1 Samuel 1:1-28
1 Lit sekalak dilaki arah Rama* nari,+ i daerah pegunungen Eperaim,+ gelarna Elkana.+ Ia anak Jeroham, Jeroham e anak Elihu, Elihu e anak Tohu, Tohu e anak Sup, sekalak Eperaim.
2 Lit dua diberuna. Sada gelarna Hanna, sada nari gelarna Penina. Penina lit anak-anakna, tapi Hanna la lit anakna.
3 Tiap tahun, lawes Elkana arah kotana nari ku Silo guna nembah man Jahwe penguasa malekat+ ras mpersembahken korban man baNa. I je lit dua anak Eli, eme Hopni ras Pinehas,+ kalak e ngelayani jadi imam man Jahwe.+
4 Bas sada wari, sanga persembahken Elkana korban, berekenna piga-piga bagin korban e man diberuna eme Penina, bage pe man kerina anakna si dilaki ras si diberu.+
5 Tapi Hanna, amin pe la bere Jahwe anak man bana,* bereken Elkana sada bagin si istimewa man Hanna, sebap ia si atena ngena.
6 Perban la bere Jahwe anak man Hanna, tokoh-tokohi Penina* lalap Hanna gelah ceda ukurna.
7 Tiap tahun sanga kalak e lawes ku rumah Jahwe,+ bage lalap lakoken Penina, tokoh-tokohina Hanna seh ngasa tangis ia janah la nggit man.
8 Emaka sungkun Elkana ia, “Hanna, engkai maka kam tangis? Engkai maka la kam nggit man? Engkai maka kam sedih? La kin ulin aku asangken sepuluh anak dilaki?”
9 Kenca enggo dung kalak e man ras minem i Silo, lawes Hanna. Sanga si e, Imam Eli sangana kundul i kursi deher tiang pintu rumah pertoton*+ Jahwe.
10 La tanggung sedakna akap Hanna, emaka ertoto ia man Jahwe+ janahna ngandung terkesi-kesi.
11 Erjanji ia, “O Jahwe, penguasa malekat. Nen min uga cedana ukurku. Adi ingetNdu kin aku janah labo lupakenNdu aku, bereken min man budakNdu enda sekalak anak dilaki.+ Kubereken pagi ia man baNdu Jahwe, guna ngelayani Kam segedang geluhna, janah bukna ndigan pe la ipangkas.”+
12 Ndekah kel Hanna ertoto man Jahwe, janah perdiateken Eli biberna.
13 Ertoto Hanna bas pusuhna, biberna ngenca si kemuit, tapi sorana la terbegi. Emaka akap Eli ia mabuk.
14 Nina Eli man bana, “Engkai maka kam mabuk? Ula nai kam minem-minem.”
15 Nina Hanna ngaloi, “Lang, labo aku mabuk, Tuan. Labo aku minem anggur ntah pe minem inemen si lit alkoholna, tapi ceda kel sangana ukurku janah kupeseh kerina isi pusuhku man Jahwe.+
16 Ula akapndu budakndu enda diberu si la erguna, ndai nari seh asa gundari terus aku ertoto perban ceda kel ukurku janah susah kel kuakap.”
17 Nina Eli, “Mulihlah kam alu dame. Mbera-mbera bereken Dibata Israel man bandu kai si pindondu.”+
18 Ngaloi Hanna, “Mbera-mbera jadi atendu aku, budakndu enda, Tuan.” Mulih Hanna janah man ia, kenca si e teridah arah ayona enggo lanai kapna sedih.
19 Paginna, medak kalak e pagi-pagi si lampas, jenari sujud kalak e nembah Jahwe. Kenca si e, mulih kalak e ku rumahna i Rama.+ Erhubungen seks Elkana ras diberuna Hanna, janah inget Jahwe me Hanna.+
20 Bas sada tahun,* hamil Hanna, lahirkenna sekalak anak dilaki. Banna gelarna+ Samuel,* sebap nina, “Arah Jahwe ia kupindo.”
21 Seh waktuna Elkana bage pe kerina keluargana lawes mpersembahken korban persembahen tahunen man Jahwe,+ bage pe mereken persembahen guna nepati janjina.
22 Tapi Hanna la ikut,+ katakenna man dilakina, “Adi enggo ngadi pagi anakta enda minem, kutaruhken pagi ia ku rumah* Jahwe, i je pagi ia tading segedang geluhna.”+
23 Nina Elkana man bana, “Banlah kai kapndu si mehulina. Tetaplah kam i rumah seh asa ngadi ia minem. Mbera-mbera ban Jahwe terjadi bagi si katakenndu.” Emaka tetap Hanna tading i rumah janah urusna anakna seh ngasa ngadi ia minem.
24 Kenca enggo ngadi anakna e minem, babana ia ku Silo.+ Babana ka sada lembu jantan si umurna telu tahun, tepung 11 kilo,* bage pe inemen anggur bas sada ingan si galang.+ Seh Hanna ras anakna si kitik e i rumah Jahwe.
25 Jenari ipotong me lembu jantan e, janah anak e ibaba ku Eli.
26 Nina Hanna, “Ersumpah aku i lebe-lebendu, Tuan si nggeluh, aku kap diberu si mbarenda tedis ras kam bas ingan enda guna ertoto man Jahwe.+
27 Mbarenda ertoto aku mindo anak e, janah enggo bereken Jahwe man bangku kai si kupindoken.+
28 Gundari, kubereken* ia man Jahwe. Segedang geluhna ia jadi jang Jahwe.”
Kenca si e, sujud ia* man Jahwe i je.
Cataten i teruh
^ Ntah “Ramataim-sopim, kesusuren Sup.”
^ As. “amin pe enggo itutup rahimna.”
^ Ntah “saingenna.”
^ Maksudna, kemah ingan ersembah.
^ Ntah banci saja “I bas waktuna.”
^ Ertina “Gelar Dibata.”
^ As. “ku lebe-lebe.”
^ As. “kupinjamken.”
^ Mungkin Elkana.
