1 Raja-Raja 13:1-34
13 Perban perentahken Jahwe, lawes sekalak nabi Dibata+ arah Juda nari ku Betel. Paksa si e, Jerobeam sangana tedis i deher ingan nutung* persembahen+ janahna nutung korban gelah ku das asapna.
2 Kenca si e, bagi si perentahken Jahwe, kataken nabi Dibata e man ingan nutung persembahen, “O ingan nutung persembahen, ingan nutung persembahen! Enda si kataken Jahwe, ‘Lahir pagi sekalak anak arah keturunen Daud, gelarna Josia!+ I datasndu, ikorbankenna pagi imam-imam si ertugas bas ingan si meganjang, eme si nutung korban i datasndu gelah ku das asapna. Tutungna ka pagi tulan-tulan manusia i datasndu.’”+
3 Bas wari e berekenna tanda, nina, “Enda tanda arah Jahwe nari: Terbelah pagi ingan nutung persembahen e janah abu* si lit i datasna pe mambur.”
4 Jerobeam sangana mpersembahken korban bas ingan nutung persembahen. Kenca begina ranan nabi Dibata kerna ingan nutung persembahen i Betel, pepinterna tanna nuduh ia, nina, “Tangkap ia!”+ Mis kaku* tanna lanai banci tarikna.+
5 Kenca e, terbelah ingan nutung persembahen e janah abuna pe mamburen pas bagi tanda si kataken nabi Dibata si benar si enggo perentahken Jahwe.
6 Nina raja man nabi Dibata si benar e, “Tolong, pindolah perkuah ate Jahwe Dibatandu. Ertotolah kam guna kepentingenku gelah banci malem tanku e.”+ Emaka pindo nabi Dibata si benar perkuah ate Jahwe, dungna malem tan raja e.
7 Kenca si e, nina raja man nabi Dibata si benar, “Ota kita ku rumah gelah man kita, kubere teku hadiah man bandu.”
8 Tapi nina nabi Dibata si benar man raja, “Amin pe berekenndu man bangku setengah istanandu, labo aku nggit lawes ras kam. Labo aku nggit man ntah pe minem bas ingan enda.
9 Sebap enggo perentahken Jahwe man bangku, ‘Ula kam man ntah pe minem, janah ula kam mulih arah dalanndu reh ndai.’”
10 Emaka mulih ia arah dalan si deban, la ia mulih arah dalanna reh ku Betel ndai.
11 Lit sekalak nabi si enggo metua tading i Betel. Kenca mulih anak-anakna, ceritaken kalak e kerina si lakoken nabi Dibata si benar i Betel bas wari e, bage pe kerna ranan si kataken nabi e man raja. Kenca ceritaken kalak e man bapakna,
12 nungkun bapakna, “Arah ja ndai ia lawes?” Tuduhken anak-anakna dalan si ilewati nabi Dibata si benar si reh arah Juda e.
13 Emaka nina man anak-anakna, “Pasang pelana ku das kelede.” Pasang kalak e pelana e jenari naik ia.
14 Ikutkenna nabi Dibata si benar e janah jumpaina ia sangana kundul i teruh batang kayu si galang. Jenari nina, “Kam nabi Dibata si benar si reh arah Juda nari?”+ Ijawap nabi e, “Ue, aku.”
15 Nina, “Ota kita man ku rumah.”
16 Tapi nina nabi e, “La banci aku mulih ras kam ntah pe reh ku rumahndu, bage pe man ntah pe minem ras kam bas ingan enda.
17 Sebap enggo perentahken Jahwe man bangku, ‘Ula man ntah pe minem i jah. Ula kam mulih arah dalanndu reh.’”
18 Megi si e, nina, “Aku pe nabi nge bali bagi kam, janah lit sada malekat isuruh Jahwe ngerana man bangku, ‘Baba ia mulih ku rumahndu gelah panna roti janah minem ia.’” (Situhuna tipuna ia.)
19 Emaka ras kalak e mulih guna man ras minem bas rumahna.
20 Sanga kalak e kundul, ngerana Jahwe man nabi si maba ia mulih,
21 jenari megang nabi e ngerana man nabi Dibata si benar arah Juda, nina, “Enda si kataken Jahwe, ‘Perban kam enggo mberontak man perentah Jahwe janah lanai patuhindu perentah si bereken Jahwe Dibatandu,
22 tapi mulih kam janah man ras minem kam, padahal enggo ikataken man bandu, “Ula kam man ntah pe minem,” emaka mayatndu la ikuburken bas kuburen nini bulangndu.’”+
23 Kenca nabi Dibata si benar e dung man ras minem, ipasang nabi si metua e pelana ku kelede guna nabi Dibata si benar e.*
24 Kenca e lawes ia, tapi reh sada singa nyerang ia bas dalan janah ibunuh singa e ia.+ Ampar mayatna bas dalan, janah tedis kelede e ras singa ndai i samping mayat e.
25 Kalak si ngelewati dalan e ngidah mayat e ampar bas dalan bage pe singa si tedis i samping mayat e. Masuk kalak e ku kota ingan tading nabi si metua ndai janah ceritaken kalak e kerna si e.
26 Sanga begi nabi si metua e kerna kai si terjadi,* mis katakenna, “Ia nabi Dibata si benar si mberontak ngelawan perentah Jahwe.+ Emaka serahken Jahwe ia ku singa gelah serangna janah bunuhna ia, bagi si enggo kataken Jahwe man bana.”+
27 Emaka nina man anak-anakna, “Pasang pelana ku kelede.” Emaka ipasang kalak e.
28 Kenca si e lawes ia janah dapetina mayat ndai bas dalan, bage pe kelede ras singa si tedis i sampingna. La ipan singa mayat e janah kelede e pe la serangna.
29 Angkat nabi e mayat nabi Dibata si benar ndai janah tamakenna ku das kelede, jenari ibabana mulih ku kotana guna itangisi ras ikuburken.
30 Kuburkenna mayat e bas kuburenna janah lalap kataken kalak e, “Andiko, Seninaku!”
31 Kenca kuburkenna, nina man anak-anakna, “Adi mate pagi aku, kuburkenlah aku bas kuburen nabi Dibata si benar e. Tamakenlah tulan-tulanku i samping tulan-tulanna.+
32 Pasti terjadi kata-kata Jahwe si ipesehna kerna ingan nutung persembahen i Betel bage pe kerna kerina ingan ersembah si lit bas ingan-ingan si meganjang+ bas kota-kota Samaria.”+
33 Enggo pe terjadi si e ndai kerina, Jerobeam la berubah arah perbahanenna si jahat, tapi terus lantikna imam-imam arah rakyat biasa nari guna ngelayani bas ingan-ingan ersembah.*+ Lantikna ise pe si atena banna jadi imam, janah nina, “Ia pe jadi imam bas ingan-ingan ersembah.”+
34 Si e jadi dosa bas keluarga Jerobeam+ si erban kalak e ikernepken janah imasapken arah doni enda.+
Cataten i teruh
^ Ntah “abu si erlemak,” eme abu si enggo campur ras lemak korban.
^ Ntah “lumpuh.”
^ As. “nabi si ibabana mulih ndai.”
^ As. “nabi si maba ia mulih ndai berita e.”
^ As. “ingan-ingan si meganjang.”
