1 Samuel 11:1-15
11 Kenca si e, Nahas raja kalak Ammon,+ reh maba pasukenna janah erkemah kalak e guna nyerang kota Jabes+ i Gileat. Ngerana kerina kalak Jabes man Nahas, “Banlah perjanjin ras kami, alu bage layani kami kam.”
2 Ngaloi Nahas kalak Ammon e, “Nggit aku erban perjanjin ras kena, tapi kerina mata kena si sebelah kanan arus icungkil. Kuban bage gelah mela akap kerina kalak Israel.”
3 Nina peminpin-peminpin Jabes man bana, “Bere min kami waktu pitu wari, gelah suruh kami kalak si maba berita lawes ku kerina daerah Israel. Kenca si e, adi la lit pagi si nelamatken kami, nyerah kami.”
4 Sanga seh kalak si maba berita e ku Gibea+ eme ingan Saul, pesehna berita e man kerina kalak si lit i je, emaka nderkuh kerina kalak e alu sora si megang.
5 Sanga si e, mulih Saul arah juma nari ras asuh-asuhenna, janah sungkunna, “Kai si terjadi? Engkai maka tangis kalak e kerina?” Emaka ceritaken kalak e man bana kai si kataken kalak Jabes ndai.
6 Sanga ibegi Saul kata-kata e, erdahin kesah si badia Dibata bas ia,+ janah merawa kel ia.
7 Emaka buat Saul dua lembu jantan janah potongna jadi piga-piga bagin. Kenca si e, kirimna e arah kalak si maba berita ku kerina daerah Israel, janah nina, “Ise pe si la nggit ngikutken Saul ras Samuel, bagenda pagi lembuna ipotong-potong.” Mbiar bangsa e man Jahwe, emaka reh ia kerina janah ersada arihna.
8 Kenca si e, hitungna kalak e i Besek. Lit 300.000 kalak Israel ras 30.000 kalak Juda.
9 Jenari, kataken kalak e* man kalak si maba berita e, “Bagendalah ning kena man kalak Jabes i Gileat, ‘Sanga ciger wari, iselamatken pagi kena.’” Emaka berita e ipeseh kalak si maba berita man kalak Jabes, janah meriah kel ukur kalak e.
10 Jenari kataken kalak Jabes man kalak Ammon, “Pagi nyerah nge kami. Lakokenlah man kami kai pe si akap kena cocok.”+
11 Paginna, bagi Saul pasukenna jadi telu kelompok. Sanga erpagi-pagi si lampas,* lawes kalak e ku ingan musuh erkemah, jenari bunuh kalak e kalak Ammon+ seh ngasa nandangi ciger. Kalak si selamat pe merap kerina, kiamen ia sekalak-sekalak.
12 Kenca si e, nina kalak e man Samuel, “I ja kalak si ngataken Saul la cocok jadi rajata?+ Serahken kalak e man kami gelah bunuh kami ia.”
13 Tapi nina Saul, “Sekalak pe la banci ibunuh bas wari enda,+ sebap bas wari enda enggo selamatken Jahwe kalak Israel.”
14 Jenari, nina Samuel man bangsa e, “Ota kita lawes ku Gilgal+ gelah sisahken sekali nari maka Saul kap rajata.”+
15 Emaka lawes kerina kalak e ku Gilgal, janah i je ban kalak e Saul jadi raja i lebe-lebe Jahwe. Kenca si e, persembahken kalak e i je korban persadan i lebe-lebe Jahwe,+ janah irayaken Saul ras kerina kalak Israel alu dem keriahen ukur.+
Cataten i teruh
^ Mungkin si imaksud eme Saul ras pasukenna.
^ Maksudna, kira-kira jam 2 seh ku jam 6 erpagi-pagi.
