1 Raja-Raja 22:1-53
22 Lit telu tahun dekahna Siria ras Israel la erperang.
2 Bas tahun si peteluken, lawes Josapat+ raja Juda ndahi raja Israel.+
3 Kenca si e nina raja Israel man pelayan-pelayanna, “Teh kena nge Ramot i Gileat+ ah jangta? Engkai maka ragu kita muatsa arah raja Siria nari?”
4 Kenca si e, sungkunna Josapat, “Nggit kam lawes ras aku erperang bas Ramot i Gileat?” Nina Josapat man raja Israel, “Banci. Lawes kari aku ras kam ikut ras prajurit-prajuritku bage pe kuda-kudaku.”+
5 Tapi nina Josapat man raja Israel, “Sisungkunilah lebe+ kai nina Jahwe.”+
6 Emaka pepulung raja Israel kira-kira 400 nabi janah sungkunna kalak e, “Arus nge aku erperang ngelawan daerah Ramot i Gileat ntah lang?” Nina kalak e, “Laweslah, pasti serahken Jahwe kari kota e ku tanndu, Raja.”
7 Sungkun Josapat ka, “La kin lit nabi Jahwe i jenda? Sipindo ka lebe petunjuk Dibata arah ia.”+
8 Megi si e, nina raja Israel man Josapat, “Lit sekalak nari si banci sipindo petunjuk Jahwe arah ia.+ Gelarna Mikaya anak Imla. Tapi segat teku ia,+ sebap la pernah ramalkenna* si mehuli kerna aku, si la mehuli saja ngenca si katakenna.”+ Tapi nina Josapat, “Ula min bage nindu, Raja.”
9 Emaka lebuh raja Israel pegawai istana, nina, “Meter baba ku jenda Mikaya anak Imla.”+
10 Sanga si e, raja Israel bage pe Josapat raja Juda sangana bas ingan ngerik* i lebe-lebe gerbang Samaria. Kundul kalak e bas tahtana sekalak-sekalak make baju kerajan. Kerina nabi ngeramal* i lebe-lebe kalak e.+
11 Kenca si e, Sedekia anak Kenaana erban tanduk-tanduk arah besi nari janah nina, “Enda si kataken Jahwe, ‘Serang kena pagi Siria alu tanduk-tanduk enda seh ngasa mate kerina kalak e.’”
12 Kerina nabi si deban pe bage ka nina. Ning kalak e, “Laweslah ku daerah Ramot i Gileat, berhasil nge pagi kam. Bereken Jahwe pagi kota e ku tan raja.”
13 Kalak si isuruh ngelegi Mikaya ndai ngataken man Mikaya, nina, “Bagenda, kerina nabi ngataken kai si mehuli man raja. Emaka katakenndu ka min si mehuli bagi si kataken kalak e.”+
14 Tapi nina Mikaya, “Ersumpah aku i lebe-lebe Jahwe si nggeluh, kai pe si kataken Jahwe man bangku, e ka nge kari si kukataken.”
15 Kenca si e lawes Mikaya ngadap raja janah sungkun raja ia, nina, “O Mikaya, arus nge kami lawes nyerang daerah Ramot i Gileat ntah lang?” Minter Mikaya ngaloi, “Laweslah kam, berhasil nge pagi kam. Pasti serahken Jahwe pagi kalak e ku bas tan raja.”
16 Megi si e nina raja, “Piga kali arus kusuruh kam ersumpah gelah si benar ngenca katakenndu bas gelar Jahwe?”
17 Emaka nina Mikaya, “Kuidah kerina kalak Israel merap i gunung-gunung,+ bagi biri-biri si la lit permakanna. Nina Jahwe, ‘La lit tuan kalak e. Pediatlah kalak e mulih ku rumahna alu dame.’”
18 Kenca si e, nina raja Israel man Josapat, “Me enggo ndai kukataken man bandu, ‘Labo kari si mehuli ramalkenna* kerna aku, pasti si la mehuli.’”+
19 Jenari nina Mikaya, “Begikenlah kata-kata Jahwe enda: Kuidah Jahwe kundul bas tahtaNa,+ kerina pasuken surga tedis i deherNa, i sebelah kanan ras i sebelah kiriNa.+
20 Kenca si e, nungkun Jahwe, ‘Ise si nggit nipu Ahap, gelah lawes ia janah mate bas daerah Ramot i Gileat?’ Lit si ngataken bagenda, lit ka si ngataken bagah.
21 Jenari, lit sada malekat+ si maju ku lebe-lebe Jahwe, nina, ‘Aku kari si nipu ia.’ Sungkun Jahwe ka, ‘Uga banndu carana?’
22 Nina, ‘Lawes kari aku janah kuban kerina nabina erbual.’+ Emaka nina Dibata, ‘Laweslah kam janah lakoken bagi si katakenndu ndai. Berhasil nge kari kam.’
23 Emaka pediat Jahwe malekatNa erban kerina nabi-nabindu erbual,+ tapi situhuna enggo kataken Jahwe maka bencana nge pagi si terjadi man bandu.”+
24 Kenca bage, deheri Sedekia anak Kenaana me Mikaya, jenari parapna ayona, nina, “Akapmu kin kesah si badia Jahwe enggo nadingken aku, nce ngerana arah engko?”+
25 Nina Mikaya, “Tehndu nge kari sanga masuk kam ku bas ruangen si mbagesna kel guna cebuni.”
26 Jenari nina raja Israel, “Tangkap Mikaya, serahken ia man Amon peminpin kota, bage pe man Joas anak raja.
27 Kataken man kalak e duana, ‘Bagenda nina raja, “Penjaraken ia.+ Sitik saja bereken roti ras lau man bana seh ngasa mulih kari aku alu selamat.”’”
28 Jenari nina Mikaya, “Adi mulih kam alu selamat, e tandana Jahwe la ngerana arah aku nari.”+ Nina ka, “Man bandu kerina, ingetlah kai si enggo kukataken enda.”
29 Emaka lawes raja Israel ras Josapat raja Juda ku Ramot i Gileat.+
30 Nina raja Israel man Josapat, “Sanga lawes kari kita erperang, menyamar kari aku. Tapi kam, pake paken kerajanndu.” Emaka nyamar raja Israel+ janah masuk ku peperangen.
31 Enggo perentahken raja Siria man 32 peminpin pasukenna+ si ergereta, “Ula serang ise pe, la soal peminpinna ntah pe prajuritna. Raja Israel saja serang kena.”
32 Kenca peminpin-peminpin pasuken si ergereta e ngidah Josapat, ning kalak e, “Pasti ah raja Israel.” Emaka mutar kalak e nyerang Josapat. Serko Josapat mindo penampat.
33 Kenca sadar peminpin-peminpin si ergereta e maka ia labo raja Israel, mis lanai ayaki kalak e ia.
34 Tapi lit sekalak dilaki si asal-asalen manahken anak panahna, rembang kena raja Israel. Panah e engkenai raja arah salah sada celah baju perangna. Emaka nina raja e man kalak si maba geretana, “Mutar saja kita, ndarat kita arah peperangen e nari, enggo mekelek kel lukaku.”+
35 Perang e terjadi sada warin. Tapi raja arus isampati gelah banci ia tedis bas geretana janah pengalana ku kalak Siria. Bas gereta e, maleren darehna arah lukana, janah karabenna mate ia.+
36 Kira-kira sanga matawari terbenam, lit si megang ngerana man pasuken Israel, nina, “Mulih kena ku kota kena! Mulih kena ku negri kena!”+
37 Bage me raja Ahap mate, jenari ibaba ia ku Samaria janah ikuburken i je.
38 Sanga cuci kalak e gereta perang e i kolam Samaria, dilati biang dareh Ahap janah ridi pelacur-pelacur i je,* bagi si enggo ikataken Jahwe.+
39 Cerita si debanna kerna sejarah Ahap, kerina si lakokenna, bage pe kerna istana gading+ ras kerina kota si bangunna, itulis bas buku sejarah raja-raja Israel.
40 Kenca mate Ahap,+ anakna si nggantiken ia jadi raja eme Ahasia.+
41 Josapat+ anak Asa jadi raja Juda bas tahun peempatken pemerentahen Ahap raja Israel.
42 Josapat jadi raja sanga umurna 35 tahun, janah lit 25 tahun dekahna ia merentah i Jerusalem. Gelar mamakna Asuba anak Silhi.
43 Josapat lalap ngikutken kerina dalan Asa+ bapakna. La tadingkenna dalan e janah lakokenna kai si benar akap Jahwe.+ Tapi ingan-ingan ersembah* la ihancurken, janah lalap denga ipersembahken rakyat korban i je bage pe nutung korban gelah ku datas asapna.+
44 Josapat lalap dame ras raja Israel.+
45 Cerita si debanna kerna sejarah Josapat, bage pe kerna kehebatenna ras uga ia erperang, itulis bas buku sejarah raja-raja Juda.
46 Pelawes Josapat me kerina dilaki si jadi pelacur+ bas ingan-ingan ersembah si tading denga bas jaman Asa bapakna.+ Pelawes Josapat kerina kalak e arah negri e nari.
47 Sanga si e la lit raja i Edom,+ si merentah i je sekalak pejabat daerah.+
48 Ban Josapat ka kapal-kapal Tarsis* guna muat emas ku Opir,+ tapi la banci kapal-kapal e lawes perban ceda i Esion-geber.+
49 Emaka nina Ahasia anak Ahap man Josapat, “Pediat pelayan-pelayanku lawes ras pelayan-pelayanndu bas kapal e,” tapi Josapat la setuju.
50 Kenca si e, mate Josapat janah ikuburken ia ras nini bulangna+ i Kota Daud nini bulangna. Anakna si nggantiken ia jadi raja eme Jehoram.+
51 Ahasia+ anak Ahap jadi raja Israel i Samaria bas tahun pe-17-ken pemerentahen Josapat raja Juda. Lit dua tahun dekahna ia merentah Israel.
52 Terus lakokenna kai si jahat menurut Jahwe janah ikutkenna dalan bapakna+ ras mamakna,+ bage pe dalan Jerobeam anak Nebat si enggo erban kalak Israel pe ngelakoken dosa.+
53 Terus sembahna Baal+ janah sujud ia man bana, lalap banna Jahwe Dibata Israel merawa,+ bagi si lakoken bapakna.
Cataten i teruh
^ Ntah “nubuatkenna.”
^ Ntah “ernubuat.”
^ Ntah “nubuatkenna.”
^ Ntah banci saja “bas ingan pelacur-pelacur ridi, dilati biang-biang darehna.”
^ As. “ingan-ingan si meganjang.”
