1 Raja-Raja 18:1-46
18 Bas tahun peteluken,+ nina Jahwe man Elia, “Laweslah kam, cidahken dirindu man Ahap. Kupenusur pagi udan ku datas taneh.”+
2 Emaka jumpai Elia me Ahap. Paksa si e, terjadi kelihen si parah+ bas Samaria.
3 Lebuh Ahap me Obaja, eme pengurus istana. Obaja mbiar kel man Jahwe.
4 Sanga bunuh Isebel+ nabi-nabi Jahwe, buniken Obaja 100 nabi. Banna 50 nabi bas tiap sada gua, jenari berekenna pangan* ras inemen man kalak e.
5 Emaka nina Ahap man Obaja, “Laweslah kam ku kerina mata lau bage pe ku kerina lembah* bas negri enda. Banci saja sidat kari dukut gelah bias man kuda-kuda bage pe man bagal,* gelah ula mate kerina asuh-asuhen e.”
6 Emaka bagi kalak e daerah-daerah bas negri e guna idahi kalak e. Ahap lawes ku arah jenda janah Obaja lawes ku arah jah, la seri perdalanen kalak e.
7 Sanga Obaja bas perdalanen, jumpa ia ras Elia. Mis tandaina Elia janah sujud ia man bana, nina, “Kam kin e, Tuanku Elia?”+
8 Nina Elia, “Ue, aku. Laweslah kam, kataken man tuanndu, ‘Elia sangana i jenda.’”
9 Tapi nina, “Kai kin dosaku maka serahkenndu aku man Ahap gelah ibunuhna?
10 Ersumpah aku i lebe-lebe Jahwe Dibatandu si nggeluh, maka enggo darami tuanku Ahap kam bas kerina bangsa ras kerajan. Sanga ning kalak e, ‘La ia lit i jenda,’ suruhna bangsa ras kerajan e ersumpah maka tuhu-tuhu la jumpaina kam.+
11 Gundari nindu, ‘Laweslah, kataken man tuanndu, “Elia sangana i jenda.”’
12 Lawes kenca kari aku, baba kesah si badia Jahwe kari kam+ ku ingan si la kuteh. Kenca kukataken kari man Ahap tapi la idahna kam, pasti bunuhna kari aku. Ingetlah, kitik-kitikku nari mbiar aku man Jahwe.
13 O Tuanku, lenga kin begindu kerna kai si kulakoken sanga bunuh Isebel nabi-nabi Jahwe? Lenga kin begindu kerna uga aku muniken 100 nabi janah kuban 50 nabi Jahwe bas tiap sada gua, jenari kubereken pangan ras inemen man kalak e?+
14 Tapi gundari nindu, ‘Laweslah, kataken man tuanndu, “Elia sangana i jenda.”’ Pasti kari aku bunuhna.”
15 Tapi nina Elia, “Ersumpah aku i lebe-lebe Jahwe si nggeluh eme penguasa malekat, Dibata si kulayani,* kujumpai Ahap bas wari enda.”
16 Emaka lawes Obaja njumpai Ahap janah pesehna kerna si e man Ahap. Jenari lawes Ahap njumpai Elia.
17 Kenca Ahap ngidah Elia, nina man bana, “Endam kalakna si erban Israel kena bencana.”
18 Nina Elia, “Labo aku si erban Israel kena bencana, tapi kam ras keluarga bapakndu, sebap la patuhi kena perentah Jahwe janah ikutken kena Baal.+
19 Gundari suruhlah kerina kalak Israel pulung ras aku i Gunung Karmel,+ bage ka pe 450 nabi Baal ras 400 nabi si nembah tiang si badia,*+ si man i meja Isebel.”
20 Emaka kirim Ahap pesan man kerina kalak Israel janah pepulungna nabi-nabi e i Gunung Karmel.
21 Tedis Elia i lebe-lebe jelma si pulung e, nina, “Ngasa ndigan kena lalap ragu?*+ Adi Jahwe kin Dibata si benar, ikutken Ia.+ Tapi adi Baal kin, ikutken ia!” La lit sekalak pe si njawapsa.
22 Nina Elia ka, “Aku nari ngenca nabi Jahwe si tading,+ tapi nabi Baal lit 450 kalak.
23 Babalah dua lembu jantan si nguda denga. Suruhlah ipilih nabi-nabi Baal e sada lembu e, gelah ipotong-potong kalak e janah tamakenna i datas ranting, tapi la banci tutung kalak e alu api. Aku pe kusikapken ka lembu si sada nari, kutamaken ka i datas ranting, janah la kututung alu api.
24 Dung e, arus lebuh nabi-nabi Baal gelar dibatana,+ aku pe kulebuh gelar Jahwe. Dibata si njawap alu api, e me Dibata si benar.”+ Ngaloi kerina kalak si pulung e, nina, “Cocok si katakenndu ena.”
25 Emaka nina Elia man nabi-nabi Baal, “Pilih kena sada arah lembu jantan si nguda e, kena lebe si nikapkenca perban teremen kena. Kenca si e, lebuh gelar dibata kena, tapi la banci tutung kena lembu e alu api.”
26 Emaka buat kalak e lembu si enggo pilihna, sikapkenna, jenari terus lebuh kalak e gelar Baal mulai pagi-pagi nari seh ciger, janah nina, “O Baal, aloi kami!” Tapi la lit sora janah la lit si ngaloisa.+ Terus kelilingi kalak e ingan nutung* persembahen si banna janahna lompat-lompat.
27 Kenca ciger mulai tokohi Elia kalak e, nina, “Tergangen ban sora kena! Me dibata ia!+ Mungkin sangana lit si man ukurenna, ntah sangana ia buang air besar.* Ntah sangana ia medem, janah arus lit si medaki ia!”
28 Reh gangna kalak e erlebuh janah sayat-sayati kalak e dagingna alu piso ras tombak, bagi kebiasan kalak e, seh asa maleren dareh kalak e.
29 Enggo pe lewat ciger, lalap la terkuasai kalak e dirina* seh asa karaben, eme waktu guna mpersembahken persembahen pangan.* Tapi la lit sora janah la lit si ngaloisa, la diate Baal kalak e.+
30 Dungna nina Elia man kalak e kerina, “Mari terdeheren ku jenda.” Emaka kerina kalak e ndeheri ia. Kenca si e, pesikap kalak e ingan nutung persembahen Jahwe si enggo runtuh.+
31 Buat Elia 12 batu menurut jumlah suku anak-anak Jakup, eme kalak si enggo pernah ikataken Jahwe man bana, “Gelarndu enggo jadi Israel.”+
32 Susunna batu-batu jadi ingan nutung persembahen+ guna gelar Jahwe. Kenca si e, kurakna parik i sekeliling ingan nutung persembahen e. Bas parik e siat isuan 10 kilo* benih.
33 Kenca si e susunna ranting-ranting, potongna lembu jantan si nguda e, jenari tamakenna ku datas ranting e.+ Dung e nina, “Isilah lau ku empatna ingan lau si galang e, amburken lau e ku persembahen tutungen bage pe ku ranting-ranting e.”
34 Kenca si e nina, “Ban ka sekali nari.” Emaka ban kalak e sekali nari. Nina ka, “Ban ka bage petelu kaliken.” Emaka ban kalak e petelu kaliken.
35 Maler lau e ku sekeliling ingan nutung persembahen, janah isina ka parik e alu lau.
36 Sanga karaben, eme waktu guna mpersembahken persembahen pangan,+ deheri Nabi Elia ingan nutung persembahen janah nina, “O Jahwe Dibata Abraham,+ Dibata Isak,+ ras Dibata Israel, bas wari enda teh kalak min maka Kam Dibata bas Israel janah aku enda budakNdu, kerina si kulakoken enda perban perentahNdu kap.+
37 Aloi min aku, o Jahwe! Aloi aku, gelah iteh kalak enda maka Kam Jahwe Dibata si benar, janah gelah banci ulihkenNdu pusuh kalak e man baNdu.”+
38 Emaka penusur Jahwe api arah datas nari janah pan api e persembahen tutungen,+ ranting-ranting, batu-batu, abu, bage pe lau si lit bas parik e.+
39 Sanga kerina kalak e ngidah si e, minter kalak e sujud, janah nina, “Jahwe kap Dibata si benar! Jahwe kap Dibata si benar!”
40 Kenca si e nina Elia man kalak e, “Tangkap nabi-nabi Baal! Ula pediat sada pe kiam!” Emaka minter tangkap kalak e nabi-nabi Baal e, janah baba Elia kalak e ku Lau* Kison,+ jenari bunuhna kalak e i je.+
41 Nina Elia man Ahap, “Laweslah kam, man kam ras minem, sebap enggo terbegi sora udan si meder.”+
42 Sanga lawes Ahap guna man ras minem, nangkih Elia ku datas Gunung Karmel janah sujud ia i taneh, ayona lit i antara tiwenna.+
43 Kenca si e nina man pelayanna, “Nangkihlah kam janah nen ku laut.” Emaka lawes ia ngenenca janah nina, “La lit kai pe.” Seh ngayak pitu kali kataken Elia, “Cuba nen ka mulihi.”
44 Kenca pepitu kaliken, nina pelayanna, “Lit embun si kitik nangkih arah laut nari, bagi tapak tan jelma.” Emaka nina Elia, “Kataken man Ahap, ‘Sikapken geretandu! Laweslah kam gelah ula kam itahan udan!’”
45 Gelap langit iban embun, angin pe rembus, janah nusur udan si meder.+ Terus nangkihi Ahap geretana seh ku Jesreel.+
46 Tapi bereken Jahwe gegeh man Elia, janah iketken Elia jubahna ku awakna jenari kiam ia ngelebei Ahap seh ku Jesreel.
Cataten i teruh
^ As. “roti.”
^ Keturunen kelede jantan ras kuda beruna.
^ As. “si i lebe-lebeNa aku tedis.”
^ As. “kena mengkah-engkah erdalan i datas dua pendapat si la seri.”
^ Ntah banci saja “sangana bas perdalanen.”
^ Ntah “lalap perbahanen kalak e bagi nabi-nabi.”
