1 Raja-Raja 11:1-43
11 Selain putri raja Mesir,+ enterem diberu arah bangsa asing+ si ngena ate Raja Salomo. Diberu-diberu e eme kalak Moap,+ Ammon,+ Edom, Sidon,+ ras kalak Het.+
2 Kerna bangsa-bangsa e enggo kataken Jahwe man Israel, nina, “La banci kena erjabu* ras kalak e, janah kalak e pe la banci erjabu ras kena, sebap pasti pagi pengaruhina kena gelah nembah dibata-dibatana.”+ Tapi kompak Salomo ras kalak e janah ngena atena kalak e.
3 Lit 700 diberu Salomo, kalak e anak-anak raja, janah lit 300 gundikna.* Dungna pengaruhi diberu-diberuna e Salomo gelah ndauh ras Dibata.*
4 Kenca metua Salomo,+ pengaruhi diberu-diberuna e ia nembah dibata-dibata si deban.+ Lanai bulat ukurna man Jahwe Dibatana. La ia bagi Daud bapakna.
5 Sembah Salomo dibata kalak Sidon eme Dewi Astarte+ bage pe dibata kalak Ammon eme Milkom,+ berhala si ciga kel ate Dibata.
6 Lakoken Salomo kai si jahat akap Jahwe janah la bulat ukurna nembah Jahwe. La lakokenna bagi si lakoken Daud bapakna.+
7 Datas gunung si lit i lebe-lebe Jerusalem, bangun Salomo ingan ersembah*+ man Dewa Kemos dibata kalak Moap bage pe man Dewa Molekh+ dibata kalak Ammon.+
8 Bage me si lakoken Salomo man kerina diberu-diberuna si arah bangsa asing. Diberu-diberuna kap si mpersembahken korban man dibata-dibatana janah tutungna gelah ku das asapna.
9 Merawa kel Jahwe man Salomo, perban lanai bulat ukurna man Jahwe Dibata Israel,+ si enggo dua kali ncidahken diri man Salomo.+
10 Janah enggo ka persingetiNa maka la banci sembahna dibata-dibata si deban.+ Tapi la patuhi Salomo perentah Jahwe e.
11 Nina Jahwe man Salomo, “Perban bage si lakokenndu janah la tepatindu perjanjinKu ras peraturen si enggo Kuperentahken man bandu, Kubuat kerajanndu e arah kam nari janah Kubereken man sekalak budakndu.+
12 Amin pe bage, perban Daud bapakndu, la Kulakoken si e sanga kam nggeluh denga. Kubuat pagi kerajan e arah tan anakndu,+
13 tapi labo kerina Kubuat.+ Kubereken pagi sada suku man anakndu+ perban Daud budakKu bage pe perban Jerusalem si enggo Kupilih.”+
14 Emaka ban Jahwe lit kalak si ngelawan Salomo,+ eme Hadat kalak Edom, ia keturunen raja Edom.+
15 Mbarenda sanga Daud naluken Edom,+ lawes Joap peminpin pasukenna guna nguburken kalak si ibunuh sange, janah usahakenna munuh kerina dilaki si lit i Edom.
16 Joap ras kerina pasuken Israel tading i je enem bulan dekahna seh asa kerina dilaki bas Edom ibunuh.
17 Sanga si e, Hadat kitik denga, kiam ia ku Mesir ras piga-piga kalak Edom eme pelayan bapakna.
18 Emaka lawes kalak e arah Midian janah seh kalak e i Paran. Babana piga-piga kalak arah Paran+ jenari lawes kalak e ku Mesir. Bereken raja Mesir man Hadat sada rumah, taneh, bage pe pangan.
19 Seh kel jadina ate raja Mesir ngidah Hadat. Emaka berekenna senina diberuna jadi diberu Hadat. Diberu raja Mesir eme Ratu Tahpenes.*
20 Dungna lahirken senina Tahpenes sekalak anak dilaki eme Genubat. Tahpenes si ngurus anak e bas rumah raja Mesir,* janah tading Genubat bas rumah raja Mesir ras anak-anak raja Mesir.
21 Bas Mesir, begi Hadat maka Daud enggo mate.+ Joap peminpin pasuken pe enggo mate.+ Emaka nina Hadat man raja Mesir, “Ijinken min aku lawes ku negriku.”
22 Tapi nina raja Mesir man Hadat, “Engkai maka lawes tendu ku negrindu? Lit kin kapndu si kurang sanga kam tading i jenda?” Nina Hadat, “Labo lit si kurang, tapi pediat min aku lawes.”
23 Iban Dibata ka kalak si deban ngelawan Salomo+ eme Reson anak Eliada, si kiam nadingken tuanna Hadadeser+ raja Soba.
24 Mbarenda sanga taluken* Daud kalak e, pepulung Reson kalak jadi anggotana janah ia si jadi peminpin kelompok perampok.+ Emaka lawes kalak e ku Damaskus+ janah tading kalak e i je, jenari mulai kalak e merentah i Damaskus.
25 Sedekah Salomo nggeluh, Reson terus ngelawan Israel janah terus susahina Israel bagi si lakoken Hadat. Sedekah Reson merentah Siria, segat kel atena Israel.
26 Lit sekalak budak Salomo+ gelarna Jerobeam.+ Ia anak Nebat kalak Eperaim arah Sereda. Mamakna enggo janda, gelarna Serua. Jerobeam pe mulai mberontak ngelawan raja.+
27 Lawanna Salomo perban bangun Salomo Bukit*+ janah e nutupi celah-celah si lit i Kota Daud bapakna.+
28 Jerobeam dilaki si banci iandalken. Sanga idah Salomo anak muda si pekerja keras enda, jadikenna ia pengawas+ man keturunen Jusup si iwajipken erdahin man raja.
29 Bas sada wari, lawes Jerobeam arah Jerusalem, janah nabi Ahia+ kalak Silo njumpai ia bas dalan. Pake Ahia jubah si mbaru denga. Kalak e ngenca duana i je.
30 Tangtangi Ahia jubahna si mbaru e jenari rigatkenna jadi 12 potong.
31 Kenca si e nina man Jerobeam,
“Buatlah sepuluh potong man bandu, sebap bagenda nina Jahwe Dibata Israel, ‘Kurigatken kerajan e arah tan Salomo janah Kubereken pagi man bandu sepuluh suku.+
32 Tapi sada suku tetap man Salomo+ perban Daud+ budakKu bage pe perban Jerusalem kota si enggo Kupilih arah kerina suku Israel.+
33 Kulakoken enda perban tadingken kalak e Aku.+ Sujud kalak e man Astarte dibata kalak Sidon, man Kemos dibata kalak Moap, bage pe man Milkom dibata kalak Ammon. La kalak e erdalan bas dalan-dalanKu alu la ngelakoken kai si benar i lebe-lebeKu janah la patuhi kalak e peraturenKu ras undang-undangKu. La kalak e seri bagi Daud.
34 Tapi labo pagi kerina kerajan e Kubuat arah tan Salomo. Kupediat pagi ia jadi peminpin sedekah ia nggeluh. Si e Kuban perban Daud budakKu si enggo Kupilih,+ sebap enggo patuhina perentahKu ras peraturenKu.
35 Tapi Kubuat pagi kerajan e arah tan anak Salomo, jenari Kubereken sepuluh suku man bandu.+
36 Kubereken pagi sada suku man anak Salomo, gelah lit keturunen Daud si terus merentah* i lebe-lebeKu i Jerusalem,+ kota si enggo Kupilih man bangKu jadi ingan gelarKu.
37 Kupilih pagi kam, janah merentah kam nandangi kerina sura-surandu. Kam pagi si jadi raja Israel.
38 Adi patuhindu kerina perentahKu, erdalan kam bas dalan-dalanKu, janah lakokenndu kai si benar i lebe-lebeKu alu matuhi peraturenKu ras perentahKu, bagi si lakoken Daud budakKu,+ Aku pe lit ras kam. Kubangun pagi rumah man bandu si tahan rasa lalap, bagi si enggo Kubangun man Daud.+ Kubereken ka pagi Israel man bandu.
39 Perban dosa Salomo, mela pagi Kuban keturunen Daud,+ tapi labo seh rasa lalap.’”+
40 Emaka usahaken Salomo munuh Jerobeam, tapi kiam Jerobeam ku Mesir, ku Sisak+ raja Mesir.+ Tetap ia tading bas Mesir ngasa Salomo mate.
41 Cerita si debanna kerna sejarah Salomo, kerina si lakokenna ras kerina kepentarenna, itulis bas buku sejarah kerna Salomo.+
42 Salomo merentah kerina Israel sedekah 40 tahun i Jerusalem.
43 Mate Salomo janah ikuburken bas Kota Daud bapakna. Anakna si nggantiken ia jadi raja eme Rehabeam.+
Cataten i teruh
^ Ntah “erteman.”
^ Ntah “Mbelin kel pengaruh diberu-diberuna e man Salomo.”
^ As. “ingan-ingan si meganjang.”
^ Labo ratu si merentah.
^ Ntah banci saja “Tahpenes si ngurus anak e bas rumah raja Mesir kenca ngadi ia minem ASI.”
^ As. “bunuh.”
^ Ntah “Milo.” Istilah Heber si ertina “taneh si ergun-gun.”
^ As. “gelah lit sekalak si jadi lampu man Daud.”
