1 Raja-Raja 20:1-43
20 Benhadat+ raja Siria+ mpepulung kerina pasukenna ras 32 raja si debanna bage pe kuda ras gereta perang kalak e. Jenari kepung kalak e+ Samaria+ janah erperang kalak e ngelawan kota e.
2 Kenca si e, suruhna kalak mpeseh pesan man Ahap+ raja Israel i kota e, nina, “Bagenda nina Benhadat,
3 ‘Jangku kap pirakndu ras emasndu, bage pe diberu-diberundu si mejilena ras anak-anakndu si dilaki si gantengna.’”
4 Nina raja Israel, “Bagi si katakenndu Tuanku Raja, aku ras kerina si lit bas aku jangndu kap.”+
5 Reh ka mulihi kalak si isuruh ndai njumpai Ahap, janah nina, “Bagenda nina Benhadat, ‘Enggo kukataken pesan enda man bandu, “Bereken man bangku pirakndu, emasndu, diberu-diberundu, ras anak-anakndu si dilaki.”
6 Tapi pagi kira-kira bas waktu si bagenda, kusuruh pelayan-pelayanku ndahi kam nggargari istanandu ras rumah pelayan-pelayanndu. Buat kalak e kari kerina si merga si lit bas kam jenari babana.’”
7 Lebuh raja Israel kerina peminpin negri e, janah nina, “Teh kena kin, susahi dilaki e atena kita. Enggo pindona diberu-diberuku, anak-anakku si dilaki, pirakku, ras emasku, janah la kutulak pemindonna e.”
8 Kerina peminpin ras jelma si enterem e ngataken, “Ula patuhi ia, janah ula kam nggit.”
9 Emaka nina raja man kalak si isuruh Benhadat, “Kataken man tuanku raja, ‘Kerina pemindonndu si pertama si pesehndu arah pelayanndu, kubereken. Tapi si enda la aku nggit ngelakokenca.’” Mulih kalak si isuruh ndai janah pesehna pesan e man Benhadat.
10 Kirim Benhadat ka pesan enda man bana, “Reh kari aku ras pasukenku si mbelin guna ngancurken kota Samaria. Pediatlah hukum dibata-dibata aku alu mberat, adi bias denga abu si tading bas kota Samaria ndemi tan tiap pengikutku.”
11 Emaka nina raja Israel, “Kataken man bana, ‘Kalak si nandangi erperang arusna la sombong bagi kalak si tempa-tempa enggo menang.’”+
12 Begi Benhadat pesan e sanga ia ras raja-raja si debanna sangana minem-minem i kemah* kalak e. Mis katakenna man pelayan-pelayanna, “Ersikaplah guna erperang!” Emaka ersikap kalak e nyerang kota e.
13 Lit sekalak nabi njumpai Ahap+ raja Israel, nina, “Bagenda nina Jahwe, ‘Nenlah pasuken si mbelin e. Bas wari enda, Kuban kari talukenndu kalak e, janah i je kari maka tehndu Aku kap Jahwe.’”+
14 Nungkun Ahap, “Uga carana?” Nina, “Bagenda nina Jahwe, ‘Alu penampat anak buah gubernur-gubernur.’” Nungkun ka Ahap, “Ise si leben nyerang?” Nina, “Kam!”
15 Ikira Ahap anak buah gubernur-gubernur, buena lit 232 kalak. Kenca si e, hitungna kerina pasuken Israel, buena lit 7.000 kalak.
16 Lawes kalak e sanga ciger wari. Paksa si e Benhadat ras 32 raja si nampati ia sangana mabuk-mabuk bas kemah.
17 Anak buah gubernur-gubernur si leben ndarat arah kota e. Kenca ndarat kalak e, mis suruh Benhadat kalak ngenen kai si terjadi, janah laporken kalak e, “Lit kalak si ndarat arah Samaria nari.”
18 Emaka nina Benhadat, “La soal kalak e ndarat guna erdame ntah erperang, tangkap kalak e nggeluh-nggeluh.”
19 Tapi sanga anak buah gubernur-gubernur ras pasuken si ngikutken kalak e enggo ndarat arah kota,
20 mulai pasuken Israel munuh musuh-musuhna. Kiam kalak Siria,+ janah ayaki kalak Israel kalak e. Tapi Benhadat raja Siria banci nelamatken diri alu nangkih kuda ras piga-piga prajurit si erkuda.
21 Raja Israel pe maju janah terus talukenna prajurit si erkuda ras si ergereta, seh ngasa tuhu-tuhu talukenna kalak Siria.*
22 Kenca si e, reh nabi e+ njumpai raja Israel janah nina, “Laweslah, pegegehilah bandu, janah ukurilah kai si arus lakokenndu,+ sebap reh pagi raja Siria nyerang kam bas awal tahun si reh.”*+
23 Nina pelayan-pelayan raja Siria man bana, “Dibata kalak e Dibata pegunungen, e me sebapna taluken kalak e kita. Tapi adi erperang kita i dataren rendah, pasti banci sitaluken kalak e.
24 Selain si e, bas peperangen e ganti raja-raja e+ alu gubernur-gubernur.
25 Pepulunglah prajurit si seri buena ras prajurit si mate, bage pe kuda ras gereta kuda si seri buena. Mari silawan kalak e i dataren rendah, janah pasti kita menang.” Emaka begikenna nasehat e janah lakokenna.
26 Bas awal tahun* berikutna, pepulung Benhadat pasuken Siria janah lawes kalak e ku Apek+ guna nyerang Israel.
27 Pasuken Israel pe ipepulung janah iperlengkapi, jenari ndarat kalak e njumpai pasuken Siria. Sanga erkemah pasuken Israel i lebe-lebe pasuken Siria, pasuken Israel teridah bagi rarasen si kitik arah kambing-kambing, tapi pasuken Siria ndemi kerina daerah e.+
28 Kenca si e, reh sekalak pelayan Dibata si benar ndahi raja Israel, nina, “Bagenda nina Jahwe, ‘Perban enggo kataken kalak Siria, “Jahwe e Dibata pegunungen, labo Dibata taneh si rata,” Kuban kari talukenndu pasuken si mbelin e,+ i je kari maka teh kena Aku kap Jahwe.’”+
29 Pitu wari dekahna kalak e erkemah siala-alan. Bas wari si pepituken erperang kalak e. Lit 100.000 prajurit Siria si erdalan si taluken pasuken Israel bas sada wari e.
30 Prajurit Siria si tading kiam ku kota Apek.+ Tapi runtuh tembok kota e janah lit 27.000 kalak si dabuhina. Benhadat pe kiam janah masuk ku kota, dung e cebuni ia bas sada ruangen si arah bas.
31 Emaka nina pelayan-pelayanna man Benhadat, “Enggo begi kami maka raja-raja Israel perkuah kalakna. Emaka pediat kami lawes njumpai raja Israel alu ngiketken kain guni bas awak kami bage pe nali bas takal kami. Mbera-mbera pediatna kam nggeluh.”+
32 Emaka iketken kalak e kain guni bas awak kalak e bage pe nali bas takal kalak e. Kenca si e jumpai kalak e raja Israel, nina, “Bagenda nina budakndu Benhadat, ‘Mindo kel aku gelah pediatndu min aku nggeluh.’” Nina raja Israel, “Nggeluh denga kin ia? Seninaku kap ia.”
33 Mis akap kalak e maka si e tanda si mehuli janah minter kalak e tek, emaka nina kalak e, “Payo, seninandu kap Benhadat e.” Nina Ahap, “Baba ia ku jenda.” Emaka jumpai Benhadat ia, dung e suruhna Benhadat nangkih ku gereta.
34 Nina Benhadat man bana, “Kuulihken kota-kota si irebut bapakku arah bapakndu nari, janah banci banndu ingan-ingan erbinaga* i Damaskus bagi si iban bapakku i Samaria.”
Nina Ahap, “Perban perjanjin enda, kupediat kam lawes.”
Bage me Ahap erban perjanjin ras ia janah pediatna ia lawes.
35 Alu perentah Jahwe, lit sekalak arah keturunen nabi*+ ngerana man temanna, “Pekpek aku.” Tapi la nggit temanna e mekpeksa.
36 Emaka nina man temanna e, “Perban la begikenndu kata-kata Jahwe, kenca lawes kari kam jenda nari, bunuh* singa kam.” Kenca lawes temanna e, reh sada singa janah bunuhna temanna e.
37 Nina ka man kalak si deban, “Pekpek aku.” Emaka pekpek kalak ndai ia ngasa luka.
38 Lawes nabi e, nyamar ia, iperbanna matana. Kenca si e, timaina raja i tepi dalan.
39 Sanga lewat raja, serko ia, nina, “Tuan, sanga lawes aku ku ingan erperang, reh sekalak dilaki njumpai aku janah titipkenna sekalak dilaki man bangku, nina, ‘Jagai dilaki enda. Adi bene ia, kesahndu jadi gantina+ ntah arus galarindu kira-kira 34 kilo* pirak.’
40 Sanga sibuk aku ku jah ku je, bene dilaki ndai.” Emaka nina raja Israel man bana, “Bagena kam pagi ihukum, sebap kam ndai si ngatakenca.”
41 Minter buka nabi e perban arah matana, mis tandai raja maka ia sekalak nabi.+
42 Nina nabi e, “Bagenda nina Jahwe, ‘Perban pediatndu nggeluh kalak si Kukataken arus ibunuh,+ kam si arus mate nggantiken ia+ janah rakyatndu si nggantiken rakyatna.’”+
43 Mulih raja Israel ku Samaria,+ sedih kel kapna janah kecewa kel ia.
Cataten i teruh
^ Ntah “sapo.”
^ Ntah “seh ngasa enterem kel kalak Siria si bunuhna.”
^ Ntah “banci buatndu dalan-dalan.”
^ “Keturunen nabi” mungkin maksudna sekolah man nabi-nabi ntah kelompok nabi-nabi.
^ Ntah “serang.”
