1 Raja-Raja 16:1-34
16 Ngerana Jahwe man Jehu+ anak Hanani+ kerna Baasa, nina,
2 “Enggo Kuangkat kam arah abu janah Kuban kam jadi peminpin bangsaKu Israel.+ Tapi terus ikutkenndu dalan Jerobeam janah banndu bangsaKu ngelakoken dosa, si erban Aku merawa perban dosa-dosa kalak e.+
3 Emaka Kukernepken pagi Baasa ras keluargana, bagi si Kulakoken man keluarga Jerobeam+ anak Nebat.
4 Ise pe keluarga Baasa si mate bas kota, biang si manganisa. Ise pe si mate bas juma, perik-perik i langit si manganisa.”
5 Cerita si debanna kerna sejarah Baasa, kerna kai si lakokenna ras kehebatenna, itulis bas buku sejarah raja-raja Israel.
6 Dungna mate Baasa janah ikuburken i Tirsa.+ Anakna si nggantiken ia jadi raja, eme Ela.
7 Selain si e, enggo kataken Jahwe ka arah Jehu anak Hanani kerna penghakimenNa man Baasa bage pe man keluargana, sebap melala kel perbahanen jahat si lakokenna i lebe-lebe Jahwe. Perbahanenna e erban merawa kel Ia, bagi si lakoken keluarga Jerobeam. Selain si e, enggo ka bunuhna Nadap.*+
8 Bas tahun pe-26-ken pemerentahen Asa raja Juda, Ela anak Baasa jadi raja Israel i Tirsa. Dua tahun dekahna ia merentah.
9 Simri, pelayanna si minpin setengah pasuken si erkuda, ersekongkol ngelawan ia. Paksa si e, Ela sangana mabuk i rumah Arsa. Arsa e si ngawasi istana i Tirsa.
10 Masuk Simri, serangna Ela janah bunuhna.+ Kenca si e, Simri si nggantiken ia jadi raja. Si e terjadi bas tahun pe-27-ken pemerentahen Asa raja Juda.
11 Kenca ia jadi raja janah kundul bas tahtana, mis serangna kerina keluarga Baasa. La pediatna sekalak dilaki pe si tetap nggeluh, termasuk kade-kadena ntah pe teman-temanna.
12 Bage me Simri munuh kerina keluarga Baasa, bagi kata-kata Jahwe si enggo pesehNa arah Nabi Jehu kerna Baasa.+
13 Si e terjadi perban kerina dosa Baasa ras dosa Ela anakna. Ban kalak e Israel ngelakoken dosa si erban Jahwe Dibata Israel merawa perban berhala-berhala si la erguna si ban kalak e.+
14 Cerita si debanna kerna sejarah Ela bage pe kerina si lakokenna, itulis bas buku sejarah raja-raja Israel.
15 Bas tahun pe-27-ken pemerentahen Asa raja Juda, Simri jadi raja i Tirsa pitu wari dekahna. Paksa si e, lit pasuken prajurit si ngepung kota Gibeton+ eme kota kalak Pilisti.
16 Dungna begi pasuken si erkemah maka Simri enggo ersekongkol janah bunuhna ka raja. Emaka bas wari e, i perkemahen, kerina kalak Israel njadiken Omri+ eme peminpin pasuken guna jadi raja Israel.
17 Omri ras kerina kalak Israel si lit ras ia lawes arah Gibeton jenari kepung kalak e Tirsa.
18 Sanga idah Simri kota e enggo irebut, lawes ia ku menara si erbenteng si lit bas istana, jenari tutungna istana e janah mate ia tertutung.+
19 Si enda terjadi perban dosa Simri. Lakokenna kai si jahat iakap Jahwe alu ngikutken dalan Jerobeam janah banna kalak Israel pe ngelakoken dosa.+
20 Cerita si debanna kerna sejarah Simri bage pe kerna uga ia ersekongkol, itulis bas buku sejarah raja-raja Israel.
21 Paksa si e kalak Israel terbagi jadi dua. Lit si jadi pengikut Tipni anak Ginat si atena njadiken ia raja, janah lit ka si jadi pengikut Omri.
22 Tapi taluken pengikut Omri pengikut Tipni anak Ginat. Mate Tipni janah Omri si jadi raja.
23 Bas tahun pe-31-ken pemerentahen Asa raja Juda, Omri jadi raja Israel. Lit 12 tahun dekahna ia merentah. Enem tahun dekahna ia merentah i Tirsa.
24 Tukurna gunung Samaria arah Semer nari, ergana kira-kira 68 kilo* pirak janah bangunna kota bas gunung e. Gelarina kota si bangunna e Samaria,*+ bagi gelar si mpuna gunung e mbarenda eme Semer.
25 Terus lakoken Omri kai si jahat akap Jahwe, janah perbahanenna jahaten asangken kerina kalak si lit sope ia.+
26 Merawa kel banna Jahwe Dibata Israel alu ngikutken dalan-dalan Jerobeam anak Nebat janah banna kalak Israel pe ngelakoken dosa, eme erban berhala-berhala si la erguna.+
27 Cerita si debanna kerna sejarah Omri, kai si lakokenna bage pe kerna kehebatenna, itulis bas buku sejarah raja-raja Israel.
28 Dungna mate Omri janah ikuburken i Samaria. Anakna eme Ahap+ si nggantiken ia jadi raja.
29 Ahap anak Omri jadi raja Israel bas tahun pe-38-ken pemerentahen Asa raja Juda. Ahap anak Omri merentah Israel i Samaria+ 22 tahun dekahna.
30 Ahap anak Omri ngelakoken kai si jahat iakap Jahwe, janah perbahanenna jahaten asangken kerina kalak si lit sope ia.+
31 La akapna bias ngelakoken dosa bagi dosa-dosa Jerobeam+ anak Nebat. Buatna ka Isebel+ anak Etbaal raja Sidon+ jadi diberuna, layanina ka Baal+ janah sembahna.
32 Selain si e, bangunna ka ingan nutung* persembahen man Baal+ i rumah Baal si bangunna i Samaria.
33 Ban Ahap ka tiang si badia.*+ Buen perbahanen Ahap si erban Jahwe Dibata Israel merawa asangken kerina raja Israel sope Ahap.
34 Bas masa pemerentahen Ahap, bangun Hiel kalak Betel me kota Jeriho. Sanga banna pondasi kota e, mate Abiram anakna sintua. Sanga pasangna pintu-pintu gerbangna, mate Segup anakna singuda. Si e terjadi bagi kata-kata Jahwe si pesehNa arah Josua anak Nun.+
