1 Raja-Raja 4:1-34
4 Raja Salomo merentah bas kerina Israel.+
2 Enda gelar pejabat-pejabatna: Asaria anak Sadok+ jadi imam.
3 Anak-anak Sisa eme Elihorep ras Ahia jadi sekertaris.+ Josapat+ anak Ahilut jadi tukang catat.
4 Benaya+ anak Joyada jadi peminpin pasuken. Sadok ras Abiatar+ jadi imam.
5 Asaria anak Natan+ jadi kepala pejabat daerah. Sabut anak Natan jadi imam janah ia teman raja.+
6 Ahisar jadi pengawas istana. Adoniram+ anak Apda jadi pengawas kalak si kerja paksa.+
7 I bas kerina Israel, lit 12 kalak pejabat daerah. Kalak enda nikapken pangan man Raja Salomo bage pe man istanana. Tiap kalak ertanggung jawap nikapken pangan bas sada bulan tiap tahun.+
8 Enda gelar kalak e: Anak Hur ertugas i daerah pegunungen Eperaim.
9 Anak Deker ertugas i Makas, i Salbim,+ i Bet-Semes, ras i Elon-bet-hanan.
10 Anak Heset ertugas i Arubot (ia pe ertugas ka bas Soko ras bas kerina daerah Heper).
11 Anak Abinadap ertugas i bas kerina daerah si erbukit-bukit i Dor (diberuna eme Tapat anak Salomo).
12 Baana anak Ahilut ertugas i Taanak, i Megido,+ ras i bas kerina Bet Sean+ si lit i sebelah Saretan i teruh daerah Jesreel, mulai Bet Sean seh ku Abil Mehola si lit i daerah Jokmeam.+
13 Anak Geber ertugas i Ramot si lit bas Gileat+ (ia ertugas bas kuta-kuta perkemahen Jair+ anak Manase si lit i Gileat,+ ertugas ka ia bas daerah Argop+ si lit i Basan,+ eme 60 kota si mbelin si lit tembokna ras palang pintuna si iban arah tembaga nari).
14 Ahinadap anak Iddo ertugas i Mahanaim.+
15 Ahimas ertugas i Naptali (diberuna eme Basmat, ia pe anak Salomo).
16 Baana anak Usai ertugas i Aser ras i Bealot.
17 Josapat anak Para ertugas i Isakar.
18 Simei+ anak Ela ertugas i Benyamin.+
19 Geber anak Uri ertugas i daerah Gileat+ eme taneh Sihon+ raja Amori ras Og+ raja Basan. Lit ka sada pejabat daerah si ngawasi kerina pejabat daerah si lit bas negri e.
20 Penduduk Juda ras Israel seh kel teremna bagi kersik i laut.+ Man ras minem kalak e, janah meriah ukurna.+
21 Salomo si erkuasa nandangi kerina kerajan, mulai Lau Eprat+ seh ku negri kalak Pilisti bage pe seh ku perbatasen Mesir. Kerina kerajan e maba upeti* man Salomo janah ngelayani ia sedekah ia nggeluh.+
22 Pangan si iperluken istana Salomo tiap wari eme 3.300 kilo* tepung halus ras 6.600 kilo* tepung si biasa,
23 bage pe 10 lembu si iasuhi bas kandang ras 20 lembu si iasuhi i mbalmbal, ras erbage-bage jenis rusa, perik-perik si iasuhi, ras 100 biri-biri.
24 Kuasai Salomo kerina daerah si lit bas sebelah barat Lau Eprat,+ mulai arah Tipsah seh ku Gasa.+ Kuasaina ka kerina raja si lit i sebelah barat Lau Eprat. Dame kerina daerah si ikuasaina e.+
25 Sedekah Salomo merentah, kerina kalak Juda ras Israel mulai Dan nari seh ku Berseba nggeluh aman i teruh batang anggur kalak e ras i teruh batang arana.
26 Lit 4.000* kandang kuda Salomo man kudana si narik gereta-geretana janah lit ka 12.000 kudana.*+
27 Kerina pejabat daerah nikapken pangan man Raja Salomo bage pe man kerina kalak si ikut man bas meja raja. Tiap pejabat ertanggung jawap bas bulan si enggo itentuken man kalak e. Kalak e pe ertanggung jawap guna mastiken maka la lit si kurang.+
28 Selain si e, tiap pejabat ertanggung jawap maba barli ras gagaten man erbage-bage kuda, termasuk man kuda si narik gereta. Baba kalak e barli ras gagaten ku japa pe iperluken.
29 Bereken Dibata man Salomo kepentaren, pengertin si luar biasa, bage pe pemeteh si seh kel lalana,* bali bagi kersik i pantai.+
30 Kepentaren Salomo ngelebihi kerina kalak pentar si tading i Timur bage pe si lit i Mesir.+
31 Ia si pentarna arah kerina manusia. Pentaren ia asangken Etan+ kalak Esrahi bage pe asangken anak-anak Mahol eme Heman,+ Kalkol,+ ras Darda. Gelar Salomo jadi terkenal i bas kerina bangsa si lit i sekelilingna.+
32 Lit iban* Salomo 3.000 kuan-kuanen+ janah 1.005 lagu.+
33 Banci ceritakenna kerna batang kayu, mulai arah kayu aras si lit bas Libanon seh ngayak sinuan hisop+ si turah i tembok. Banci ka ceritakenna kerna binatang-binatang si galang,+ perik,*+ binatang si nggawang,*+ bage pe ikan.
34 Rehen kalak arah kerina bangsa guna megiken kepentaren Salomo, termasuk raja-raja i sebelang doni si enggo megi kerna kepentarenna.+
Cataten i teruh
^ As. “60 kor.”
^ Jumlah enda lit itulisken bas piga-piga gulungen bage pe bas buku si deban. Gulungen si deban ngataken 40.000.
^ Ntah “si nangkih kudana.”
^ Ntah “bage pe pusuh si erpengangka.”
^ Ntah “belasken.”
^ Ntah “binatang si kabang.”
^ Mungkin termasuk binatang reptil ras serangga.
