1 Samuel 13:1-23
13 Sanga Saul jadi raja,+ umurna . . .* tahun, janah enggo dua tahun dekahna ia merentah bas Israel.
2 Pilih Saul 3.000 kalak arah Israel nari, janah 2.000 arah kalak e radu ras Saul i Mikmas bage pe i daerah pegunungen si lit i Betel, janah 1.000 nari radu ras Jonatan+ i Gibea+ Benyamin. Si debanna, isuruh Saul mulih ku kemahna sekalak-sekalak.
3 Kenca si e, taluken Jonatan pasuken Pilisti+ si lit i Geba,+ janah begi kalak Pilisti kerna si e. Emaka suruh Saul gelah iembus trompet+ bas kerina daerah Israel, janah iumumken, “O kena kerina kalak Heber, begikenlah!”
4 Kerina kalak Israel megi berita enda: “Enggo taluken Saul pasuken Pilisti, janah gundari segat kel ate kalak Pilisti man kalak Israel.” Emaka ilebuh me jelma si enterem gelah ngikutken Saul i Gilgal.+
5 Kalak Pilisti pe pulung guna erperang ngelawan kalak Israel. Lit 30.000 gereta perangna, 6.000 prajuritna si erkuda, janah lit ka pasuken prajuritna si deban si teremna bagi kersik i tepi laut.+ Lawes kalak e janah erkemah i Mikmas, si lit i sebelah timur Bet-Awen.+
6 Sadar kalak Israel maka kalak e lit bas bahaya, perban enggo tuhu-tuhu kicat kel kalak e. Emaka cebuni kalak e bas gua,+ i celah-celah batu, i tebing batu, i lubang si lit bas teruh taneh, bage pe bas sumur.*
7 Lit ka piga-piga kalak Heber si nyebrangi Lau Jordan, janah lawes ku daerah Gat ras Gileat.+ Tapi Saul tetap i Gilgal, janah kerina kalak si ngikutken ia nggirgir perban biarna.
8 Timai Saul pitu wari dekahna seh ngasa waktu si enggo itetapken Samuel. Tapi Samuel lalap lenga reh ku Gilgal, emaka mulai tadingken kalak e Saul.
9 Dungna ikataken Saul, “Bereken man bangku korban tutungen ras korban persadan.” Jenari, persembahkenna korban tutungen e.+
10 Kenca dung persembahken Saul korban tutungen, seh me Samuel. Emaka ndarat Saul njumpai ia guna ngalo-ngalosa.
11 Jenari sungkun Samuel ia, “Engkai maka bage banndu?” Nina Saul, “Kuidah jelma si enterem enggo mulai nadingken aku,+ kam pe lalap lenga reh bas waktu si enggo itetapken, janah kalak Pilisti pe enggo pulung i Mikmas.+
12 Rukur aku, ‘Kalak Pilisti enggo ersikap nyerang aku i Gilgal, tapi lenga kuban meriah ukur Jahwe.’ E me sebapna terpaksa kupersembahken korban tutungen e.”
13 Nina Samuel man Saul, “Bodoh kel perbahanenndu e. La patuhindu perentah si enggo bereken Jahwe Dibatandu.+ Adi patuh min ndai kam, pasti ban Jahwe kerajanndu ertahan seh rasa lalap bas Israel.
14 Tapi, perban la patuhindu perentah Jahwe,+ emaka gundari kerajanndu labo banci ertahan.+ Pilih Jahwe kalak si deban si erban meriah ukurNa+ janah suruh Jahwe ia si minpin bangsaNa.”+
15 Lawes Samuel arah Gilgal ku Gibea Benyamin, janah hitung Saul kalak si tading denga ras ia, lit kira-kira 600 kalak buena.+
16 Saul ras anakna eme Jonatan, bage pe kerina kalak si lit denga ras kalak e, tading i Gibea+ Benyamin. Tapi kalak Pilisti erkemah i Mikmas.+
17 Lit telu kelompok pasuken kalak Pilisti si ndarat arah inganna erkemah guna njarah barang-barang. Sada kelompok lawes ku dalan Opra i daerah Sual.
18 Kelompok si peduaken lawes ku dalan Bet-Horon,+ janah kelompok si peteluken lawes ku perbatasen i sebrang Lembah Seboim, si ku arah taneh mesawang.*
19 Sanga si e, la lit sekalak pe bas Israel si banci erban barang-barang arah besi nari, perban nina kalak Pilisti, “Ula sempat kalak Israel banci erban pedang ntah pe tombak.”
20 Emaka, kerina kalak Israel arus ndahi kalak Pilisti guna mpetelap piso bajak, cangkul, kapak, bage pe sabi-sabina.
21 Upah guna mpetelap piso bajak, cangkul, garpu telu, kapak, bage pe mpekena tongkat permakan si erbesi eme kira-kira waluh gram pirak.*
22 E me sebapna bas wari peperangen e, Saul ras anakna eme Jonatan+ saja ngenca si lit senjatana. Kerina kalak si nemani Saul ras Jonatan, la lit sada pe si njemak pedang ras tombak.
23 Sanga si e, pasuken Pilisti lawes ku dalan sempit si lit i Lembah Mikmas.+
Cataten i teruh
^ La lit ikataken bas teks Heber asa kai umurna paksa si e.
^ Maksudna, lubang guna nimpan lau.
^ Taneh si mbelang si jarang iingani.
