1 Raja-Raja 21:1-29
21 Kenca si e kerina, lit persoalen kerna kebun anggur Nabot kalak Jesreel. Kebunna e lit i Jesreel,+ i sebelah istana Ahap raja Samaria.
2 Nina Ahap man Nabot, “Bereken min man bangku kebun anggurndu si lit i deher rumahku, kusuan ateku gulen-gulen* i je. Kubere kari man bandu kebun anggur si terjilen jadi gantina. Ntah adi nggit kam, kubere kari sen menurut erga kebunndu e.”
3 Tapi nina Nabot man Ahap, “La mungkin kubereken warisen arah nini bulangku man bandu, sebap e ilarang Jahwe.”+
4 Emaka mulih Ahap ku istanana, nembeh kel atena janah kecewa kel ia, sebap enggo kataken Nabot kalak Jesreel e man bana, “Labo kubereken warisen arah nini bulangku man bandu.” Kenca si e tayang ia bas ingan medemna, alakenna ku dingding janah la ia nggit man.
5 Reh Isebel diberuna,+ janah sungkunna ia, nina, “Engkai maka sedih kel kam janah la kam nggit man?”
6 Nina ngaloi, “Ningku man Nabot kalak Jesreel, ‘Kutukur ateku kebun anggurndu. Ntah, adi nggit kam, kubereken kebun anggur si deban jadi gantina.’ Tapi nina, ‘Labo kubereken kebun anggurku man bandu.’”
7 Nina Isebel man bana, “Raja Israel kap kam. Kekeken iah, man kam. Ula nai kam sedih. Aku kari si mereken kebun anggur Nabot kalak Jesreel e man bandu.”+
8 Emaka tulis Isebel surat-surat alu gelar Ahap, stempelna surat-surat e alu stempel raja.+ Kirimna surat e ku peminpin-peminpin+ bage pe bangsawan-bangsawan bas kota ingan tading Nabot.
9 Nina Isebel bas surat e, “Umumken gelah puasa, janah suruh Nabot kundul i lebe-lebe kerina jelma.
10 Kenca si e suruh dua kalak si pengangguren kundul i lebe-lebena janah ersaksi nentang ia,+ ‘Enggo sumpahindu Dibata ras raja!’+ Dung e baba ia ku darat kota janah benteri ia alu batu ngasa mate.”+
11 Emaka kalak si lit bas kota e, eme peminpin-peminpin ras bangsawan-bangsawan si tading i kota e, ngelakoken bagi si itulis Isebel bas surat si kirimkenna man kalak e.
12 Umumken kalak e puasa, janah suruh kalak e Nabot kundul i lebe-lebe kerina jelma.
13 Kenca si e reh dua kalak si pengangguren janah kundul kalak e i lebe-lebe Nabot. Dung e ersaksi kalak e nentang Nabot i lebe-lebe kerina kalak, nina, “Enggo sumpahi Nabot Dibata ras raja!”+ Emaka baba kalak e Nabot ku darat kota janah benterina alu batu ngasa mate.+
14 Dung e kirim kalak e pesan man Isebel, nina, “Nabot enggo ibenteri alu batu ngasa mate.”+
15 Kenca begi Isebel maka Nabot enggo ibenteri alu batu ngasa mate, mis katakenna man Ahap, “To, buat kebun anggur Nabot kalak Jesreel e,+ si la nggit ndayakenca man bandu, enggo lanai ia lit. Enggo mate ia.”
16 Kenca begi Ahap maka Nabot enggo mate, mis ia lawes ku kebun anggur Nabot kalak Jesreel e janah buatna kebun e jadi jangna.
17 Tapi ngerana Jahwe man Elia+ kalak Tisbe, nina,
18 “Dahilah Ahap raja Israel i Samaria.+ Ia sangana i kebun anggur Nabot guna muat kebun e jadi jangna.
19 Kataken man bana, ‘Bagenda nina Jahwe, “Kenca enggo bunuhndu sekalak dilaki,+ buatndu ka nge ertana?”’+ Kenca si e kataken bana, ‘Bagenda nina Jahwe, “I ja mbarenda biang ndilati dareh Nabot, i je ka pagi biang ndilati darehndu.”’”+
20 Nina Ahap man Elia, “Enggo datndu aku, musuhku!”+ Nina Elia, “Enggo, enggo kudat kam. Bagenda nina Dibata, ‘Perban lakokenndu* kai si jahat menurut Jahwe,+
21 Kuban pagi kam kena bencana, Kukernepken pagi kam. Kubunuh pagi kerina dilaki bas keluarga Ahap,+ termasuk si mesera ras si lemah bas Israel.+
22 Kuban pagi keturunenndu bagi keturunen Jerobeam+ anak Nebat bage pe bagi keturunen Baasa+ anak Ahia, sebap enggo banndu Aku merawa janah enggo banndu kalak Israel pe ngelakoken dosa.’
23 Bagenda nina Jahwe kerna Isebel, ‘Pangani biang pagi Isebel bas juma si lit i Jesreel.+
24 Ise pe keluarga Ahap si mate bas kota, biang si manganisa. Ise pe si mate bas juma, perik-perik i langit si manganisa.+
25 La lit ise pe si bagi Ahap,+ si meriah kel kapna* ngelakoken kai si jahat menurut Jahwe, perban pengaruh Isebel diberuna.+
26 Jahat kel perbahanenna e, sebap sembahna patung-patung berhala si ciga kel ate* Dibata. Perbahanenna e bagi perbahanen kalak Amori si ipelawes Jahwe i lebe-lebe kalak Israel.’”+
27 Kenca begi Ahap kata-kata e, mis rigatkenna uisna, pakena kain guni jenari erpuasa ia. Sanga tayang ia pakena kain guni, janah sanga erdalan ia teridah kel ia putus asa.
28 Emaka ngerana Jahwe man Elia kalak Tisbe, nina,
29 “Enggo nge idahndu uga Ahap mpeteruk dirina i lebe-lebeKu?+ Perban peterukna bana i lebe-lebeKu, labo sanga ia nggeluh Kuban bencana e terjadi, tapi bencana e terjadi man keturunenna bas jaman anakna si dilaki.”+
Cataten i teruh
^ Ntah “sayur-sayuren.”
^ As. “Perban enggo dayakenndu dirindu guna ngelakoken.”
^ As. “si ndayaken dirina guna.”
^ Kata enda bas bahasa Heber banci jadi lit hubungenna ras kata “tai” guna ncidahken perasan ciga ate.
