1 Samuel 12:1-25
12 Kenca bage, kataken Samuel man kerina kalak Israel, “Enggo kulakoken kerina si pindo kena man bangku, janah enggo kupilih raja guna merentah kena.+
2 Enda raja si minpin kena!+ Enggo kupinpin kena, mulai kin aku nguda denga seh ngasa gundari.+ Tapi gundari aku enggo metua, bukku pe enggo ubanen, anak-anakku pe lit ras kena i jenda.+
3 Enda kap aku. Adi lit akap kena si la pas kerna aku, katakenlah e i lebe-lebe Jahwe bage pe kalak si pilihNa.+ Ise kin arah kena si pernah kubuat lembuna ntah pe keledena?+ Ntah, ise kin arah kena si pernah kutipu ntah kutindas? Arah ise kin pernah kualoken sogok gelah kuhakimi kalak alu la adil?+ Adi pernah kin, kuulihken pagi si e kerina man kena.”+
4 Ngaloi kalak e, “Labo pernah tipundu ntah pe tindasndu kami, labo pernah alokenndu kai pe arah ise pe.”
5 Nina Samuel man kalak e, “Jahwe ras kalak si pilihNa kap si jadi saksi bas wari enda maka labo lit kai pe tuduhen kena man bangku.” Ngaloi kalak e, “Payo, Ia* si jadi saksina.”
6 Emaka nina Samuel man kalak e, “Jahwe si milih Musa ras Harun bage pe si maba nini bulang kena ndarat arah taneh Mesir nari,+ Ia kap si jadi saksina.
7 Gundari, tetaplah kena tedis, janah aku si jadi hakim kena i lebe-lebe Jahwe kerna kerina perbahanen Jahwe si mehuli si enggo lakokenNa man kena bage pe man nini bulang kena.
8 “Seh kenca Jakup i Mesir+ janah nini bulang kena mulai erlebuh mindo penampat Jahwe,+ suruh Jahwe me Musa+ ras Harun minpin nini bulang kena ndarat arah Mesir nari, jenari ban Musa ras Harun kalak e tading bas ingan enda.+
9 Tapi lupaken kalak e Dibatana eme Jahwe, emaka dayaken Dibata me kalak e+ ku tan Sisera+ eme peminpin pasuken Hasor, ku tan kalak Pilisti, bage pe ku tan raja Moap. Kalak Pilisti,+ raja Moap,+ bage pe Sisera terus erperang ngelawan kalak Israel.
10 Erlebuh kalak e mindo penampat Jahwe,+ nina, ‘Kami enggo erdosa,+ sebap enggo tadingken kami Jahwe janah layani kami Baal+ bage pe patung-patung Astarte.+ Gundari selamatken min kami arah tan musuh-musuh kami gelah banci kami ngelayani Kam.’
11 Emaka suruh Jahwe me Jerubaal,+ Bedan, Jepta,+ bage pe aku*+ nelamatken kena arah tan musuh-musuh kena si lit i sekeliling kena, alu bage banci tenang geluh kena.+
12 Sanga idah kena Nahas+ eme raja kalak Ammon reh nyerang kena, lalap kataken kena man bangku, ‘Labo dalih! Pokokna arus lit raja si merentah kami!’+ padahal Raja kena eme kap Jahwe Dibata kena.+
13 Gundari, enda raja si enggo pilih kena, si pindo kena. Enggo lantik Jahwe sekalak raja guna merentah kena.+
14 Mehuli kel adi mbiar kena man Jahwe,+ layani kena Ia,+ begiken kena soraNa,+ janah la lawan kena perentah Jahwe. Mehuli kel adi kena bage pe raja si merentah kena ngikutken Jahwe, Dibata kena.
15 Tapi adi la begiken kena sora Jahwe janah lawan kena perentah Jahwe, pasti ihukum Jahwe kena ras bapak kena.+
16 Gundari, tetaplah kena tedis janah nenlah perbahanen Jahwe si luar biasa si lakokenNa i lebe-lebe mata kena.
17 La kin gundari musim rani gandum? Erlebuh ateku man Jahwe gelah banNa lenggur ras udan. I je kari teh kena ras angkai kena maka jahat kel perbahanen kena bas mata Jahwe, perban enggo pindoken kena sekalak raja.”+
18 Jenari erlebuh Samuel man Jahwe, janah ban Jahwe lenggur ras udan bas wari e, emaka tuhu-tuhu mbiar kel kerina kalak e man Jahwe bage pe man Samuel.
19 Janah nina kalak e kerina man Samuel, “Ertotolah man Jahwe Dibatandu guna kepentingen kami,+ sebap la ate kami mate perban enggo tambahi kami dosa kami alu mindo sekalak raja.”
20 Emaka nina Samuel man kalak e, “Ula kena mbiar. Payo tuhu enggo lakoken kena kerina perbahanen si jahat enda. Gundari, ula nai tadingken kena Jahwe,+ janah layanilah Jahwe alu bulat ukur.+
21 Ula tadingken kena Dibata si benar guna ngikutken dibata-dibata palsu+ si la erguna+ janah la banci nelamatken, sebap labo lit kuasana.
22 Labo tadingken Jahwe bangsaNa+ sebap enggo pilih Jahwe kena jadi bangsaNa,+ guna kepentingen gelarNa si mbelin.+
23 Tapi aku, la mungkin kulakoken dosa man Jahwe alu lanai notoken kena. Terus nge pagi kuajarken dalan si benar ras si mehuli man kena.
24 Arus kena mbiar man Jahwe,+ janah layanilah Ia alu setia* ras bulat ukur. Ingetlah kerina perbahanenNa si luar biasa si enggo lakokenNa man kena.+
25 Tapi adi sengaja kena ngelakoken si jahat, ikernepken pagi kena+ bage pe raja kena.”+
Cataten i teruh
^ Ntah banci saja “kalak si pilih Dibata.”
^ As. “Samuel.”
^ Ntah “Ia bas kebenaren.”
