1 Raja-Raja 17:1-24
17 Elia*+ kalak Tisbe si tading i Gileat+ ngerana man Ahap, nina, “Ersumpah aku i lebe-lebe Jahwe Dibata si nggeluh, Dibata Israel si kulayani, maka piga-piga tahun enda la pagi lit namur ntah pe udan adi la kin kusuruh lit.”+
2 Ngerana Jahwe man Elia, nina,
3 “Tadingken ingan enda, laweslah kam ku sebelah timur, cebunilah kam i Lembah Kerit* si lit i sebelah timur Lau Jordan.
4 Minemlah kam arah lau maler si lit i je, janah Kusuruh pagi burung gagak maba panganndu ku je.”+
5 Mis ia lawes janah lakokenna bagi si kataken Jahwe ndai. Lawes ia janah tading ia i Lembah* Kerit i sebelah timur Lau Jordan.
6 Tiap pagi-pagi ras karaben baba burung gagak roti ras daging man bana, janah minem ia arah lau maler si lit i je.+
7 Tapi piga-piga wari kenca e, kerah lau e+ perban la reh udan bas negri e.
8 Kenca si e, ngerana Jahwe man Elia, nina,
9 “Laweslah kam ku Sarpat kota kalak Sidon, tadinglah kam i je. Kusuruh pagi sekalak janda si mereken pangan man bandu.”+
10 Emaka lawes ia ku Sarpat. Kenca seh ia i gerbang kota, lit i je sekalak janda sangana muat ranting. Emaka lebuh Elia ia nina, “Enta sitik lau gelah minem aku.”+
11 Sanga lawes ia guna muat lau e, nina Elia ka, “Babandu ka min sepotong roti man bangku.”
12 Nina diberu e, “Ersumpah aku i lebe-lebe Jahwe Dibatandu si nggeluh maka labo lit rotiku. Sengkerauk tepung ngenca lit bas mangkok si galang, janah sitik ngenca minak bas mangkok si kitik.+ Gundari aku sangana mpepulung ranting, jenari mulih kari aku janah kuban pangan man bangku bage pe man anakku. E pangan kami si terakhir, kenca si e mate kami.”
13 Nina Elia man bana, “Ula kam kuatir. Mulihlah kam. Ban kari bagi si katakenndu ndai. Tapi sope banndu pangan man bandu bage pe man anakndu, ban lebe roti si kitik man bangku, jenari bereken man bangku.
14 Sebap enda si kataken Jahwe Dibata Israel, ‘Tepung si lit bas mangkok si galang e labo kari keri, minak si lit bas mangkok si kitik e pe labo kari keri seh asa iban Jahwe nusur udan ku taneh enda.’”+
15 Lawes diberu e janah lakokenna bagi si kataken Elia. Emaka arah wari ku wari, lalap lit pangan diberu e, keluargana, bage pe Elia.+
16 Tepung si lit bas mangkok si galang la keri-keri. Minak si lit bas mangkok si kitik pe la keri-keri. Terjadi me bagi kata-kata Jahwe si pesehNa arah Elia.
17 Kenca si e kerina, sakit anak diberu si mpuna rumah e. Sakitna reh parahna janah dungna mate.+
18 Emaka nina diberu e man Elia, “O dilaki si isuruh Dibata si benar, engkai maka bagenda banndu bangku?* Guna ngingetken salahku ras munuh anakku saja kin atendu reh?”+
19 Nina Elia man bana, “Enta anakndu ena.” Kenca si e, buatna anak e bas ampun mamakna nari janah babana ku loteng ingan Elia tading, jenari amparkenna bas ingan medemna.+
20 Erlebuh ia man Jahwe, nina, “O Jahwe Dibataku,+ bas rumah janda enda kel aku tading, engkai maka banNdu ia ngenanami kiniseran alu mpediat anakna mate?”
21 Kenca si e, dakepna anak e telu kali, janah erlebuh ia man Jahwe, nina, “O Jahwe Dibataku, mindo aku, banlah anak enda nggeluh mulihi.”
22 Begiken Jahwe pemindon Elia,+ janah nggeluh anak e mulihi.+
23 Baba Elia anak e arah loteng nari janah berekenna man mamakna. Nina Elia, “Nen, anakndu enggo nggeluh mulihi.”+
24 Emaka nina diberu e man Elia, “Gundari enggo kuteh maka kam tuhu-tuhu dilaki si isuruh Dibata,+ janah tuhu kap kata-kata Jahwe si pesehndu.”
Cataten i teruh
^ Ertina “Jahwe kap Dibataku.”
^ Ntah “Lau Kerit.”
^ Ntah “kai kin si enggo kulakoken man bandu?”
