1 Raja-Raja 3:1-28
3 Kerja sama Salomo ras raja Mesir* alu ngempoi anakna.+ Baba Salomo ia ku Kota Daud+ seh asa dung bangunna rumahna,+ rumah Jahwe,+ bage pe tembok i sekeliling Jerusalem.+
2 Tapi paksa si e, bangsa Israel terus denga mpersembahken korban bas ingan-ingan si meganjang,+ sebap rumah guna gelar Jahwe lenga ibangun.+
3 Salomo terus engkelengi Jahwe janah ikutkenna peraturen si ikataken Daud bapakna. Tapi persembahkenna korban bage pe persembahen tutungen bas ingan-ingan si meganjang.+
4 Lawes raja ku Gibeon guna mpersembahken korban i je, sebap i je ingan si meganjang si terkenalna.+ Persembahkenna 1.000 korban tutungen i datas ingan nutung* persembahen.+
5 I Gibeon, sanga wari enggo berngi jumpai Jahwe me Salomo arah nipi, nina Dibata, “Pindolah kai si atendu Kubereken man bandu.”+
6 Megi si e, nina Salomo, “Enggo buktikenNdu kekelengenNdu si setia si mbelin man budakNdu Daud bapakku, sebap erdalan ia i lebe-lebeNdu alu setia, benar, ras alu pusuh si bersih. Terus buktikenNdu kekelengenNdu si setia si mbelin man bana seh asa gundari, alu mereken sekalak anak guna kundul bas tahtana.+
7 O Jahwe Dibataku, gundari enggo banNdu budakNdu enda jadi raja nggantiken Daud bapakku, padahal aku nguda* denga janah la erpengalamen.+
8 BudakNdu enda si merentah bangsa si ipilihNdu,+ bangsa si seh kel teremna janah la terkira.
9 Ise kin si ngasup jadi hakim man bangsaNdu si seh kel teremna e? Berekenlah man budakNdu enda pusuh si patuh, gelah banci kuhakimi bangsaNdu e+ janah banci kubedaken si benar ras si jahat.”+
10 Meriah ukur Jahwe megi pemindon Salomo e.+
11 Emaka nina Dibata man bana, “Perban pindondu kepentaren guna ngakimi alu benar,+ janah la pindondu gedang umurndu, kebayaken, ntah pe kematen musuh-musuhndu,
12 emaka Kubereken pemindonndu e.+ Kubereken man bandu kepentaren ras pusuh si erpengangka.+ Alu bage, la lit kalak si bagi kam, ope lenga kam ntah pe kenca kam.+
13 Selain si e, Kubereken ka man bandu+ si la pindondu eme kebayaken ras kemulian.+ Alu bage, segedang geluhndu la lit raja si deban si bagi kam.+
14 Adi ikutkenndu dalan-dalanKu alu matuhi peraturenKu ras perentahKu, bagi si ilakoken Daud bapakndu,+ Kubereken ka man bandu umur si gedang.”+
15 Sanga medak Salomo, sadar ia maka ernipi ia. Kenca si e, lawes ia ku Jerusalem janah tedis ia i lebe-lebe Peti Perjanjin* Jahwe. Persembahkenna korban tutungen ras korban persadan+ janah banna pesta man kerina pelayanna.
16 Bas sada wari, reh dua kalak pelacur ndahi raja janah tedis kalak e i lebe-lebena.
17 Nina diberu si pertama, “O Tuan, aku ras diberu enda tading bas sada rumah. Sanga aku melahirken, ia pe lit i rumah.
18 Bas wari peteluken kenca aku melahirken, diberu enda pe melahirken ka. Kami ngenca duana tading bas rumah e, la lit kalak si deban.
19 Sanga berngi, mate anak diberu enda, perban tertindihisa.
20 Sanga tengah berngi, medak ia, buatna anakku arah sampingku* nari janah tamana ku sampingna. Sanga si e, budakndu enda medem denga. Kenca e tamakenna anakna si enggo mate ndai ku sampingku.
21 Sanga medak aku pagi-pagi guna meresa minem,* kuidah anakku e enggo mate. Emaka kuperdiateken kel ia, kepeken ia labo anak si kulahirken ndai.”
22 Nina diberu si sada nari, “Lang, anakku nge si nggeluh e, janah anakndu si enggo mate!” Tapi nina diberu si pertama e, “Lang, anakndu nge si enggo mate, janah anakku nge si nggeluh.” Bage me kalak e sijawapen i lebe-lebe raja.
23 Dungna nina raja, “Si sekalak ngataken, ‘Enda anakku si nggeluh denga, janah anakndu si enggo mate!’ jenari si sada nari ngataken, ‘Lang, anakndu nge si enggo mate, janah anakku nge si nggeluh!’”
24 Nina raja, “Baba man bangku sada pedang.” Emaka baba kalak e sada pedang man raja.
25 Kenca e nina raja, “Belah duaken anak si nggeluh e, jenari bereken man diberu e tersetengah.”
26 Perban mekuah ate diberu si anakna nggeluh denga, minter ia mindo man raja, nina, “O Tuanku, mindo kel aku man bandu, ula min bunuhndu anak si nggeluh e, bereken saja man bana.” Tapi nina diberu si sada nari, “Pediat saja ibelah kalak e anak e. Sada pe kita la padah daten!”
27 Emaka nina raja, “Ula bunuh anak e. Berekenlah anak si nggeluh e man diberu si pertama, sebap ia kap mamakna.”
28 Kerina kalak Israel megi keputusen si iban raja. Hebat kel akap kalak e* Raja Salomo+ perban kepentaren si bereken Dibata man bana guna ngakimi.+
Cataten i teruh
^ As. “Paro; Firaun.” Penggelaren man raja Mesir.
^ Ntah “anak-anak.”
^ Ntah “Peti Perpadanen.”
^ As. “dadaku.”
^ Ntah “guna mere ASI.”
^ As. “Mbiar kalak e man.”
