1 Raja-Raja 12:1-33
12 Lawes Rehabeam ku Sikem, sebap enggo reh kerina kalak Israel ku Sikem+ guna njadiken ia raja.+
2 Kenca begi Jerobeam kerna si e, lawes ia nadingken Mesir. Sanga si e, Jerobeam anak Nebat sangana i Mesir. Kiam ia ku Mesir perban Raja Salomo.+
3 Kenca si e isuruh sekalak jelma ndahi Jerobeam, jenari Jerobeam ras kerina kalak Israel reh ndahi Rehabeam janah nina,
4 “Enggo ban bapakndu mberat baban kami.+ Tapi adi banndu reh nahangna baban kami e ras pendahin si bereken bapakndu e, layani kami pagi kam.”
5 Megi si e, nina raja, “Mulih lebe kena. Telu wari nari reh ka kena ku jenda.” Emaka lawes kerina kalak e.+
6 Kenca si e, sungkuni Raja Rehabeam tua-tua* eme penasehat Salomo bapakna sanga ia nggeluh denga, nina, “Menurut kena, kai nge ningku man kalak e?”
7 Nina tua-tua e, “Adi layanindu gundari kalak e, begikenndu pemindonna, janah mehuli jawapen si berekenndu, pasti lalap pagi kalak e jadi pelayanndu.”
8 Tapi tulakna nasehat tua-tua e, janah sungkunina pendapat anak muda eme temanna sebaya si gundari jadi pelayanna,+
9 nina, “Bagenda kataken kalak e, ‘Banlah baban kami reh nahangna.’ Menurut kena, kai nge ningku?”
10 Nina temanna sebaya e, “Man kalak si ngataken, ‘Enggo ban bapakndu baban kami jadi mberat. Tapi banlah baban kami reh nahangna,’ bagendalah nindu njawapsa, ‘Susahen pagi akap kena kuban asangken si iban bapakku.*
11 Bereken bapakku man kena baban si mberat, tapi reh beratna pagi kuban baban kena e. Hukum bapakku kena alu cambuk si biasa, tapi kuhukum kena pagi alu cambuk si erduri.’”
12 Bas wari si peteluken, reh Jerobeam ras kerina kalak ndai ndahi Raja Rehabeam, sebap enggo kataken Rehabeam, “Telu wari nari reh ka kena ku jenda.”+
13 La ikutken Raja Rehabeam nasehat tua-tua e. Kasar ia ngerana man rakyat e.
14 Jawapna kalak e menurut nasehat anak muda ndai, nina, “Bereken bapakku man kena baban si mberat, tapi aku, kutambahi ka baban kena. Hukum bapakku kena alu cambuk si biasa, tapi kuhukum kena alu cambuk si erduri.”
15 La begiken raja pemindon rakyatna e. Kerina e terjadi perban Jahwe,+ gelah terjadi kai si kataken Jahwe man Jerobeam anak Nebat si pesehNa arah Ahia+ kalak Silo.
16 Kenca kerina kalak Israel ngidah maka la begiken raja pemindon kalak e, nina kalak e, “Kai kin urusen kami ras Daud? Labo lit warisen si dat kami arah anak Isai. O kalak Israel, mulihlah kena ku dibata-dibata kena. O keturunen Daud, uruslah diri kena.” Kenca si e, mulih kalak Israel ku rumahna.+
17 Tapi Rehabeam terus merentah kalak Israel si tading i kota-kota Juda.+
18 Kenca si e, suruh Raja Rehabeam me Adoniram+ ngawasi kalak si kerja paksa. Tapi kerina kalak Israel mbenteri ia alu batu seh ngasa mate. Raja Rehabeam berhasil kiam nangkih geretana ku Jerusalem.+
19 Mulai je nari kalak Israel mberontak+ man keluarga Daud seh ngasa gundari.
20 Kenca begi kalak Israel maka Jerobeam enggo mulih, pulung kalak e jenari lebuhna Jerobeam janah jadikenna ia raja bas kerina Israel.+ La lit si tetap setia man keturunen Daud, selain suku Juda.+
21 Kenca seh Rehabeam i Jerusalem, mis pepulungna 180.000 prajurit si terlatih arah kerina suku Juda ras suku Benyamin. Kalak e ipepulung guna ngelawan kalak Israel gelah kerajan e mulihken ku Rehabeam anak Salomo.+
22 Kenca si e, ngerana Dibata si benar arah Nabi Semaya,*+ nina,
23 “Kataken man Rehabeam anak Salomo raja Juda, man kerina suku Juda ras Benyamin, bage pe man rakyat si debanna,
24 ‘Enda si kataken Jahwe, “Ula kena erperang ngelawan senina-senina kena kalak Israel. Mulihlah kena ku rumah kena, sebap Aku kap si erban si enda terjadi.”’”+ Emaka patuhi kalak e kai si kataken Jahwe, jenari mulih kalak e ku rumahna bagi si kataken Jahwe.
25 Kenca si e, bangun Jerobeam tembok kota Sikem+ si lit i daerah pegunungen Eperaim janah tading ia i je. Je nari lawes ia janah bangunna tembok kota Penuel.+
26 Nina Jerobeam bas ukurna, “Banci saja mulihken pagi kerajan enda ku keturunen Daud,+
27 adi lalap lawes rakyat ku Jerusalem guna mpersembahken korban bas rumah Jahwe.+ Pusuh kalak e pe banci ka pagi mulihken man tuanna Rehabeam raja Juda. Dungna bunuh kalak e aku janah mulih kalak e ku Rehabeam raja Juda.”
28 Kenca ngerana raja ras penasehat-penasehatna, ban raja dua anak lembu emas,+ janah nina man rakyat e, “O kalak Israel, enggo mberatsa akap kena lawes ku Jerusalem. Enda Dibata kena, si maba kena ndarat arah negri Mesir nari.”+
29 Kenca si e, tamana sada i Betel+ janah sada nari i Dan.+
30 Si e erban kalak e erdosa.+ Lawes kalak e ku Dan guna nembah patung si lit i je.
31 Ban Jerobeam ingan-ingan ersembah bas ingan-ingan si meganjang, janah lantikna imam-imam arah rakyat biasa nari si labo arah suku Lewi.+
32 Ban Jerobeam ka perayan bas wari si pe-15-ken, bas bulan si pewaluhken, bagi perayan si lit i Juda.+ I datas ingan nutung* persembahen si banna i Betel,+ persembahkenna korban man patung-patung anak lembu si banna. Janah tugaskenna imam-imam bas ingan-ingan ersembah si banna i Betel.
33 Bas wari si pe-15-ken, bas bulan si pewaluhken eme bulan si pilihna, mulai berekenna persembahen bas ingan nutung persembahen si banna i Betel. Banna perayan man kalak Israel, janah nangkih ia ku ingan nutung persembahen guna nutung korban gelah ku das asapna.
Cataten i teruh
^ Ntah “pertua-pertua.”
^ As. “Kelingkingku belinen asangken awak bapakku.”
^ As. “arah pelayan Dibata si benar.”
