1 Raja-Raja 5:1-18
5 Mbarenda nari, Raja Hiram arah Tirus+ enggo erteman ras Daud.*+ Sanga begi Hiram maka Salomo enggo ilantik jadi raja guna nggantiken bapakna, suruh Hiram pelayan-pelayanna ndahi Salomo.
2 Kenca si e kirim Salomo pesan man Hiram,+
3 “Tehndu kel maka Daud bapakku la banci mbangun rumah guna gelar Jahwe Dibatana, sebap ia erperang ngelawan melala musuh si lit i sekelilingna, tapi iban Jahwe ia menang naluken musuh-musuhna.+
4 Gundari iban Jahwe Dibataku aku bebas arah kerina musuh si lit i sekelilingku.+ La lit si ngelawan aku janah la lit bahaya si terjadi bas negriku.+
5 Gundari kubangun ateku sada rumah man gelar Jahwe Dibataku, bagi si ijanjiken Jahwe man bapakku Daud, eme, ‘Kuban pagi anakndu kundul bas tahtandu, janah ia pagi si mbangun rumah guna gelarKu.’+
6 Emaka suruhlah sierdahinndu motong kayu aras si lit i Libanon+ man bangku. Erdahin pagi sierdahinku ras sierdahinndu, janah kugalari pagi upah man sierdahinndu menurut erga si tetapkenndu. Sebap tehndu maka bas kami la lit sada pe si beluh motong kayu bagi kalak Sidon.”+
7 Sanga begi Hiram kata-kata Salomo, meriah kel ukurna janah nina, “Terpujilah Jahwe bas wari enda, perban enggo berekenNa man Daud sekalak anak si pentar guna merentah bangsa si mbelin* enda!”+
8 Emaka kirim Hiram pesan man Salomo, “Enggo kualoken pesan arah kam nari. Kerina si pindondu pasti kulakoken. Kusediaken pagi kayu aras ras kayu juniper.+
9 Baba sierdahinku pagi kayu-kayu e arah Libanon nari ku laut. Kuban pagi kayu-kayu e bagi rakit janah kukirimken arah laut nari ku ingan si tentukenndu. I je bongkar sierdahinku kari rakit e, jenari banci babandu. Si jadi gantina, sediakenlah pangan si kupindo guna istanaku.”+
10 Emaka sediaken Hiram kayu aras ras kayu juniper bagi si pindo Salomo.
11 Bereken Salomo persedian pangan man istana Hiram, eme 3.200 ton* gandum ras 4.400 liter* minak saitun si mejilena. E me si bereken Salomo man Hiram tiap tahun.+
12 Bere Jahwe kepentaren man Salomo, bagi si enggo janjikenNa.+ Lit kedamen antara Salomo ras Hiram, janah ban kalak e perjanjin.
13 Perentahken Raja Salomo 30.000 dilaki arah kerina kalak Israel guna kerja paksa.+
14 Tiap bulan lit 10.000 arah kalak e si isuruh Salomo lawes ku Libanon menurut gilirenna. Lit sebulan dekahna kalak e i Libanon janah dua bulan i rumahna. Adoniram+ si jadi pengawas kalak si kerja paksa e.
15 Lit 70.000 kuli Salomo janah lit 80.000 tukangna si motong batu+ i gunung.+
16 Lit ka 3.300 pejabat daerah+ si ertugas ngawasi kalak si erdahin e.
17 Bagi si perentahken raja, buat kalak e batu si galang ras si merga,+ jenari ipotong-potong jadi pondasi+ rumah e.+
18 Emaka ipotong sierdahin Salomo batu e radu ras sierdahin Hiram bage pe ras kalak Gebal.+ Jenari sikapken kalak e kayu ras batu guna mbangun rumah e.
Cataten i teruh
^ Ntah “Raja Hiram arah Tirus terus engkelengi Daud.”
^ Ntah “si enterem.”
^ As. “20 kor.”
