1 Raja-Raja 14:1-31
14 Bas sada wari sakit Abia anak Jerobeam.
2 Emaka nina Jerobeam man diberuna, “Laweslah kam ku Silo. Menyamar kam gelah ula teh kalak kam diberuku. I je kari lit Nabi Ahia. Ia mbarenda si ngataken maka aku pagi jadi raja si merentah bangsa enda.+
3 Dahi ia janah baba sepuluh roti, kue-kue, bage pe sada botol madu. Kenca si e katakenna kari man bandu kai si terjadi man anak enda.”
4 Emaka lakoken diberu Jerobeam si kataken dilakina. Lawes ia ku Silo+ janah dahina rumah Ahia. Ahia lanai erpengidah perban enggo metua.
5 Nina Jahwe man Ahia, “Reh kari diberu Jerobeam mindo petunjuk kerna anakna, perban anakna sangana sakit. Kukataken kari si arus katakenndu man bana. Menyamar kari ia sanga ia reh.”
6 Kenca seh ia bas pintu, begi Ahia sora nahena erdalan, nina, “Mari ku basken, diberu Jerobeam. Engkai kam menyamar? Enggo isuruh aku mpeseh berita si la mehuli man bandu.
7 Kataken man Jerobeam, ‘Enda si kataken Jahwe Dibata Israel, “Enggo Kupilih kam arah tengah-tengah bangsandu jadi peminpin umatKu Israel.+
8 Emaka Kurigatken kerajan e arah keluarga Daud janah Kubereken man bandu.+ Tapi kam la bagi budakKu Daud, si matuhi perentahKu, si ngikutken Aku alu bulat ukur, janah si ngelakoken kai si benar menurutKu saja.+
9 Jahaten kam asangken kerina kalak si nggeluh ope kam. Banndu dibata si deban man bandu bage pe berhala logam si erban Aku merawa+ janah tadingkenndu Aku.+
10 E me sebapna Kuban bencana man keturunen Jerobeam, janah Kubunuh tiap dilaki bas keluarga Jerobeam, termasuk si mesera ras si lemah bas Israel. Bali bagi mbersihken kotoren seh asa lanai lit bekasna, bage pagi keturunen Jerobeam+ Kusapu bersih!
11 Ise pe keluarga Jerobeam si mate bas kota, biang si manca. Ise pe si mate bas juma, perik-perik i langit si manganisa. Sebap Jahwe kap si ngatakenca.”’
12 “Gundari mulihlah kam ku rumahndu. Seh kenca kari kam bas kota, mate anakndu e.
13 Kerina kari kalak Israel erceda ate janah nguburken ia. Arah keluarga Jerobeam ia ngenca si ikuburken, sebap arah keluarga Jerobeam ia ngenca si idah Jahwe lit si mehuli i bas ia.
14 Bas waktuna pagi, lantik Jahwe sekalak raja Israel si engkernepken keluarga Jerobeam.+ Janah gundari pe, adi bage kin ateNa, banci lakokenNa.
15 Kernepken Jahwe pagi kalak Israel janah banNa kalak e bagi dukut si bombang-bombang datas lau. CabutNa pagi kalak Israel arah negri si mehuli e, eme negri si enggo berekenNa man nini bulang kalak e.+ BanNa kalak e merap seh ku sebrang Lau Eprat,+ sebap enggo ban kalak e tiang-tiang si badia*+ si erban Jahwe merawa.
16 Tadingken Dibata pagi kalak Israel perban dosa-dosa Jerobeam janah perban enggo erdosa banna kalak Israel.”+
17 Emaka mulih diberu Jerobeam janah seh ia i Tirsa. Sanga seh ia i lebe-lebe pintu rumah, mate anakna.
18 Emaka anak e ikuburken janah kerina kalak Israel erceda ate, bagi si enggo kataken Jahwe arah budakNa Nabi Ahia.
19 Cerita si debanna kerna sejarah Jerobeam, uga ia erperang+ janah uga ia merentah, kerina itulis bas buku sejarah raja-raja Israel.
20 Lit 22 tahun dekahna Jerobeam merentah. Kenca e mate ia.+ Anakna eme Nadap si merentah nggantiken ia jadi raja.+
21 Paksa si e, Rehabeam anak Salomo si merentah jadi raja i Juda. Sanga Rehabeam jadi raja umurna 41 tahun, janah lit 17 tahun dekahna ia merentah bas Jerusalem. Kota e ipilih Jahwe+ arah kerina suku Israel jadi ingan man gelarNa.+ Gelar mamak Rehabeam eme Naama kalak Ammon.+
22 Lakoken Juda kai si jahat iakap Jahwe.+ Dosa-dosa si lakoken kalak e erban rawan Dibata man kalak e asangken man nini bulang kalak e.+
23 Bas kerina ingan si meganjang+ bage pe i teruh batang kayu si melala bulungna,+ bangunna ingan-ingan ersembah,* tugu-tugu si badia ras tiang-tiang si badia.*+
24 Bas negri e lit ka dilaki-dilaki si jadi pelacur bas ingan-ingan ersembah.+ Lakoken kalak e kerina perbahanen si ciga ate Dibata, eme perbahanen bangsa-bangsa si enggo pelawes Jahwe arah lebe-lebe kalak Israel nari.
25 Bas tahun pelimaken pemerentahen Raja Rehabeam, reh Raja Sisak+ arah Mesir nyerang Jerusalem.+
26 Buatna erta-erta si lit bas rumah Jahwe bage pe erta-erta bas istana raja.+ Buatna kerinana termasuk kerina perisai* emas si iban Salomo.+
27 Emaka gantiken Raja Rehabeam perisai-perisai e alu erban perisai-perisai tembaga. Percayakenna perisai-perisai e man peminpin-peminpin si njaga pintu masuk ku istana raja.
28 Tiap masuk raja ku rumah Jahwe, mis baba penjaga-penjaga perisai e guna ngkawal raja, kenca dung, ulihkenna ka perisai-perisai e ku ingan penjaga-penjaga.
29 Cerita si debanna kerna sejarah Rehabeam ras kerina si lakokenna itulis bas buku sejarah raja-raja Juda.+
30 Rehabeam ras Jerobeam lalap erperang.+
31 Dungna mate Rehabeam janah ikuburken ras nini bulangna i Kota Daud.+ Gelar mamakna eme Naama kalak Ammon.+ Anakna si nggantiken ia jadi raja eme Abiam.*+
Cataten i teruh
^ As. “ingan-ingan si meganjang.”
^ Ntah “ampang-ampang.”
^ Eme gelar Abia si deban.
