1 Samuel 14:1-52
14 Bas sada wari, ngerana Jonatan+ anak Saul man kalak si maba senjatana, “Ota lawes kita nyebrang ku jah ku ingan kalak Pilisti erjaga.” Tapi la katakenna kerna si e man bapakna.
2 Saul sangana tading i deher Gibea+ i teruh batang delima i Migron, janah lit kira-kira 600 prajurit ikut ras ia.+
3 Sanga si e, Ahia anak Ahitup+ si make epod.*+ Ahitup e senina Ikabot.+ Bapak Ikabot eme Pinehas,+ bapak Pinehas eme Eli,+ imam Jahwe i Silo.+ Janah la lit si metehsa maka Jonatan enggo lawes.
4 Dalan si arus lewati Jonatan ku ingan kalak Pilisti erjaga lit i tengah-tengah dua tebing batu si bentukna bagi ipen. Gelar tebing batu e sada Boses, sada nari Sene.
5 Sada tebing batu e lit bas utara si pengalana ku Mikmas, janah sada nari lit bas selatan si pengalana ku Geba.+
6 Emaka nina Jonatan man kalak si maba senjatana, “Ota lawes kita ku ingan kalak Pilisti si erjaga, si la isunat ah.+ Mbera-mbera sampati Jahwe kita, sebap adi menang kin ate Jahwe kita, labo ise pe si banci ngambatisa, la soal kita sitik ntah pe mbue.”+
7 Nina si maba senjatana e, “Lakokenlah kai pe si cocok kapndu. Laweslah ku japa pe tendu lawes, sebap ku ja pe kam lawes kuikut-ikut nge kam.”
8 Emaka nina Jonatan, “Ota lawes kita nyebrang ku jah janah sicidahken dirita man kalak e.
9 Adi kataken kalak e, ‘Tetaplah kena i jena seh ngasa reh kami ndahi kena!’ tetap kita tedis i je janah ula kita nangkih ndahi kalak e.
10 Tapi adi kataken kalak e, ‘Nangkihlah kena ngelawan kami!’ nangkih kita, sebap serahken Jahwe me kalak e ku bas tanta. E me si jadi tanda man banta.”+
11 Emaka duana kalak e ncidahken dirina man kalak Pilisti si sangana erjaga. Nina kalak Pilisti e, “Nenlah! Enggo ndarat kalak Heber arah lubang inganna cebuni.”+
12 Emaka erlebuh prajurit si lit bas ingan erjaga e man Jonatan bage pe man si maba senjatana, “Adi pang kin kena, nangkihken mari, gelah hajar kami kena!”+ Mis kataken Jonatan man si maba senjatana, “Ikutken aku, sebap serahken Jahwe nge kari kalak e ku bas tan kalak Israel.”+
13 Nangkih Jonatan alu tan ras nahena, janah ikutken si maba senjatana ia pudi nari. Emaka mulai serang Jonatan kalak Pilisti. Kalak Pilisti si lenga mate iban Jonatan, ibunuh si maba senjatana arah pudi nari.
14 Bas serangen si pertama si lakoken Jonatan ras si maba senjatana, lit kira-kira 20 kalak si bunuh kalak e bas ingan si belangna kira-kira setengah hektar.*
15 Emaka, guntar pasuken si lit bas perkemahen kalak Pilisti bage pe si lit bas ingan erjaga. Pasuken si njarah barang-barang pe+ jadi mbiar. Doni pe mulai mugur-ugur janah mbiar kel kalak Pilisti iban Dibata.
16 Pasuken Saul si erjaga i Gibea+ Benyamin ngidah maka kacau kel situasi bas perkemahen musuh.+
17 Ikataken Saul man prajurit si ikut ras ia, “Cuba hitung kena jumlah pasuken gelah siteh ise si nadingken kita.” Sanga ihitung kalak e, itehna maka Jonatan ras si maba senjatana la lit i je.
18 Nina Saul man Ahia,+ “Babalah ku jenda Peti Perjanjin* Dibata si benar!” Sanga si e,* Peti Perjanjin Dibata si benar lit ras kalak Israel.
19 Sanga ngerana Saul man Imam Ahia, reh dekahna reh kacauna situasi bas perkemahen kalak Pilisti. Jenari nina Saul man imam e, “Lanai padah terusken.”
20 Emaka pulung Saul ras kerina pasuken si ikut ras ia janah lawes kalak e erperang. Idah kalak e kalak Pilisti sibunuhen i je alu pedang janah situasina seh kel kacauna.
21 Selain si e, kalak Heber si mbarenda ndukung kalak Pilisti bage pe kalak si lawes ku perkemahen kalak Pilisti, mulai ndukung kalak Israel si ipinpin Saul ras Jonatan.
22 Kerina kalak Israel si cebuni+ i daerah pegunungen i Eperaim megi maka kalak Pilisti enggo kiamen, emaka ikut kalak e erperang janah ayaki kalak e kalak Pilisti.
23 Terus kalak e erperang seh ku Bet-Awen.+ Selamatken Jahwe kalak Israel bas wari e.+
24 Tapi bas wari e, latih kel akap pasuken Israel, sebap enggo ersumpah Saul kerna kalak e, nina, “Cilaka kalak si man kai pe sope berngi bage pe sope kubalas musuh-musuhku!” Emaka la lit pasuken si man kai pe.+
25 Sanga si e, masuk kerina pasuken e ku kerangen, janah lit madu i taneh.
26 Sanga masuk pasuken e ku kerangen, idah kalak e naktaken madu e, tapi sekalak pe la lit si manca perban mbiar kalak e man sumpah ndai.
27 Tapi la ibegi Jonatan sanga bapakna ersumpah i lebe-lebe pasukenna.+ Emaka dudurkenna ujung tongkat si lit bas tanna janah jukjukna sarang madu e. Sanga panna madu e, mulihken gegehna.*
28 Ngidah si e, nina sekalak prajurit, “Enggo ersumpah bapakndu kerna pasukenna, nina, ‘Cilaka kalak si man kai pe bas wari enda!’+ E me sebapna latih kel akap kerina pasuken e.”
29 Tapi nina Jonatan, “Enggo susah kel bangsa e iban bapakku. Nenlah, enggo megegeh aku mulihken kenca kupan sitik madu ndai.
30 Ndauh min ndai ulin adi bas wari enda bebas pasuken e man kai pe+ si irampasna arah musuh. Pasti reh teremna min ndai kalak Pilisti si ibunuh.”
31 Bas wari e, terus bunuhi pasuken Israel kalak Pilisti, mulai Mikmas nari seh ku Ayalon,+ janah latih kel akap pasuken Israel.
32 Emaka mis ibuat kalak e biri-biri ras lembu si enggo irampasna, jenari mis gelehna i je, janah panna dagingna ras darehna.+
33 Emaka ikataken kerna si e man Saul, “Nenlah, kerina prajurit enggo erdosa man Jahwe perban ipan kalak e daging ras darehna.”+ Emaka nina Saul, “La kel kena setia. Pedasken, gulingken sada batu si galang ku jenda.”
34 Janah nina ka, “Katakenlah man kerina prajurit e, ‘Tiap kalak arus maba lembu ras biri-birina janah igelehna e i datas batu enda, jenari panna. Ula kena erdosa man Jahwe alu man daging ras darehna.’”+ Emaka reh tiap prajurit maba lembuna bas berngi e janah igelehna i je.
35 Jenari iban Saul ingan nutung* persembahen man Jahwe.+ Enda ingan nutung persembahen si pertama si banna man Jahwe.
36 Kenca si e, nina Saul, “Ota siayaki kalak Pilisti berngi enda, janah sirampas kalak e seh ngasa erpagi-pagi. Ula sipediat sekalak pe selamat.” Emaka nina pasuken e, “Lakokenlah kai pe si cocok kapndu.” Jenari nina imam, “Marilah sisungkun lebe Dibata si benar i jenda.”+
37 Sungkun Saul me Dibata, “Cocok kin kapNdu adi kuayaki kalak Pilisti ah?+ SerahkenNdu nge pagi kalak e ku tan kalak Israel?” Tapi la jawap Dibata bas wari e.
38 Emaka nina Saul, “O kena kerina peminpin pasuken, marilah ku jenda. Darami kenalah dosa kai si enggo ilakoken bas wari enda.
39 Ersumpah aku i lebe-lebe Jahwe si nggeluh, si nelamatken Israel, bicara anakku sendiri pe si ngelakoken dosa, arus ia ihukum mate.” Tapi sinik kerina pasuken e.
40 Kenca bage, kataken Saul man pasuken Israel, “Kerina kena tedis arah ah, janah aku ras anakku Jonatan tedis arah enda.” Megi si e, ikataken pasuken e, “Lakokenlah kai pe si cocok kapndu.”
41 Jenari nina Saul man Jahwe, “O Dibata Israel, jawapNdu min kami arah Tumim.”+ Saul ras Jonatan si terpilih, emaka bebas kerina pasuken e.
42 Nina Saul ka, “Siundilah+ gelah sipastiken aku ntah anakku Jonatan kin si erdosa.” Jonatan si terpilih.
43 Jenari nina Saul man Jonatan, “Kataken man bangku, kai si enggo lakokenndu?” Nina Jonatan, “Enggo kupan sitik madu si lit bas ujung tongkatku.+ Mate pe la aku mbiar!”
44 Nina Saul, “Adi la kin kam mate Jonatan, pediatlah Dibata si mereken hukumen si mberat man bangku.”+
45 Tapi nina pasuken e man Saul, “Jonatan kap si erban kalak Israel ndatken kemenangen* si mbelin e,+ arus ka kin ia mate? La banci bage! Ersumpah kami i lebe-lebe Jahwe si nggeluh maka selambar pe buk Jonatan la banci ndabuh ku taneh, sebap Dibata kap si nampati kai si lakokenna bas wari enda.”+ Alu bage, selamatken pasuken e Jonatan, janah la ia surung mate.
46 Kenca si e, lanai ayaki Saul kalak Pilisti. Emaka mulih kalak Pilisti ku daerahna.
47 Iban Saul kedudukenna selaku raja bas Israel reh paguhna. Lawanna kerina musuh si lit i sekelilingna. Lawanna kalak Moap,+ kalak Ammon,+ kalak Edom,+ raja-raja Soba,+ bage pe kalak Pilisti.+ Ku japa pe ia lawes erperang, pasti ia menang.
48 Sanga erperang, teridah kel Saul perpang. Talukenna kalak Amalek,+ janah selamatkenna Israel arah tan musuh-musuh kalak e.
49 Anak Saul si dilaki eme Jonatan, Iswi, ras Malkisua.+ Lit dua anakna diberu. Sintua gelarna Merap,+ si nguda gelarna Mihal.+
50 Gelar diberu Saul eme Ahinoam. Ahinoam e anak Ahimas. Gelar peminpin pasuken Saul eme Abner.+ Abner e anak Ner. Ner eme senina bapak Saul.
51 Bapak Saul eme Kis.+ Bapak Abner eme Ner.+ Bapak Kis ras Ner eme Abiel.
52 Segedang geluh Saul, lit lalap perang si mbelin antara Saul ras kalak Pilisti.+ Adi idah Saul kenca dilaki si megegeh ntah perpang, minter jadikenna prajuritna.+
Cataten i teruh
^ Maksudna, belang juma si dung ibajak lembu bas sada wari.
^ Ntah “Peti Perpadanen.”
^ As. “Bas wari e.”
^ As. “terang mulihken pengidahna.”
^ Ntah “keselamaten.”
