1 Raja-Raja 10:1-29
10 Enggo begi ratu arah Syeba kerna Salomo, si terkenal perban gelar Jahwe.+ Emaka dahina Salomo guna nguji ia alu penungkunen-penungkunen si mesera.*+
2 Seh ia i Jerusalem radu ras rombongenna si seh kel teremna,+ bage pe unta-unta si maba minak balsem,*+ emas si seh kel lalana, ras batu-batu si merga. Dahina Salomo janah katakenna kerina penungkunen si lit bas pusuhna.
3 Jawap Salomo kerina penungkunenna. La lit si meserasa akap raja njelaskenca.
4 Sanga langsung begi ratu Syeba kerina kepentaren Salomo,+ janah idahna istana si ibangunna,+
5 idahna ka pangan si lit i mejana,+ peraturen kerna ingan kundul man pejabat-pejabatna, cara pelayanna ngelayani bas meja makan bage pe peruis pelayanna e, kalak si ngurus inemen, ras korban tutungen si persembahkenna alu ratur bas rumah Jahwe, jengang kel ratu e perban luar biasa kel akapna.*
6 Nina ratu e man raja, “Tuhu kepe si kubegi bas negriku kerna kai si enggo hasilkenndu bage pe kerna kepentarenndu.
7 Tapi la aku tek kai si kataken kalak man bangku adi lenga kin kudahi ku jenda janah aku sendiri si ngidahsa. Kepeken, lenga setengahna pe si kubegi e. Kepentarenndu ras kemakmurenndu ndauh belinen asangken si enggo kubegi.
8 Pasti meriah ukur rakyatndu bage pe pelayan-pelayanndu si lalap ras kam, sebap banci lalap begikenna kata-katandu si pentar.+
9 Terpujilah Jahwe Dibatandu+ si enggo ncidahken ngena ateNa man bandu, janah tamaNa kam i tahta Israel. Perban kekelengen Jahwe man Israel lit rasa lalap, emaka pilihNa kam jadi raja gelah dalankenndu kai si adil ras si benar.”
10 Jenari, bereken ratu arah Syeba man Raja Salomo 4.104 kilo* emas, minak balsem si seh kel lalana,+ ras batu-batu si merga.+ Lanai pernah lit kalak si mereken minak balsem man Raja Salomo bage buena, bagi si bereken ratu e.
11 Kapal-kapal Hiram si maba emas arah Opir+ pe maba batu-batu si merga+ ras kayu cendana si seh kel lalana.+
12 Kayu cendana e ipake raja erban penyangga rumah Jahwe bage pe istana raja. Pakena ka kayu e guna erban harpa* ras alat musik si ersenar si debanna guna ipake penyanyi-penyanyi.+ Seh ngayak gundari lanai lit si pernah maba kayu cendana si bage buena ntah pe si ngidahsa.
13 Bereken Raja Salomo ka man ratu e kai pe si isurakenna ras kai pe si pindona. Selain si e, bereken Salomo ka man bana hadiah-hadiah si memang berekenna atena. Jenari, mulih ratu e ras pelayan-pelayanna ku negrina.+
14 Tiap tahun, aloken Salomo emas si buena kira-kira 23 ton.*+
15 Si e kerina lenga termasuk untung si datna arah pedagang-pedagang, perbinaga-perbinaga, bage pe arah kerina raja kalak Arab ras gubernur-gubernur bas negri e.
16 Pake Raja Salomo emas campuren guna erban 200 perisai* si galang.+ Lit kira-kira pitu kilo* emas si pakena guna erban tiap perisai.+
17 Pakena ka emas campuren guna erban 300 perisai si kitik.* Lit kira-kira dua kilo* emas si pakena guna erban tiap perisai. Jenari tamaken raja kerina perisai e bas Rumah Kerangen Libanon.+
18 Ban raja ka tahta si galang arah gading nari,+ jenari lapisina alu emas si imurniken.+
19 I lebe-lebe tahta e, lit enem anak tangga janah i datas tahta e lit atapna kibul. Arah kanan ras kiri kursi tahta e lit ingan ngamparken tan, janah bas tiap tepina lit tedis sada patung singa+ i je.
20 Bas tiap ujung anak tangga e, i sebelah kanan ras kirina, lit i je tedis sada patung singa, jumlahna kerina lit 12 patung singa. La pernah lit kerajan si deban si bage tahtana.
21 Kerina ingan minem Raja Salomo iban arah emas nari. Kerina peralaten si lit bas Rumah Kerangen Libanon+ iban arah emas murni, la lit si iban arah pirak nari, sebap bas jaman Salomo pirak la ianggap merga.+
22 Lit kapal-kapal Tarsis raja,+ janah kapal-kapalna e lit i laut ras kapal-kapal Hiram. Tiap telu tahun sekali, reh kapal-kapal e maba emas, pirak, gading,+ kera, ras burung merak.
23 Ndauh bayaken Raja Salomo+ janah ndauh ia pentaren+ asangken kerina raja si deban si lit bas doni.
24 Kerina kalak bas doni usahakenna njumpai Salomo guna megi kepentarenna si bereken Dibata man bana.+
25 Tiap reh kalak ndahi Salomo, babana hadiah man bana, eme barang-barang si iban arah pirak ras emas, uis, senjata, minak balsem, kuda, ras bagal.* Bage si terjadi tiap tahun.
26 Lalap pepulung Salomo gereta perang bage pe kuda-kuda.* Lit 1.400 gereta perangna ras 12.000 kudana.+ Tamakenna gereta perang e bas kota-kota ingan gereta perang si ndeher ku ingan raja i Jerusalem.+
27 Pirak bas Jerusalem ban raja buena bagi batu, janah kayu aras bali buena bagi batang ara kerangen si lit i Sepela.+
28 Kuda-kuda Salomo e ikirim arah Mesir nari. Perbinaga si erdahin man raja nukur kuda-kuda e* alu erga si enggo itetapken.+
29 Tiap gereta perang si itukur* arah Mesir nari ergana 600 logam pirak, janah sada kuda ergana 150 logam pirak, jenari dayaken* kalak e man kerina raja kalak Het+ ras raja-raja kalak Siria.
Cataten i teruh
^ Ntah “alu teka-teki.”
^ Minak si merim si iban arah sinuan-sinuan ntah pe batang kayu tertentu. E ipake guna jadi tambar ntah pe parfum.
^ As. “emaka lemas ia.”
^ Harpa eme alat musik si ersenar bagi gitar, tapi bentukna beda.
^ Ntah “ampang-ampang.”
^ Biasana enda perisai si ibaba sekalak pemanah.
^ Keturunen kelede jantan ras kuda beruna.
^ Ntah “si nangkih kuda.”
^ Ntah banci saja “e arah Mesir ras Kewe,” mungkin Kilikia.
^ Ntah “iimpor.”
^ Ntah “iekspor.”
