1 Raja-Raja 7:1-51
7 Bangun Salomo istanana* janah 13 tahun dekahna+ maka dung.+
2 Bangun Salomo ka Rumah Kerangen Libanon.+ Gedangna kira-kira 45 meter, belangna kira-kira 22 meter, janah ganjangna kira-kira 13 meter.* Bangunna e i datas empat baris tiang arah kayu aras nari. Das tiang-tiang e lit balok-balok arah kayu aras.+
3 Bagin das rumah e ilapisi alu papan kayu aras, papan e itamaken i datas beloti-beloti si ipepedem si enggo itopang tiang-tiang. Jumlahna* 45, lit 15 tiap baris.
4 Rumah e lit telu baris jendelana si erkusen. Tiap jendela siala-alan ras jendela si debanna.
5 Bentuk kusen bagin depan jendela si telu baris e segi empat, bage ka pe kerina pintu masuk ras kusen pintu e.
6 Bangun Salomo Ruang* Tiang-Tiang si gedangna kira-kira 22 meter janah belangna kira-kira 13 meter.* I lebe-lebe ruang e lit teras si atapna itopang tiang-tiang.
7 Bangunna ka Ruang Tahta,*+ ntah pe Gedung Pengadilen.+ I je Salomo ngakimi. Ingan e ilapisi alu papan kayu aras, mulai lantai nari seh ku langit-langitna.
8 Istana ingan Salomo tading lit bas halamen si deban,+ eme arah pudi Gedung Pengadilen, janah seri carana mbangunsa. Bangun Salomo ka rumah man diberuna eme anak raja Mesir,+ janah rumah e mirip ras gedung ndai.
9 Kerina bangunen e iban arah batu-batu si merga,+ mulai pondasina nari seh ku dingding si arah datasna kel, bage pe arah darat seh ku halamen si mbelang.+ Batu-batu e enggo iukur ras ipotong, janah arah darat ras arah bas enggo irataken alu gergaji.
10 Pondasina iban arah batu-batu si merga janah galang kel batu-batu e. Lit si kira-kira empat meter gedangna ras lit si hampir empat meter.*
11 Dingdingna iban arah batu-batu si merga si enggo iukur janah ipotong, bage pe arah papan kayu aras.
12 Bas sekeliling halamen si mbelang, lit iban tembok arah telu lapis batu si enggo ipotong, bage pe sada lapis balok arah kayu aras, bali bagi tembok halamen si arah bas+ rumah Jahwe bage pe terasna.+
13 Suruh Raja Salomo kalak ngelegi Hiram+ arah Tirus nari.
14 Mamak Hiram sekalak diberu si enggo janda arah suku Naptali, janah bapakna tukang tembaga arah Tirus nari.+ Hiram ahli kel, erpengalamen, janah melala kel pemetehna+ bas erbage-bage jenis pendahin si lit hubungenna ras tembaga.* Emaka reh ia janah dahikenna kerina si isuruh Raja Salomo.
15 Ban Hiram dua tiang tembaga+ janah tiap tiang ganjangna kira-kira waluh meter.* Keliling tiap tiang kira-kira lima meter.*+
16 Banna takal tiang arah tembaga guna itamaken i datas tiang-tiang e. Ganjang tiap takal tiang e kira-kira dua meter.*
17 Bas tiap takal tiang, lit jaring si iban arah pitu rante.+
18 Guna jadi hiasen bas takal tiang e, banna dua baris hiasen si bentukna bagi buah delima i sekeliling jaring e. Banna bage bas duana takal tiang e.
19 Duana takal tiang si lit bas teras rumah e bentukna bagi bunga bakung, janah ganjangna kira-kira dua meter.*
20 Bagin e lit i datas dua takal tiang e, eme arah das bagin si kibul si ikelilingi jaring e. Bas tiap takal tiang e lit dua baris hiasen si bentukna bagi buah delima. Lit 200 hiasen delima bas tiap takal tiang e.+
21 Tamakenna tiang-tiang e i lebe-lebe teras rumah pertoton.*+ Si sebelah kanan* igelarina Jakin,* si sebelah kiri* igelarina Boas.*+
22 Bagin arah datas tiang-tiang e bentukna bagi bunga bakung. Emaka dung me tiang-tiang e iban.
23 Kenca si e, banna ingan nampung lau si bentukna kibul, e igelari Laut Tembaga.+ Ganjangna kira-kira dua meter, gedang garis tengahna* kira-kira empat meter, janah kelilingna kira-kira 13 meter.*+
24 I teruh biber Laut Tembaga e lit dua baris gambar hiasen si bentukna kibul+ si engkelilingi Laut e. Lit sepuluh gambar bas kira-kira 45 sentimeter.* Gambar e icetak radu ras Laut e.
25 Ingan nampung lau e itamaken i datas 12 patung lembu jantan.+ Telu lembu pengalana ku utara, telu ku barat, telu ku selatan, janah telu nari ku timur. Ingan nampung lau e itamaken i datas lembu-lembu e, janah pudiken lembu-lembu e ingan nampung lau e.
26 Tebal ingan nampung lau e asa sada tapak-tapak tan,* biberna bagi biber cangkir si bentukna bagi bunga bakung si sangana mekar. Banci siat 44.000 liter* lau bas ingan nampung lau e.
27 Kenca si e, iban Hiram ka gereta*+ arah tembaga. Tiap gereta e gedangna kira-kira dua meter, belangna kira-kira dua meter, janah ganjangna kira-kira sada meter.*
28 Bagenda carana gereta-gereta e iban: Bagin arah samping iban arah lempengen-lempengen tembaga si imasukken ku bingkai-bingkai segi empat.
29 Bas lempengen-lempengen e lit gambar singa,+ lembu jantan, ras kerubim.+ Bas bingkai-bingkaina pe lit gambar-gambar si bage. Janah i datas bage pe i teruh gambar singa ras lembu jantan e, lit gambar timbul si bentukna bagi lingkaren.
30 Tiap gereta lit empat roda tembagana. Roda-roda e ihubungken batang-batang* tembaga. Bas empat sudut gereta e lit penopang si nopang roda-roda e. Penopang si lit arah teruh baskom e ihiasi alu bentuk lingkaren bas tiap sisina.
31 Biber baskom e kibul janah ikelilingi bingkai. Arah teruh baskom seh ku bagin arah teruh bingkai, ganjangna kira-kira 45 sentimeter.* Bingkai ras penopangna e igelari penyangga janah ganjangna kira-kira 67 sentimeter.* Bas kerina sisi bingkai, lit lempengen-lempengen si iukir janah bentukna segi empat, labo kibul.
32 Empatna roda e lit i teruh gereta e janah tiap roda ganjangna kira-kira 67 sentimeter.* Penahan roda e enggo ipasang ku gereta e.
33 Roda-roda e iban bagi roda gereta kuda. Penahan roda, lengkar roda, jari-jarina, bage pe pusat roda, kerinana arah logam.
34 Bas empatna sudut tiap gereta lit penahanna, janah e icetak radu ras gereta e.
35 Bas bagin arah datas gereta e lit bingkai si engkelilingisa, ganjangna kira-kira 22 sentimeter.* Bingkai ras lempengenna e icetak radu ras penyangga.
36 Bas ingan si banci denga iukir bas sisi bingkai ras lempengen-lempengen e, ukirna i je gambar kerubim, singa, ras batang kurma. Janah banna gambar lingkaren i sekelilingna.+
37 Sepuluhna gereta+ e icetakna alu cara si seri.+ Ukuren ras bentukna pe seri.
38 Banna sepuluh baskom arah tembaga+ man sepuluh gereta e, sada baskom man sada gereta. Tiap baskom galangna* kira-kira dua meter* janah banci nampung 880 liter* lau.
39 Tamakenna lima gereta bas sebelah kanan rumah e, janah lima gereta bas sebelah kiri. Laut Tembaga itamana bas sebelah kanan rumah e, eme sebelah tenggara.+
40 Ban Hiram+ ka baskom-baskom, sekop-sekop,+ ras mangkok-mangkok.+
Emaka dungi Hiram kerina dahinna guna rumah Jahwe, bagi si perentahken Raja Salomo.+ Enda si iban Hiram:
41 dua tiang,+ dua takal tiang si bentukna bagi mangkok, bage pe dua jaring+ si jadi hiasen man dua takal tiang ndai.
42 Man dua jaring si jadi hiasen dua takal tiang e, iban ka 400 hiasen si bentukna bagi buah delima.+ Bas tiap jaring lit dua baris hiasen si bentukna bagi buah delima ndai.
43 Lit ka sepuluh gereta+ janah i datas tiap gereta e lit sada baskomna,+
44 lit ka Laut Tembaga+ ras 12 lembu jantan si lit i teruhna.
45 Bage pe belanga-belanga, sekop-sekop, mangkok-mangkok, ras kerina peralaten si iban arah tembaga si erndilap. Si e kerina iban Hiram man Raja Salomo guna ipake bas rumah Jahwe.
46 Perentahken raja gelah kerina barang ndai iban bas cetaken taneh liat i daerah Jordan si lit i antara Sukot ras Saretan.
47 Perban buena peralaten si iban e, lanai itimbang Salomo asa kai beratna. Emaka labo terpastiken asa kai beratna kerina tembaga si ipake.+
48 Ban Salomo kerina peralaten guna rumah Jahwe, eme: ingan nutung* persembahen+ arah emas nari ras meja-meja+ ingan roti persembahen si iban arah emas nari.
49 Banna ka ingan lampu+ si iban arah emas murni si itamana i lebe-lebe ruangen si arah basna kel, lima i sebelah kanan janah lima i sebelah kiri. Banna ka bunga-bunga,+ lampu-lampu, ras alat guna njepit sumbuna. Si e kerina iban arah emas.+
50 Banna ka baskom-baskom, alat guna mateken sumbu lampu,+ mangkok-mangkok, cangkir-cangkir,+ ras ingan rara.+ Kerina e iban arah emas murni nari. Banna ka engsel-engsel arah emas nari+ man pintu Ingan Sibadiana bage pe man pintu rumah e.+
51 Emaka enggo dung kerina dahin si arus lakoken Raja Salomo guna rumah Jahwe. Kenca si e masukken Salomo barang-barang si enggo ipebadia Daud bapakna.+ Masukkenna ka pirak, emas, ras kerina peralaten ku bas ingan nimpan erta bas rumah Jahwe.+
Cataten i teruh
^ Ntah “rumahna.”
^ Mungkin maksudna jumlah beloti-beloti si ipepedem si enggo itopang tiang.
^ Ntah “Teras.”
^ Ntah “Ruang Kursi Kerajan.”
^ Ntah “perunggu.”
^ Ntah “Guna meteh keliling tiap tiang iperluken tali si gedangna 12 hasta.”
^ Ertina “Mbera-Mbera BanNa [maksudna, Jahwe] Paguh.”
^ Mungkin ertina “Alu Paguh.”
^ Ntah “utara.”
^ Ntah “selatan.”
^ Maksudna, Ingan si Badia.
^ Ntah “diameterna.”
^ As. “Ganjangna 5 hasta, gedang garis tengahna 10 hasta, janah kelilingna 30 hasta.” Nen Ket. B14. Ntah “janah guna meteh kelilingna iperluken tali si gedangna 30 hasta.”
^ As. “2.000 bat.”
^ Ntah “gerobak ingan lau.”
^ Ntah “Roda-roda e iban as.”
^ As. “ganjangna 1,5 hasta.”
^ Ntah “gedang garis tengahna.”
^ As. “40 bat.”
