1 Raja-Raja 8:1-66
8 Kenca si e, pepulung Salomo+ peminpin-peminpin Israel, kerina peminpin suku, bage pe peminpin-peminpin arah keluarga bapak kalak Israel.+ Reh kalak e ku Jerusalem ndahi Raja Salomo guna maba Peti Perjanjin* Jahwe arah Kota Daud+ nari eme Sion.+
2 Kerina kalak Israel pulung i lebe-lebe Raja Salomo sanga perayan* bas bulan pepituken eme bulan Etanim.*+
3 Emaka reh kerina peminpin-peminpin Israel janah angkat imam-imam Peti Perjanjin.+
4 Ibaba imam-imam ras kalak Lewi Peti Perjanjin Jahwe, kemah perjumpan,+ bage pe kerina barang-barang si enggo ipebadia si lit bas kemah e.
5 Raja Salomo bage pe kerina kalak Israel si enggo ilebuh guna njumpai raja, pulung i lebe-lebe Peti Perjanjin. Melala kel biri-biri ras lembu si ikorbanken+ seh ngasa lanai terkira kalak e asa kai buena.
6 Emaka baba imam-imam Peti Perjanjin Jahwe ku ingan Peti e,+ eme ku Ingan Sibadiana, jenari amparkenna i teruh kabeng kerubim-kerubim.+ Ingan Sibadiana eme ruangen si arah basna kel i rumah e.
7 Kabeng kerubim-kerubim e kimbang i datas ingan Peti Perjanjin, emaka tutupi bayangen kerubim-kerubim e Peti Perjanjin bage pe kayu guna ngangkat Peti e.+
8 Kayu-kayu e+ seh kel gedangna emaka banci teridah ujung-ujungna arah Ingan si Badia si lit i lebe-lebe ruangen si arah basna kel, tapi la teridah arah darat nari. Peti e lit i je seh asa gundari.
9 La lit kai pe bas Peti Perjanjin e selain dua batu+ si imasukken Musa. Batu-batu e masukken Musa+ sanga ia bas Gunung Horep,* eme sanga ban Jahwe perjanjin+ ras kalak Israel kenca ndarat kalak e arah taneh Mesir.+
10 Sanga ndarat imam-imam e arah ingan si badia, rumah Jahwe+ dem alu embun.+
11 Lanai banci terusken imam-imam tugasna perban embun e, sebap kemulian Jahwe dem bas rumah Jahwe.+
12 Sanga si e ngerana Salomo, “O Jahwe, katakenNdu tading Kam bas embun si seh kel gelapna.+
13 Enggo berhasil kubangun sada rumah si mulia man baNdu, eme si jadi inganNdu tading seh rasa lalap.”+
14 Kenca si e, alaken raja ku kerina kalak Israel si pulung si sangana tedis, janah pasu-pasuna kerina kalak e.+
15 Nina, “Mbera-mbera terpujilah Jahwe Dibata Israel, si enggo langsung erjanji man bapakku Daud, janah banNa janjiNa e terjadi alu tanNa. Enda janjiNa e,
16 ‘Mulai kin Kubaba umatKu ndarat arah Mesir, lenga lit Kupilih sada kota arah kerina suku Israel guna mbangun rumah man gelarKu gelah gelarKu tetap lit i je,+ tapi enggo Kupilih Daud guna minpin umatKu Israel.’
17 Daud bapakku enggo ersura-sura mbangun rumah guna gelar Jahwe Dibata Israel.+
18 Tapi nina Jahwe man bapakku Daud, ‘Ersura-sura kel kam mbangun rumah guna gelarKu, janah sura-surandu e mehuli kap.
19 Tapi, labo kam pagi si mbangun rumah e. Anakndu* pagi si mbangun rumah guna gelarKu.’+
20 Enggo tepati Jahwe janjiNa, sebap enggo kundul aku i tahta Israel nggantiken bapakku Daud, bagi si janjiken Jahwe. Enggo ka kubangun rumah guna gelar Jahwe Dibata Israel.+
21 Janah enggo kuban i je ingan Peti Perjanjin si isina perjanjin+ si iban Jahwe ras nini bulangta, sanga babaNa kalak e ndarat arah taneh Mesir.”
22 Kenca si e, tedis Salomo i lebe-lebe ingan nutung* persembahen man Jahwe, i lebe-lebe kerina kalak Israel si pulung, jenari angkatna tanna ku datas, ku langit,+
23 nina, “O Jahwe Dibata Israel, la lit Dibata si bagi Kam+ i surga ntah pe i doni. TepatiNdu janjiNdu janah cidahkenNdu kekelengenNdu si setia+ man budak-budakNdu si bulat ukurna ngelayani Kam.*+
24 Enggo tepatiNdu janjiNdu man budakNdu Daud bapakku. Erjanji Kam, bas wari enda alu tanNdu tepatiNdu janjiNdu e.+
25 Gundari, o Jahwe Dibata Israel, tepatilah janjiNdu man budakNdu Daud bapakku sanga katakenNdu, ‘Adi setia anak-anakndu erdalan bas dalan-dalanKu, bagi kam si enggo setia erdalan bas dalan-dalanKu, emaka keturunenndu pagi si lalap kundul bas tahta Israel i lebe-lebeKu.’+
26 Emaka, o Dibata Israel, mindo aku gelah buktikenNdu maka janji si enggo banNdu man budakNdu Daud bapakku terteki kap.
27 “Tapi, banci kin Dibata tading i doni?+ Langit si mbelang pe la siat+ man inganNdu tading, apai ka rumah si kubangun enda!+
28 O Jahwe Dibataku, perdiatekenlah toto ras pemindon budakNdu enda. Bas wari enda, ertoto budakNdu enda i lebe-lebeNdu, begiken min soraku tangis mindo penampat bage pe pertotonku enda.
29 Mbera-mbera mataNdu lalap ngenen rumah e suari ras berngi, ku ingan si katakenNdu, ‘GelarKu lit i je.’+ Emaka begikenNdu min budakNdu si ertoto si pengalana ku ingan enda.+
30 Begiken min pemindon budakNdu enda bage pe pemindon umatNdu Israel si ertoto si pengalana ku ingan enda. Mbera-mbera begikenNdu bas inganNdu nari, arah surga nari.+ Mbera-mbera begikenNdu janah ampuniNdu.+
31 “Sanga lit sekalak jelma ituduh ersalah man temanna, janah isuruh ia ersumpah* maka cilaka ia adi tuhu kin ia ersalah, jenari lawes ia ku lebe-lebe ingan nutung persembahen bas rumah enda paksa ia i teruh sumpah denga,+
32 begikenNdu min arah surga nari janah ban min tindaken ras hakimi budak-budakNdu. Mbera-mbera umumkenNdu maka kalak si jahat e salah, janah hukumNdu ia menurut kai si enggo lakokenna. Mbera-mbera umumkenNdu kalak si benar e la ersalah janah upahiNdu ia menurut perbahanenna si benar.+
33 “Sanga umatNdu Israel italuken musuh perban lalap erdosa man baNdu,+ janah kenca si e mulihken kalak e man baNdu, muliaken kalak e gelarNdu,+ janah ertoto ras mindo perkuah ateNdu i rumah enda,+
34 mbera-mbera begikenNdu surga nari janah ampuniNdu dosa umatNdu Israel ras babaNdu kalak e mulih ku taneh si enggo berekenNdu man nini bulang kalak e.+
35 “Sanga tertutup langit janah la nusur udan+ perban lalap kalak e erdosa man baNdu,+ jenari ertoto kalak e janah pengalana ku ingan enda, muliaken kalak e gelarNdu. Dungna ertobat kalak e arah dosana nari perban pediatNdu kalak e susah.*+
36 Mbera-mbera begikenNdu arah surga nari janah ampuniNdu dosa budak-budakNdu kalak Israel. Ajari min kalak e+ dalan si mehuli si arus dalanina janah berekenlah udan ku taneh+ si enggo berekenNdu man bangsaNdu jadi warisen.
37 “Adi terjadi bas negri enda kelihen,+ wabah penakit, angin si melas si ncedai sinuan-sinuan, hama jamur,+ labang si seh kel lalana ntah pe si merangap, ntah adi kalak e ikepung musuh-musuh bas salah sada kota bas negri e,* ntah reh penakit kai pe,+
38 jenari lit sekalak jelma ntah pe kerina umatNdu Israel ngangkat tanna ku arah rumah enda, guna ertoto kerna kai pe ntah mindo kai pe,+ perban susah akapna ntah perban sura-surana,+
39 mbera-mbera begikenNdu arah inganNdu tading i surga,+ mbera-mbera ampuniNdu+ janah banNdu tindaken, mbera-mbera upahiNdu tiap kalak menurut perbahanenna,+ sebap tehNdu kap isi pusuhna. Kam ngenca situhu-tuhu meteh uga isi pusuh tiap manusia.+
40 Alu bage mbiar kalak e man baNdu segedang geluhna bas negri si enggo berekenNdu man nini bulang kami.
41 “Selain si e, adi lit kalak asing si labo bagin arah umatNdu Israel, si reh arah ingan si ndauh perban gelarNdu,+
42 perban begi kalak e gelarNdu si mbelin,+ bage pe tanNdu si megegeh ras si erkuasa, reh ia guna ertoto janah pengalana ku arah rumah enda,
43 mbera-mbera begikenNdu arah inganNdu tading i surga,+ janah berekenNdu pemindon kalak asing e, gelah kerina jelma bas doni enda meteh gelarNdu janah mbiar man baNdu+ bagi umatNdu Israel. Mbera-mbera iteh kalak e maka gelarNdu lit bas rumah si enggo kubangun enda.
44 “O Jahwe, adi suruhNdu umatNdu erperang ngelawan musuhna, i japa pe kalak e,+ jenari ertoto kalak e+ man baNdu janah alakenna ku kota si pilihNdu+ enda bage pe ku rumah si kubangun man gelarNdu enda,+
45 begikenNdu min surga nari pertoton kalak e ras pemindonna janah berelah keadilen man kalak e.
46 “Labo lit kalak si la erdosa.+ Adi erdosa kalak e man baNdu, jenari merawa Kam man kalak e, janah pediatNdu kalak e italuken musuh, janah itaban ku negri musuh si ndauh ntah pe si ndeher,+
47 kenca si e sadar kalak e bas negri inganna itaban,+ emaka mulih kalak e ku Kam+ janah mindo perkuah ateNdu bas ingan kalak si naban ia,+ alu ngataken, ‘Kami enggo erdosa ras ersalah. Enggo lakoken kami kai si jahat,’+
48 janah mulih kalak e man baNdu alu bulat ukur+ ras asa gegehna bas negri musuh-musuh si naban kalak e, jenari ertoto kalak e man baNdu janah pengalana ku taneh si enggo berekenNdu man nini bulang kalak e, ku kota si enggo pilihNdu, ku rumah si enggo kubangun man gelarNdu,+
49 begikenNdu min arah inganNdu tading i surga+ nari pertoton kalak e ras pemindonna, berelah kalak e keadilen
50 janah ampuni min umatNdu si enggo erdosa man baNdu. Ampunilah kerina kesalahen si lakoken kalak e man baNdu. Ban min gelah kalak si naban kalak e rate mekuah man kalak e, janah aloken kalak e perkuah ate,+
51 sebap kalak enda bangsaNdu, umatNdu*+ si babaNdu ndarat arah Mesir nari+ eme ingan ngelebur besi.+
52 Mbera-mbera perdiatekenNdu pemindon budak-budakNdu+ bage pe pemindon bangsaNdu Israel, janah begikenNdu ndigan pe kalak e ngelebuh Kam.*+
53 O Jahwe Tuhan Si Meganjangna, enggo pilihNdu kalak e jadi umatNdu arah kerina bangsa si lit i doni,+ bagi si katakenNdu man budakNdu Musa sanga babaNdu nini bulang kami ndarat arah Mesir.”
54 Kenca dung peseh Salomo kerina pertoton ras pemindonna man Jahwe janahna sujud ras ngangkat tanna ku langit i lebe-lebe ingan nutung persembahen man Jahwe, tedis ia.+
55 Janahna tedis pasu-pasuna kerina bangsa Israel alu sora si megang, nina,
56 “Terpujilah Jahwe si enggo mereken kedamen* man umatNa Israel bagi si enggo janjikenNa.+ Arah kerina janjiNa si mehuli si banNa arah budakNa Musa, la lit sada kata pe si la tepatiNa.+
57 Mbera-mbera Jahwe Dibatata lit ras kita bagi Ia lit ras nini bulangta.+ Mbera-mbera perdiatekenNa kita janah la tadingkenNa.+
58 Mbera-mbera iahkenNa pusuhta+ gelah siikutken kerina dalan-dalanNa janah terus matuhi perentahNa, peraturenNa, bage pe undang-undangNa, si enggo perentahkenNa man nini bulangta gelah lakoken kalak e.
59 Mbera-mbera kata-kata ras pemindonku man Jahwe enda terus inget Jahwe Dibatata, suari ras berngi. Gelah berekenNa keadilen man budakNa ras umatNa Israel menurut si perluken kalak e tiap wari.
60 Alu bage kerina bangsa si lit bas doni enda meteh maka Jahwe ngenca Dibata si benar,+ la lit si deban!+
61 Emaka bulatlah ukur kena+ ngelayani Jahwe Dibatata alu matuhi peraturenNa ras perentahNa bagi si lakoken kena bas wari enda.”
62 Kenca si e, raja bage pe kerina kalak Israel mpersembahken melala kel korban i lebe-lebe Jahwe.+
63 Persembahken Raja Salomo korban persadan+ man Jahwe, eme 22.000 lembu ras 120.000 biri-biri. Bage me raja ras kerina kalak Israel ngeresmiken rumah Jahwe.+
64 Bas wari e arus ipebadia raja bagin tengah halamen si lit i lebe-lebe rumah Jahwe. I je persembahkenna persembahen tutungen, persembahen pangan,* ras lemak korban persadan, sebap ingan nutung persembahen si iban arah tembaga nari+ si lit i lebe-lebe Jahwe enggo lanai siat nampung kerina persembahen tutungen, persembahen pangan ras lemak+ korban persadan.
65 Paksa si e, Salomo erban perayan+ ras kerina kalak Israel bage pe kerina kalak si enterem si reh mulai daerah Hamat* nari seh ku daerah Lau* Mesir.+ Pulung kalak e i lebe-lebe Jahwe Dibatata sedekah 7 wari janah tambah ka 7 wari nari, kerinana lit 14 wari.
66 Paginna* suruh raja kerina kalak e mulih. Pasu-pasu kalak e raja, jenari mulih kalak e ku rumahna alu meriah ukur janah senang kel akapna,+ sebap enggo idah kalak e kerina perbahanen Jahwe si mehuli man budakNa Daud ras man umatNa Israel.
Cataten i teruh
^ Ntah “Peti Perpadanen.”
^ Maksudna, Perayan Sapo-Sapo.
^ Ntah “Gunung Sinai.”
^ As. “Anakndu, anak si ndarat arah awakndu.”
^ As. “si bulat ukurna erdalan i lebe-lebeNdu.”
^ Sumpah si imaksud i je eme sumpah si banci erban kena hukumen adi kai si ikataken e la tuhu.
^ Ntah “perban peterukNdu.”
^ As. “bas gerbang-gerbang negrina.”
^ Ntah “warisenNdu.”
^ Ntah “janah begikenNdu min kai pe si pindo kalak e man baNdu.”
^ Ntah “ingan tading si aman.”
^ Ntah “daerah dalan masuk ku Hamat.”
^ As. “Bas wari pewaluhken.” Maksudna, sada wari kenca perayan pitu wari si peduaken.
