1 Raja-Raja 2:1-46
2 Sanga Daud nandangi mate, berekenna petunjuk-petunjuk man Salomo anakna,
2 “Ntisik nari mate me aku. Emaka arus kam megegeh+ janah perpang.+
3 Patuhilah Jahwe Dibatandu alu erdalan bas dalan-dalanNa. Patuhilah peraturenNa, perentahNa, undang-undangNa, ras pengingetNa si tertulis bas Undang-Undang Musa.+ Alu bage, ku japa pe kam lawes, berhasil kam bas kerina si dahikenndu.
4 Tepati Jahwe pagi janjiNa man bangku, janjiNa eme, ‘Adi erdalan anak-anakndu bas dalan-dalanKu alu setia, alu bulat ukur ras asa gegehna,+ keturunenndu pagi si lalap kundul bas tahta Israel.’+
5 “Kam pe tehndu kai si enggo lakoken Joap anak Seruya man bangku, bage pe man dua peminpin pasuken Israel eme Abner+ anak Ner ras Amasa+ anak Jeter. Bunuh Joap kalak e amin pe la lit perang. Alu dareh kalak e,+ kotor banna ikat pinggangna ras selopna.
6 Pentar min perbahanenndu janah ula pediat perban enggo metua maka ia mate.*+
7 “Tapi man anak-anak Barsilai+ kalak Gileat, arus buktikenndu kekelengenndu si setia. Kalak e arus ikut man bas mejandu, sebap sampati kalak e aku+ sanga kiam arah Absalom seninandu.+
8 “Lit ka Simei anak Gera kalak Benyamin arah Bahurim nari. Sumpahina aku alu kejam+ sanga lawes aku ku Mahanaim.+ Tapi sanga jumpaina aku bas Lau Jordan, ersumpah aku man bana bas gelar Jahwe, ningku, ‘Labo kari kam kubunuh alu pedang.’+
9 Tapi gundari, hukumlah ia,+ sebap kam kalak si pentar janah tehndu kai si arus ilakoken man bana. Ula pediatndu perban enggo metua maka ia mate.”*+
10 Kenca si e, mate Daud janah ikuburken ia bas Kota Daud.+
11 Lit 40 tahun dekahna Daud merentah Israel: bas Hebron+ 7 tahun janah bas Jerusalem 33 tahun.+
12 Kundul Salomo bas tahta Daud bapakna, janah kerajanna terus reh paguhna.+
13 Bas sada wari, reh Adonia anak Hagit njumpai Batseba mamak Salomo. Nungkun Batseba, “Me mehuli nge tujunndu reh?” Ijawap Adonia, “Ue, mehuli.”
14 Nina Adonia, “Lit ateku si kukataken man bandu.” Nina Batseba, “Katakenlah.”
15 Nina Adonia, “Itehndu maka aku nge si arusna jadi raja, janah kerina kalak Israel ngarapken si e.+ Tapi si jadi raja eme seninaku, sebap Jahwe si merekenca man bana.+
16 Gundari, sada ngenca si kupindo man bandu. Ula min tulakndu pemindonku e.” Nina Batseba, “Kataken dage.”
17 Nina Adonia, “Pindo min man Raja Salomo, gelah berekenna man bangku Abisah+ kalak Sunem jadi diberuku, sebap kuteh labo ia nggit nulak kam.”
18 Megi si e, nina Batseba, “Ue yah. Kucakapken kari ras raja.”
19 Emaka masuk Batseba njumpai Raja Salomo guna ncakapken pemindon Adonia. Mis tedis raja njumpai ia janah mungkuk ia man bana. Kenca si e, kundul raja bas tahtana janah suruhna kalak erban tahta man mamakna, gelah banci ia kundul i sebelah kananna.
20 Nina Batseba, “Lit sada pemindonku man bandu janah e la mesera, ula min tulakndu.” Emaka nina raja, “Kataken saja Mak, labo kari kutulak.”
21 Nina Batseba, “Bereken min Abisah kalak Sunem e jadi diberu seninandu Adonia.”
22 Nina Raja Salomo, “Engkai maka pindondu gelah kubereken Abisah kalak Sunem e man Adonia? Adi e si pindondu, pindo ka gelah ia jadi raja,+ sebap ia abangku,+ janah Imam Abiatar ras Joap+ anak Seruya pe ndukung ia.”+
23 Emaka ersumpah Raja Salomo bas gelar Jahwe, nina, “Mbera-mbera ihukum Dibata aku janah tambahiNa hukumen e, adi la kin mate Adonia perban pemindonna enda.
24 Dibata enggo netapken aku alu paguh+ bas tahta kerajan bapakku Daud. Enggo berekenNa kerajan enda man bangku+ bagi si enggo janjikenNa. Ersumpah aku i lebe-lebe Jahwe si nggeluh maka bas wari enda Adonia arus mate.”+
25 Mis perentahken Raja Salomo man Benaya+ anak Joyada guna munuh Adonia. Emaka lawes Benaya munuhsa, dungna mate Adonia.
26 Ikataken raja man Imam Abiatar,+ “Laweslah kam ku kutandu* i Anatot!+ Situhuna kam patut mate. Tapi bas wari enda la kam kubunuh perban enggo babandu Peti Perjanjin* Jahwe Tuhan Si Meganjangna i lebe-lebe Daud bapakku,+ janah kerina kesusahen si inanami bapakku ikut kam ngenanamisa.”+
27 Ipelawes Salomo me Abiatar, emaka lanai ia ngelayani jadi imam Jahwe, gelah terjadi kata-kata Jahwe i Silo+ kerna keluarga Eli.+
28 Amin pe Joap la ndukung Absalom,+ tapi sedekah enda enggo dukungna Adonia.+ Emaka sanga begi Joap kerna kai si terjadi, kiam ia ku kemah Jahwe+ janah tagangina tanduk-tanduk si lit bas ingan nutung* persembahen.
29 Kenca si e, lit si ngelapor man Raja Salomo, nina, “Joap enggo kiam ku kemah Jahwe, janah ia sangana i samping ingan nutung persembahen.” Emaka suruh Salomo me Benaya, nina, “To bunuh ia!”
30 Lawes Benaya ku kemah Jahwe janah nina, “Enda si ikataken raja, ‘Ndaratlah kam!’” Tapi nina Joap, “Lang, jenda teku mate.” Emaka mulih Benaya ndahi raja janah pesehna kai si ikataken Joap.
31 Kenca si e, nina raja, “Lakokenlah bagi si katakenna. Bunuh ia jenari kuburken. Alu bage, aku ras keluarga bapakku la ikut ertanggung jawap nandangi dareh si enggo iamburken Joap.+
32 Ibalas Jahwe ia perban dareh si iamburkenna. Sebap la iteh bapakku Daud maka enggo serangna janah ibunuhna alu pedang dua kalak si lebih benar ras si ulin asangken ia. Si ibunuh Joap e eme Abner+ anak Ner, ia peminpin pasuken Israel+ janah Amasa+ anak Jeter, ia peminpin pasuken Juda.+
33 Joap ras keturunenna arus ertanggung jawap nandangi kematen si ibanna seh rasa lalap.+ Tapi Daud, keturunenna, keluargana, bage pe kerajanna* mbera-mbera ndatken kedamen arah Jahwe seh rasa lalap.”
34 Kenca si e, lawes Benaya anak Joyada guna nyerang janah munuh Joap. Jenari Joap ikuburken i deher rumahna i taneh mesawang.*
35 Ipilih raja me Benaya+ anak Joyada nggantiken Joap jadi peminpin pasuken, janah ipilih raja ka Sadok+ nggantiken Abiatar jadi imam.
36 Kenca si e, lebuh raja me Simei,+ nina, “Banlah rumahndu i Jerusalem, janah tadinglah kam i je. Ula kam ndarat arah kota e nari janah ula kam lawes ku ingan si deban.
37 Adi ndarat kam janah sebrangindu Lembah Kidron,+ pasti kam mate, janah kam sendiri si ertanggung jawap nandangi darehndu.”
38 Nina Simei man raja, “Cocok kap si katakenndu e. Pasti kulakoken tepat bagi si katakenndu, Raja.” Emaka ndekah Simei tading i Jerusalem.
39 Tapi kenca telu tahun, dua kalak budak Simei kiam nadingken ia janah lawes kalak e ndahi Akis+ anak Maaka raja Gat. Sanga iteh Simei maka budakna lawes ku Gat,
40 mis ipasang Simei pelana keledena janah lawes ia ndahi Akis i Gat guna ndarami budak-budakna. Sanga mulih Simei ras budak-budakna,
41 lit si ngelapor man Salomo, nina, “Enggo ndarat Simei arah Jerusalem nari janah lawes ia ku Gat, tapi gundari enggo mulih ia.”
42 Megi si e, ilebuh raja me Simei janah nina, “La kin enggo kusuruh kam ersumpah bas gelar Jahwe janah kupersingeti kam, ‘Adi ndarat kam arah kota e janah lawes kam ku ingan si deban, pasti kam mate’? Janah la kin nindu man bangku, ‘Cocok kap si katakenndu e, pasti nge kulakoken’?+
43 Dage, engkai maka langgarndu sumpahndu man Jahwe janah la kam patuh man perentah si kubereken man bandu?”
44 Kenca si e, nina raja man Simei, “Pasti tehndu kerina kejahaten si enggo lakokenndu man bapakku Daud.+ Balas Jahwe kam perban kejahaten e.+
45 Tapi ipasu-pasu Jahwe kari aku*+ janah banNa tahta Daud paguh seh rasa lalap.”
46 Emaka perentahken raja me Benaya anak Joyada gelah munuh Simei, emaka mate Simei.+
Paguh kerajan e bas tan Salomo.+
Cataten i teruh
^ As. “jumandu.”
^ Ntah “Peti Perpadanen.”
^ Ntah “tahtana.”
^ Taneh si mbelang si jarang iingani.
^ Ntah “Raja Salomo.”
