1 Raja-Raja 9:1-28
9 Kenca dung bangun Salomo rumah Jahwe, istana raja,+ ras kerina si atena bangunna,+
2 cidahken Jahwe diriNa pedua kaliken man Salomo bagi sanga i Gibeon.+
3 Nina Jahwe bana, “Enggo Kubegiken totondu bage pe pemindon si banndu i lebe-lebeKu. Enggo Kupebadia rumah si bangunndu e janah Kutama gelarKu i je seh rasa lalap.+ Rasa lalap pagi Kuperdiateken rumah e ras Kulindungi.+
4 Janah kam, adi setia kam ngikutken dalanKu alu bulat ukur+ ras alu pusuh si bersih,+ bagi bapakndu Daud,+ janah lakokenndu kerina perentahKu,+ patuhindu peraturenKu ras undang-undangKu,+
5 Kuban pagi tahta kerajanndu paguh, bagi perjanjin si enggo Kuban man Daud bapakndu. Enggo Kujanjiken man bana, ‘Keturunenndu pagi si lalap kundul bas tahta Israel.’+
6 Tapi adi kena ras anak-anak kena lanai ngikutken Aku, janah la terus patuhi kena perentahKu ras undang-undang si enggo Kubereken man kena, jenari lawes kena nadingken Aku janah sembah kena dibata-dibata si deban ras sujud kena man bana,+
7 Kupelawes pagi kalak Israel arah negri si enggo Kubereken man kalak e.+ Janah lanai Kunen rumah si enggo Kupebadia guna gelarKu e.+ Kuban ka kalak Israel ihina ras itokoh-tokohi i tengah bangsa-bangsa.+
8 Rumah e pe hancur pagi.+ Tiap lit kalak si lewat mamang atena ngidahsa jenari ihinana,* nina, ‘Uga maka bage naring ban Jahwe man negri enda ras man rumah enda?’+
9 Jenari nina kalak, ‘Em perban enggo tadingken kalak e Jahwe Dibatana, si enggo maba nini bulang kalak e ndarat arah negri Mesir nari. Ikutken kalak e dibata-dibata si deban, sujud kalak e man bana janah sembahna. E me sebapna ban Jahwe kerina bencana enda terjadi man kalak e.’”+
10 Kenca bangun Salomo duana rumah e sedekah 20 tahun, eme rumah Jahwe ras istana raja,+
11 bereken Raja Salomo man Hiram+ raja Tirus 20 kota si lit i Galilea, sebap enggo sediaken Hiram man Salomo kayu aras ras kayu juniper bage pe emas si buena bagi si pindo Salomo.+
12 Emaka lawes Hiram arah Tirus guna ngenen kota-kota si bereken Salomo e, tapi la ia puas ngidah kota-kota e.
13 Nina, “O Seninaku, engkai maka kota-kota si bage berekenndu man bangku?” E me sebapna kota-kota e igelari Negri Kabul* seh ngasa gundari.
14 Lit 4 ton 104 kilo* emas si enggo ikirim Hiram man raja.+
15 Perentahken Raja Salomo gelah kerja paksa+ kalak guna mbangun rumah Jahwe,+ istana, Bukit,*+ tembok Jerusalem, Hasor,+ Megido,+ ras Geser.+
16 Kota Geser e hadiah perjabun arah raja Mesir man anakna+ si jadi diberu Salomo. Mbarenda kota e irebut raja Mesir, tutungna janah bunuhna kalak Kanaan+ si tading i kota e.
17 Bangun Salomo mulihi kota Geser, Bet Horon Teruh,+
18 Baalat,+ bage pe Tamar si lit i taneh mesawang* bas daerah Israel.
19 Bangunna ka kerina kota si jadi ingan penyimpanen Salomo, bage pe kota si jadi ingan gereta perang,+ ras kota-kota si jadi ingan prajurit si erkuda. Bangun Salomo ka kerina si enggo rencanakenna bas Jerusalem, bas Libanon, bage pe bas kerina daerah si kuasaina.
20 Kerina kalak si tading denga arah suku Amori, Het, Peris, Hewi, ras Jebusi,+ kalak e labo bagin bangsa Israel.+
21 Keturunen kalak e si tading bas Israel janah si la banci ibunuh kalak Israel, perentahken Salomo gelah kalak e kerja paksa jadi budak seh asa wari enda.+
22 Tapi la lit sekalak pe kalak Israel si iban Salomo jadi budak,+ sebap banna kalak e jadi prajurit, pelayan, pejabat, ajudan, bage pe peminpin prajurit si ergereta ras si erkuda.
23 Lit 550 pejabat daerah si ngawasi pendahin guna Salomo. Kalak e si jadi pengawas kalak si erdahin i je.+
24 Pindah putri raja Mesir+ arah Kota Daud+ ku rumahna si enggo ibangun Salomo. Kenca si e, ibangun Salomo me Bukit.*+
25 Telu kali setahun+ persembahken Salomo korban tutungen ras korban persadan bas ingan nutung* persembahen si banna man Jahwe.+ Tutungna ka korban i datas ingan nutung persembahen si lit i lebe-lebe Jahwe gelah ku das asapna. Bage me Salomo ndungi rumah e.+
26 Ban Raja Salomo ka kapal-kapal i Esion-geber+ si lit i deher Elat, i tepi Laut Merah si lit i negri Edom.+
27 Kirim Hiram pelayan-pelayanna radu ras kapal-kapal e,+ bage pe pelaut-pelaut si erpengalamen guna erdahin ras pelayan-pelayan Salomo.
28 Jenari lawes kalak e erlayar ku Opir+ guna muat 14 ton 364 kilo* emas. Kenca si e, bereken kalak e man Raja Salomo.
Cataten i teruh
^ As. “ersuit.”
^ Ntah banci saja “Negri si La Erguna.”
^ Ntah “Milo.” Istilah Heber si ertina “taneh si ergun-gun.”
^ Taneh si mbelang si jarang iingani.
^ Ntah “Milo.” Istilah Heber si ertina “taneh si ergun-gun.”
