1 Samuel 10:1-27
10 Buat Samuel botol minak janah curcurkenna minak e ku takal Saul.+ Kenca si e ema Samuel ia, nina, “La kin Jahwe si enggo milih kam jadi peminpin+ kerina umatNa?+
2 Kenca tadingkenndu aku sendah, jumpa kari kam ras dua dilaki i deher kuburen Rahel,+ si lit i daerah Benyamin i Selsa, janah ning kalak e kari man bandu, ‘Kelede-kelede si daramindu ndai enggo dat, janah lanai kelede-kelede ndai si ukuri bapakndu,+ tapi gundari kam nge si jadi ukurenna. Nina, “Lenga kap mulih anakku ndai, kai nge si arus kulakoken?”’
3 Jah nari kari laweslah kam seh ngasa batang kayu si galang si lit i Tabor. Jumpa kari kam i je ras telu dilaki si atena lawes ndahi Dibata si benar i Betel.+ Sekalak maba telu anak kambing, sekalak maba telu roti si kibul, janah sekalak nari maba lau anggur bas ingan si galang.
4 Sungkun kalak e pagi beritandu janah berekenna pagi dua roti man bandu. Arus alokenndu roti si iberekenna e.
5 Kenca si e, laweslah kam ku bukit Dibata si benar, si i je lit pasuken Pilisti. Sanga lawes kam ku kota, jumpa pagi kam ras sada kelompok nabi si nusur arah ingan si meganjang nari si sangana ernubuat. Bas lebe-lebe kalak e lit kalak si main alat musik si ersenar, rebana, suling, ras harpa.*
6 Erdahin pagi kesah si badia Jahwe bas kam,+ emaka ikut pagi kam ernubuat ras nabi-nabi e, tempa-tempa kam enggo berubah jadi kalak si deban.+
7 Kenca enggo terjadi pagi tanda-tanda e, lakokenlah kerina si banci lakoken tanndu, sebap ras kam kap Dibata si benar.
8 Kenca si e, lebenlah kam lawes ku Gilgal.+ Aku pe lawes kang pagi ku jah guna mpersembahken korban tutungen bage pe korban persadan. Arus timaindu pitu wari i je seh ngasa aku reh. Jenari kukataken pagi man bandu kai si arus lakokenndu.”
9 Kenca lawes Saul nadingken Samuel, ubah Dibata perukurenna janah kerina tanda e terjadi bas wari e.
10 Emaka lawes kalak e* je nari ku bukit, janah jumpa kalak e ras sada kelompok nabi. Sanga si e pe erdahin kesah si badia bas Saul,+ janah mulai ia ernubuat+ ras nabi-nabi si deban si lit i je.
11 Sanga kalak si mbarenda nari enggo nandai Saul ngidah Saul enggo ernubuat, sisungkun-sungkunen kalak e, “Kena kai nge anak Kis e? Saul pe enggo jadi nabi?”
12 Nungkun sekalak dilaki si i je, “Uga kerna nabi-nabi si deban enda? Ise kin bapak kalak e?” E me sebapna rusur kataken kalak,* “Saul pe enggo jadi nabi?”+
13 Kenca dung Saul ernubuat, lawes ia ku ingan si meganjang.
14 Kenca si e, ngerana senina bapak Saul man Saul ras suruh-suruhenna, “Ku ja kena sedekah enda?” Nina Saul, “Ndarami kelede,+ tapi perban la dat kami, lawes kami ndahi Samuel.”
15 Nina senina bapak Saul, “Ceritaken man bangku, kai si kataken Samuel man bandu?”
16 Nina Saul ngaloi, “Katakenna man bangku enggo dat kelede-kelede e.” Tapi, la ceritaken Saul kerna si kataken Samuel maka ia jadi raja pagi.
17 Kenca si e, dilo Samuel bangsa e gelah pulung i lebe-lebe Jahwe i Mispa,+
18 nina Samuel man kalak Israel, “Bagenda si kataken Jahwe Dibata Israel, ‘Aku kap si maba kalak Israel ndarat arah Mesir nari, janah si nelamatken kena arah tan kalak Mesir+ bage pe arah tan kerina kerajan si ngelawan kena.
19 Tapi gundari, enggo tulak kena Dibata kena+ Si Nelamatken kena arah kiniseran bage pe kesusahen kena, janah ning kena, “Labo dalih! Arus lit raja si merentah kami.” Emaka gundari, tedislah kena i lebe-lebe Jahwe menurut suku bage pe keluarga kena.’”
20 Emaka suruh Samuel kerina suku Israel reh ngadap,+ janah suku Benyamin si ipilih.+
21 Kenca si e, suruh Samuel suku Benyamin reh ngadap, keluarga per keluarga. Janah, keluarga Matri si ipilih. Dungna, Saul anak Kis si ipilih.+ Tapi, sanga darami kalak e ia, i japa pe la ia idah.
22 Emaka sungkun kalak e Jahwe,+ “Enggo nge ia seh jenda?” Nina Jahwe, “I jah ia, cebuni ia i balik barang-barang ah.”
23 Emaka kiam kalak e, baba kalak e ia ndarat ku tengah-tengah jelma si enterem. Sanga tedis ia i tengah-tengah jelma si enterem e, ia si gedangna asangken kerina kalak si deban.*+
24 Nina Samuel man bangsa e, “Nenlah kalak si enggo ipilih Jahwe,+ la lit si bagi ia i tengah-tengah bangsa enda.” Emaka, kerina kalak e ersurak, “Hidup Raja!”
25 Ikataken Samuel man bangsa e kerna kerina hak sekalak raja+ janah tuliskenna e bas sada buku, jenari simpanna i kemah Jahwe. Kenca si e, suruh Samuel kerina kalak e mulih ku rumahna sekalak-sekalak.
26 Saul pe mulih ku rumahna i Gibea, janah piga-piga pejuang si ukurna enggo ersuruh iban Jahwe ikut ngarak-ngarak ia.
27 Tapi, piga-piga kalak si la terpake ngataken, “Ja nge ia ngasup nelamatken kita!”+ Isepeleken kalak e kel Saul, janah la lit bereken kalak e hadiah kai pe man bana.+ Tapi Saul sinik saja.*
Cataten i teruh
^ Harpa eme alat musik si ersenar bagi gitar, tapi bentukna beda.
^ Mungkin si imaksud eme Saul ras pelayanna.
^ Ntah “E me sebapna lit kuan-kuan.”
^ As. “kerina kalak ngayak barana ngenca gedangna.”
^ As. “Tapi Saul bagi kalak bisu.”
