1 Raja-Raja 6:1-38
6 Bas tahun si peempatken bas bulan si peduaken eme bas bulan Sip*+ Salomo jadi raja Israel, mulai ibangunna rumah Jahwe.*+ Si e ilakokenna kenca 480 tahun kalak Israel ndarat arah Mesir.+
2 Rumah si ibangun Raja Salomo man Jahwe gedangna kira-kira 27 meter, belangna kira-kira 9 meter, janah ganjangna kira-kira 13 meter.*+
3 I lebe-lebe rumah pertoton lit teras+ si gedangna kira-kira siwah meter* bali bagi belang rumah e. Gedang rumah e jadi tambah kira-kira empat meter* perban teras e.
4 Iban Salomo jendela-jendela man rumah e, janah kusen jendela e belangen si arah bas asangken si arah darat.+
5 Bangunna ka tembok si arah darat i sekeliling rumah e. Tembok e engkelilingi Ingan si Badia bage pe ruangen si arah basna kel.*+ Janah banna ka ruangen-ruangen i sekeliling tembok e.+
6 Ruangen lante sada belangna kira-kira dua meter, ruangen lante dua belangna hampir telu meter, janah ruangen lante telu belangna telu meter lebih.* Dingding tiap lante lebih menipes asangken dingding lante si lit i teruhna, emaka la perlu iban balok jadi penahan ku dingding rumah e.+
7 Rumah e ibangun alu batu-batu si enggo isikapken eme batu-batu si enggo ipotong.+ Emaka sanga ibangun rumah e la lit terbegi sora kapak, martel, ntah alat besi kai pe.
8 Pintu masuk ku ruangen lante sada lit i sebelah selatan* rumah e.+ Janah lit tanggana si bentukna melingkar ku lante dua, bage kang arah lante dua ku lante telu.
9 Terus bangunna rumah e ngasa dung.+ Pasangna balok-balok ras papan arah kayu aras jadi atapna.+
10 Tiap ruangen si ibangun i sekeliling rumah+ e ganjangna kira-kira dua meter,* janah tamana papan arah kayu aras gelah leket ku rumah e.
11 Nina Jahwe man Salomo,
12 “Adi patuhindu janah dalankenndu peraturenKu, undang-undangKu, bage pe kerina perentahKu,+ Kutepati janjiKu man Daud bapakndu kerna kam,+ khususna kerna rumah si bangunndu enda.
13 Tading Aku i tengah-tengah kalak Israel+ janah ndigan pe la Kutadingken bangsaKu Israel.”+
14 Terus bangun Salomo rumah e ngasa dung.
15 Dingding rumah si arah bas lapisina alu papan arah kayu aras, mulai lante nari seh ku langit-langitna. Lante rumah e pe lapisina alu papan kayu juniper.+
16 Selain si e, lit kira-kira siwah meter* arah bagin belakang rumah e, bangunna sada ruangen si iban arah papan kayu aras mulai lante nari seh ku langit-langitna. Bas ruangen e, bangunna ka ruangen si arah basna kel,+ eme Ingan Sibadiana.+
17 Bas bagin depan rumah* e,+ lit Ingan si Badia si gedangna kira-kira 18 meter.*
18 Bagin arah bas rumah e si enggo ilapisi papan kayu aras, iukir ka alu gambar buah-buahen si kitik si bentukna kibul*+ ras bunga si sangana mekar.+ Kerinana ilapisi alu papan kayu aras, emaka lanai teridah batu dingding e.
19 Sikapken Salomo ruangen si arah basna kel+ si lit bas rumah e gelah banci tamana Peti Perjanjin* Jahwe i je.+
20 Ruangen si arah basna kel gedangna kira-kira siwah meter, belangna kira-kira siwah meter, janah ganjangna kira-kira siwah meter.*+ Si e kerina ilapisina alu emas murni, janah ingan nutung* persembahen lapisina+ alu papan kayu aras.
21 Bagin arah bas rumah e lapisi Salomo alu emas murni,+ janah bagin arah lebe ruangen si arah basna kel+ lapisina alu emas, jenari pasangna rante emas i je.
22 Kerina ingan nutung persembahen+ si lit i deher ruangen si arah basna kel lapisina ka alu emas. Kerina bagin rumah e lapisina alu emas.
23 Ban Salomo dua kerubim+ arah kayu pinus* bas ruangen si arah basna kel. Tiap kerubim ganjangna kira-kira empat meter.*+
24 Tiap kerubim lit dua kabengna. Tiap kabeng gedangna kira-kira dua meter.* Jarak antara dua ujung kabeng tiap kerubim e kira-kira empat meter.*
25 Kerubim si peduaken pe ukurenna kira-kira empat meter.* Duana kerubim e seri bentukna ras ukurenna.
26 Tiap kerubim ganjangna kira-kira empat meter.*
27 Duana kerubim e+ itamana ku bas ruangen si arah basna kel.* Kabeng kerubim-kerubim e kimbang, emaka sembelah kabeng tiap kerubim e sikenan i tengah ruangen e. Janah sembelah nari kabeng kerubim si pertama kena ku dingding si arah enda, sembelah nari kabeng kerubim si peduaken kena ku dingding si arah ah.
28 Janah lapisina kerubim-kerubim e alu emas.
29 Ukir Salomo kerina dingding rumah e, si arah bas bage pe si arah darat. Ukirna alu gambar kerubim,+ batang kurma,+ ras bunga si mekar.+
30 Lapisina ka lante rumah e alu emas, ruangen si arah bas bage pe si arah darat.
31 Banna pintu masuk ku bas ruangen si arah basna kel, eme sada pintu si dua daun pintuna janah iban arah kayu pinus nari. Jenari pasangna tiang-tiang samping bage pe kusen pintu si jadi bagin pelimaken.*
32 Pintu e iban arah kayu pinus nari, janah ukirna i pintu e gambar kerubim, batang kurma, ras bunga si mekar, jenari lapisina alu emas. Pakena martel guna ngelapisi ukiren gambar kerubim ras batang kurma alu emas.
33 Alu cara si seri banna ka kusen pintu arah kayu pinus nari man pintu masuk rumah* e, si jadi bagin peempatken.*
34 Banna ka dua pintu arah kayu juniper nari. Tiap pintu e lit dua daun pintuna janah banci ilipat.+
35 Ukirna ka alu gambar kerubim, batang kurma, ras bunga si mekar. Jenari lapisina ukiren e alu emas.
36 Banna halamen si arah bas+ janah tembok halamen e banna arah telu lapis batu si enggo ipotong bage pe sada lapis balok arah kayu aras.+
37 Pondasi rumah Jahwe iban bas tahun peempatken pemerentahen Salomo, bas bulan Sip.*+
38 Bas tahun si pe-11-ken, bas bulan si pewaluhken, eme bulan Bul,* dung kerina bagin rumah e ibangun bagi si enggo irancang.+ Lit pitu tahun dekahna maka dung rumah e ibangun Salomo.
Cataten i teruh
^ As. “10 hasta.”
^ Maksudna, Ingan Sibadiana.
^ As. “Ruangen lantai sada belangna 5 hasta, ruangen lantai dua belangna 6 hasta, janah ruangen lantai telu belangna 7 hasta.” Nen Ket. B14.
^ As. “kanan.”
^ Maksudna, Ingan si Badia si lit i lebe-lebe Ingan Sibadiana.
^ Buah e banci saja bentukna bagi labu. Labu e erbage-bage jenisna. Mungkin si imaksud eme buah gundur, jambe, semangka, cimen, ras si debanna.
^ Ntah “Peti Perpadanen.”
^ Ntah “arah batang kayu minak.” Mungkin maksudna kayu pinus Aleppo.
^ As. “kerubim e 10 hasta.”
^ Maksudna, tamana ku Ingan Sibadiana.
^ Mungkin si imaksud eme cara erban kusen pintu ntah pe ukuren pintuna.
^ Maksudna, Ingan si Badia.
^ Mungkin si imaksud eme cara erban kusen pintu ntah pe ukuren pintuna.
