1 Raja-Raja 19:1-21
19 Ceritaken Ahap+ man Isebel+ kerina si lakoken Elia, bage pe uga Elia munuh kerina nabi-nabi alu pedang.+
2 Emaka suruh Isebel kalak mpeseh pesan man Elia, nina, “Pagi bas waktu si bagenda ka, kuban kam bagi nabi-nabi si enggo ibunuhndu! Adi lang, pediatlah dibataku si ngukum aku alu mberat.”
3 Mbiar Elia janah kiam ia nelamatken diri.+ Sanga seh ia i Berseba+ daerah Juda,+ tadingkenna pelayanna i je.
4 Erdalan ia sada warin ku taneh mesawang,* jenari kundul ia i teruh batang perdu janah pindona gelah mate saja ia, nina, “Enggo bias! O Jahwe, gundari buatlah kesahku!+ Ulin nini bulangku asangken aku.”
5 Kenca si e, tayang ia janah terpedem i teruh batang perdu e. Rempet lit sada malekat ngkuit ia+ janah nina, “Medakken, iah man kam.”+
6 Idahna i deher takalna lit roti si kibul i das batu-batu si melas, bage pe ingan minem si risiken lau. Emaka man ia ras minem, jenari tayang ia mulihi.
7 Kenca si e, reh ka malekat Jahwe pedua kaliken, kuitna ia, nina, “Medakken, iah man kam, perdalanen enda ndauhsa man bandu janah mberatsa.”
8 Emaka medak ia, man ia ras minem. Pangan e mereken gegeh si cukup man bana guna erdalan 40 wari 40 berngi ngasa seh ia i Gunung Sinai,* eme gunung Dibata si benar.+
9 Jenari, masuk ia ku gua,+ erberngi ia i je. Ngerana Jahwe man bana, nina, “Engkai maka kam i jenda, Elia?”
10 Nina Elia, “Sedekah enda semangat kel aku guna Dibata Jahwe penguasa malekat.+ Tapi enggo langgar kalak Israel perjanjinNdu,+ enggo runtuhkenna ingan-ingan nutung* persembahenNdu, janah enggo bunuhna nabi-nabiNdu alu pedang.+ Aku nari ngenca si tading. Gundari, darami kalak e aku, bunuhna tena aku.”+
11 Nina Dibata, “Ndaratlah kam janah tedislah i das gunung i lebe-lebe Jahwe.” I je Jahwe sangana lewat,+ janah rembus angin si megegeh si erban gunung-gunung terbelah janah ngancurken tebing-tebing i lebe-lebe Jahwe,+ tapi Jahwe la lit bas angin si megegeh e. Kenca rembus angin si megegeh e, lit ka gempa,+ tapi Jahwe la lit bas gempa e.
12 Kenca gempa, lit api,+ tapi Jahwe la lit bas api e. Kenca api, lit sora si lembut janah la megang.+
13 Kenca begi Elia sora e, mis tutupna ayona alu jubahna,+ jenari ndarat ia janah tedis ia i babah gua e. Kenca si e, lit sora si ngataken, “Engkai maka kam i jenda, Elia?”
14 Nina Elia, “Sedekah enda semangat kel aku guna Dibata Jahwe penguasa malekat. Tapi enggo langgar kalak Israel perjanjinNdu,+ enggo runtuhkenna ingan-ingan nutung persembahenNdu, janah enggo bunuhna nabi-nabiNdu alu pedang. Aku nari ngenca si tading. Gundari, darami kalak e aku, bunuhna tena aku.”+
15 Nina Jahwe man bana, “Mulihlah kam, janah lawes kam ku taneh mesawang* i Damaskus. Kenca seh kam i je, lantik Hasael+ jadi raja Siria.
16 Jenari lantik Jehu+ kempu Nimsi jadi raja Israel. Lantik ka Elisa* anak Sapat arah Abil Mehola jadi nabi si nggantiken kam.+
17 Ise pe si pulah arah pedang Hasael,+ Jehu si munuhsa.+ Ise pe si pulah arah pedang Jehu, Elisa si munuhsa.+
18 Bas Israel lit denga 7.000 kalak+ si la sujud+ ras la ngema Baal.”+
19 Lawes Elia i je nari, janah idahna Elisa anak Sapat. Elisa sangana mbajak. Lit 12 pasang lembu jantan i lebe-lebena, janah tedis ia i pudi pasangen lembu si pe-12-ken. Emaka jumpai Elia me Elisa janah pakekenna jubahna+ man bana.
20 Tadingken Elisa lembu-lembu e, ayakina Elia janah nina, “Pediatlah kuema lebe bapakku ras mamakku, jenari kuikutken kari kam.” Nina Elia, “To dage. Labo lit alasenku ngelarang kam.”
21 Kenca si e, mulih Elisa janah buatna dua lembu jantan, jenari korbankenna. Banna alatna mbajak jadi ranting guna nanggerken daging lembu e. Jenari berekenna daging e ku kalak, janah man kalak e. Kenca si e lawes ia janah ikutkenna Elia. Emaka mulai Elisa ngelayani Elia.+
Cataten i teruh
^ Taneh si mbelang si jarang iingani.
^ Ntah “Gunung Horep.”
^ Taneh si mbelang si jarang iingani.
^ Ertina “Dibata kap Keselamaten.”
