1 Raja-Raja 15:1-34
15 Bas tahun pe-18-ken pemerentahen Raja Jerobeam+ anak Nebat, Abiam jadi raja Juda.+
2 Telu tahun dekahna ia merentah i Jerusalem. Gelar mamakna Maaka+ kempu Abisalom.
3 Lakoken Abiam dosa-dosa si seri ras bapakna mbarenda. La bulat ukurna nembah Jahwe Dibatana. La bagi ukur Daud nini bulangna.
4 Tapi perban Daud,+ Jahwe Dibatana mpediat keturunen Abiam merentah* i Jerusalem.+ Lantik Dibata anakna jadi raja si nggantiken ia janah banNa Jerusalem tetap lit.
5 Si e iban Dibata perban enggo lakoken Daud kai si benar menurut Jahwe. Segedang geluhna la pernah tadingkenna perentah Dibata, selain kerna Uria kalak Het.+
6 Segedang geluh Rehabeam, lalap terjadi perang antara ia ras Jerobeam.+
7 Cerita si debanna kerna sejarah Abiam ras kerina si lakokenna, itulis bas buku sejarah raja-raja Juda.+ Lit ka terjadi perang antara Abiam ras Jerobeam.+
8 Dungna mate Abiam janah ikuburken i Kota Daud. Anakna si nggantiken ia jadi raja+ eme Asa.+
9 Bas tahun pe-20-ken Jerobeam jadi raja Israel, mulai Asa merentah i Juda.
10 Lit 41 tahun dekahna Asa merentah i Jerusalem. Gelar ninina Maaka+ kempu Abisalom.
11 Lakoken Asa kai si benar menurut Jahwe Dibatana+ bagi Daud nini bulangna.
12 Pelawesna arah negri e dilaki-dilaki si jadi pelacur bas ingan ersembah,+ janah benterkenna kerina berhala si iban nini bulang kalak e, eme berhala si ciga ate* Dibata.+
13 Pengadi Asa ninina Maaka+ arah kedudukenna selaku ratu. Sebap enggo banna patung si ciga ate Dibata janah si e ipake i bas penembahen tiang si badia.* Hancurken Asa patung e+ janah tutungna i Lembah Kidron.+
14 Tapi ingan-ingan ersembah* la ihancurken,+ amin pe bage tetap bulat ukur Asa man Jahwe segedang geluhna.
15 Tamakenna ku bas rumah Jahwe kerina barang-barang si enggo ipebadiana ras bapakna, eme pirak, emas, ras erbage-bage peralaten.+
16 Lalap terjadi perang antara Asa ras Baasa+ raja Israel.
17 Reh Baasa raja Israel nyerang Juda. Bangunna* Rama+ gelah ise pe la banci masuk ntah pe ndarat ku daerah Asa raja Juda.+
18 Emaka ibuat Asa kerina pirak ras emas si lit denga bas ingan nimpan erta i rumah Jahwe bage pe bas ingan nimpan erta i istana, jenari serahkenna man pelayan-pelayanna. Suruh Asa pelayan-pelayanna e mpeseh pesan man raja Siria+ si tading i Damaskus eme Benhadat anak Tabrimon kempu Hesion, nina,
19 “Lit perjanjin antara aku ras kam bage pe antara bapakku ras bapakndu. Kukirim man bandu hadiah eme pirak ras emas. Emaka batalkenndu min perjanjinndu ras Baasa raja Israel, gelah mundur ia arah aku nari.”
20 Begiken Benhadat me Raja Asa janah suruhna peminpin-peminpin arah pasukenna nyerang kota-kota Israel. Taluken kalak e Ijon,+ Dan,+ Abel Bet Maaka, bage pe kerina Kineret ras kerina daerah Naptali.
21 Sanga begi Baasa kerna si e, mis pengadina pembangunen Rama janah tetap ia tading i Tirsa.+
22 Kenca si e, lebuh Raja Asa kerina kalak Juda, sada pe la lit si tading. Suruhna kalak e maba batu-batu ras kayu-kayu si ipake Baasa guna mbangun Rama. Jenari pake Raja Asa kerina e guna mbangun Mispa+ bage pe Geba+ si lit i Benyamin.
23 Cerita si debanna kerna sejarah Asa, kerna kerina kehebatenna ras kerina si lakokenna bage pe kota-kota si bangunna, itulis bas buku sejarah raja-raja Juda. Tapi sanga ia enggo metua, duana nahena kena penakit.+
24 Dungna mate Asa jenari ikuburken ia ras nini bulangna bas Kota Daud nini bulangna. Kenca si e, anakna si nggantiken ia jadi raja, eme Josapat.+
25 Nadap+ anak Jerobeam jadi raja Israel bas tahun si peduaken pemerentahen Asa raja Juda. Lit dua tahun dekahna Nadap jadi raja Israel.
26 Terus lakokenna kai si jahat menurut Jahwe. Ikutkenna dalan bapakna+ bage pe dosa bapakna si erban kalak Israel pe ngelakoken dosa.+
27 Baasa anak Ahia keturunen Isakar ersekongkol ngelawan Nadap. Bunuh Baasa ia i Gibeton+ kota kalak Pilisti. Paksa si e, Nadap ras kerina pasuken Israel sangana ngepung kota Gibeton.
28 Bunuh Baasa ia bas tahun peteluken pemerentahen Asa raja Juda. Emaka Baasa si nggantiken Nadap jadi raja.
29 Kenca Baasa jadi raja, minter bunuhna kerina keturunen Jerobeam. La lit sekalak pe pediatna nggeluh. Kerinana bunuhna, bagi kata-kata Jahwe si enggo pesehNa arah budakNa eme Ahia kalak Silo.+
30 Si enda terjadi perban enggo iban Jerobeam merawa kel Jahwe Dibata Israel. Lakoken Jerobeam dosa-dosa janah banna kalak Israel pe ngelakoken dosa.
31 Cerita si debanna kerna sejarah Nadap bage pe kerna kerina si lakokenna, itulis bas buku sejarah raja-raja Israel.
32 Lalap terjadi perang antara Asa ras Baasa raja Israel.+
33 Bas tahun peteluken pemerentahen Asa raja Juda, Baasa anak Ahia jadi raja bas kerina daerah Israel janah lit 24 tahun dekahna ia merentah i Tirsa.+
34 Tapi terus lakokenna kai si jahat menurut Jahwe.+ Ikutkenna dalan Jerobeam bage pe dosana si erban kalak Israel pe ngelakoken dosa.+
Cataten i teruh
^ As. “Dibatana mereken lampu man Abiam.”
^ Kata enda bas bahasa Heber banci jadi lit hubungenna ras kata “tai” guna ncidahken perasan ciga ate.
^ As. “ingan-ingan si meganjang.”
^ Ntah “Bangunna mulihi.”
