadi raja janah sitik pe la iteh Tuanku Raja kerna si e.+
19 Melala kel ikorbankenna lembu jantan, binatang-binatang si mbur, bage pe biri-biri. Undangna kerina anak-anak raja, Imam Abiatar, bage pe Joap peminpin pasuken,+ tapi la undangna budakndu Salomo.+
20 Emaka gundari Tuanku Raja, kerina kalak Israel nimai kam guna ngataken ise pagi si kundul bas tahta Tuanku Raja kenca kam.
21 Adi la katakenndu gundari, mate kenca pagi kam, aku ras anakku Salomo anggap kalak pagi penghianat.”
22 Sanga ngerana denga Batseba ras raja, reh Nabi Natan.+
23 Minter lit si ngataken man raja, “Enggo reh Nabi Natan!” Emaka ngadap janah sujud Natan i lebe-lebe raja.
24 Jenari nina Natan, “O Tuanku Raja, pernah kin katakenndu maka Adonia pagi si jadi raja kenca kam, janah ia pagi si kundul bas tahtandu?+
25 Sebap bas wari enda enggo melala kel korbankenna+ lembu jantan, binatang-binatang si mbur, bage pe biri-biri. Undangna ka kerina anak raja si dilaki, peminpin-peminpin pasuken, ras Imam Abiatar.+ Man ras minem kalak e janah nina, ‘Hidup Raja Adonia!’
26 Tapi la undangna aku budakndu enda, Imam Sadok, Benaya+ anak Joyada, bage pe budakndu Salomo.
27 Enggo kin kam setuju nandangi si enda kerina, janah la katakenndu man bangku kerna ise si kundul bas tahta Tuanku Raja kenca kam?”
28 Emaka nina Raja Daud, “Lebuh Batseba.” Jenari masuk ia janah tedis i lebe-lebe raja.
29 Ersumpah raja, nina, “I lebe-lebe Jahwe si nggeluh si enggo nelamatken aku arah kerina musuhku,+
30 gundari kutepati sumpahku man bandu si kukataken i bas gelar Jahwe Dibata Israel, maka anakndu Salomo pagi si jadi raja kenca aku, janah ia pagi si kundul bas tahtaku.”
31 Emaka sujud Batseba i lebe-lebe raja janah nina, “Mbera-mbera Tuanku Raja Daud nggeluh rasa lalap!”
32 Mis kataken Raja Daud, “Lebuh Imam Sadok, Nabi Natan, ras Benaya+ anak Joyada.”+ Emaka reh kalak e ngadap raja.
33 Nina raja man kalak e, “Baba kenalah budak-budakku janah aturken gelah anakku Salomo naik bagalku,*+ jenari baba ia ku Gihon.+
34 I je kari lantik Imam Sadok ras Nabi Natan ia+ jadi raja Israel. Kenca si e, embuslah trompet tanduk janah kataken, ‘Hidup Raja Salomo!’+
35 Kenca si e, ikutken kena ia mulih. Kundul pagi ia bas tahtaku guna nggantiken aku jadi raja. Kujadiken kari ia peminpin Israel ras Juda.”
36 Megi si e, nina Benaya anak Joyada man raja, “Amin! Mbera-mbera kata-katandu e isahken Jahwe, Dibata Tuanku Raja.
37 Mbera-mbera Jahwe nemani Salomo+ bali bagi Ia enggo nemani Tuanku Raja. Mbera-mbera belinen ibanNa tahta Salomo asangken tahta Tuanku Raja Daud.”+
38 Kenca si e, lawes Imam Sadok, Nabi Natan, Benaya+ anak Joyada, pengawal-pengawal pribadi+ raja,* janah ban kalak e Salomo naik bagal Raja Daud.+ Baba kalak e ia ku Gihon.+
39 Buat Imam Sadok tanduk si isina minak+ bas kemah+ jenari lantikna Salomo.+ Embus kalak e trompet tanduk janah kerina kalak ersurak, “Hidup Raja Salomo!”
40 Kenca e, kerina kalak ngikutken ia janahna main suling ras ersurak-surak. Perban gangna sora kalak e ersurak, doni pe mugur-ugur.+
41 Sanga Adonia ras kerina tamuna e dung man, begi kalak e sora e.+ Kenca begi Joap sora trompet tanduk e, nina, “Engkai maka gejek kel bas kota ah?”
42 Sanga ngerana denga ia, reh Jonatan+ anak Imam Abiatar. Emaka nina Adonia, “Mari, kam kalak si mehuli, pasti babandu berita si mehuli.”
43 Tapi nina Jonatan man Adonia, “Sekalenda lang! Sebap tuanta Raja Daud enggo ngangkat Salomo jadi raja.
44 Suruh raja me Imam Sadok, Nabi Natan, Benaya anak Joyada, pengawal-pengawal pribadi raja* guna lawes ras Salomo. Iban kalak e ia naik bagal raja.+
45 Kenca si e, lantik Imam Sadok ras Nabi Natan ia jadi raja bas Gihon. Kenca e, mulih kalak e alu ermeriah ukur, emaka gejek kel sora kalak e bas kota. E me sora si begi kena.
46 Gundari, Salomo enggo kundul bas tahta kerajan.
47 Selain si e, reh budak-budak raja guna ngataken selamat man Raja Daud. Ning kalak e, ‘Mbera-mbera Dibatandu erban gelar Salomo lebih terkenal asangken gelarndu, janah banNa tahta Salomo belinen asangken tahtandu!’ Kenca e, tungkuk raja bas ingan medem,
48 jenari ertoto ia, ‘Terpujilah Kam, Jahwe Dibata Israel. Enggo lantikNdu sekalak jelma guna kundul bas tahtaku, janah sempat denga banNdu kuidah kerna si e!’”
49 Emaka mbiar kerina tamu Adonia. Jenari lawes kalak e siban-ban dalanna.
50 Adonia pe mbiar perban Salomo, emaka lawes ia janah tagangina tanduk-tanduk si lit bas ingan nutung* persembahen.+
51 Emaka ilaporken man Salomo, “Mbiar Adonia man Raja Salomo. Tagangina tanduk-tanduk si lit bas ingan nutung persembahen, janah nina, ‘Ersumpah min lebe Salomo man bangku maka labo kari bunuhna budakna enda alu pedang.’”
52 Megi si e nina Salomo, “Adi mehuli perbahanenna, labo kari sada pe bukna ndabuh. Tapi adi lang,+ arus ia mate.”
53 Emaka suruh Raja Salomo gelah penusur kalak ia arah ingan nutung persembahen nari. Kenca si e, reh ia janah sujud ia man Raja Salomo. Emaka nina Salomo man bana, “Mulihlah ku rumahndu.”
Cataten i teruh
^ Ntah “rawai.”
^ Ntah “Batu Zohelet.”
^ Keturunen kelede jantan ras kuda beruna.
^ As. “kalak Kereti ras Peleti.”
^ As. “kalak Kereti ras Peleti.”
