1 Samuel 15:1-35
15 Kenca si e, nina Samuel man Saul, “Enggo suruh Jahwe gelah kulantik kam jadi raja si merentah bangsaNa Israel.+ Gundari begikenlah si kataken Jahwe.+
2 Bagenda nina Jahwe penguasa malekat, ‘Kubalas ateKu kalak Amalek perban enggo lawanna kalak Israel sanga kalak e ndarat arah Mesir.+
3 Emaka gundari laweslah, seranglah kalak Amalek.+ Bunuhlah kalak e kerina, kernepken kerina+ si lit bas kalak e. Ula atendu mekuah. Arus bunuhndu kalak e,+ si dilaki, si diberu, anak-anak, bayi, lembu, biri-biri, unta, ras kelede.’”+
4 Pepulung Saul pasukenna i Telem janah kirana kalak e. Lit 200.000 prajurit si erdalan ras 10.000 prajurit arah Juda nari.+
5 Maju Saul seh ku kota kalak Amalek, janah cebuni ia bas lembah* guna nyerang kalak e.
6 Jenari nina Saul man kalak Keni,+ “Laweslah kena. Tadingkenlah kalak Amalek, gelah ula kena ikut ibunuh ras kalak e.+ Sebap enggo cidahken kena kekelengen kena si setia man kerina kalak Israel+ sanga kalak e ndarat arah Mesir nari.” Emaka lawes kalak Keni arah tengah-tengah kalak Amalek nari.
7 Kenca si e, ibunuh Saul kalak Amalek,+ mulai Hawila nari+ seh ku Sur,+ si lit i deher Mesir.
8 Tangkapna Agak+ raja kalak Amalek nggeluh-nggeluh, tapi kerina kalak si deban bunuhna alu pedang.+
9 Amin gia bage, Saul ras pasukenna la munuh Agak, bage pe kerina si mejilena ras si mburna arah lembu ras asuh-asuhen kalak Amalek, termasuk biri-biri jantan ras kerina si mejile.+ La kalak e nggit engkernepken si e kerina. Tapi si kernepkenna eme barang-barang si la erguna ras si la ngena ate kalak e.
10 Kenca si e, ngerana Jahwe man Samuel,
11 “Nyesal kel Aku perban enggo Kuban Saul jadi raja, sebap enggo tadingkenna Aku janah lanai dalankenna kata-kataKu.”+ Latih kel ukur Samuel, janah gedang-gedang berngi e terus ia ertoto man Jahwe.+
12 Medak Samuel erpagi-pagi si lampas guna njumpai Saul, tapi lit si ngatakenca man Samuel, “Saul enggo lawes ku Karmel,+ janah banna i je tugu guna mpehaga dirina.+ Jenari mulih ia ku Gilgal.”
13 Sanga jumpa Samuel ras Saul, nina Saul, “Mbera-mbera pasu-pasu Jahwe kam. Enggo kudalanken kai si kataken Jahwe.”
14 Emaka nina Samuel, “Adi bage kin, engkai maka kubegi denga sora kambing, biri-biri, ras lembu?”+
15 Nina Saul, “Si e kerina ibuat kami arah kalak Amalek nari. La kernepken prajurit-prajurit kerina si mejilena ras si mburna arah kambing, biri-biri, ras lembu kalak Amalek, perban persembahkenna tena man Jahwe Dibatandu. Tapi si debanna enggo nge kernepken kami.”
16 Megi si e, nina Samuel man Saul, “Enggo, sinikken! Kupeseh ateku kai si kataken Jahwe man bangku berngi ndai.”+ Emaka nina Saul, “Kataken.”
17 Nina Samuel ka, “Mbarenda, sanga kam iban jadi peminpin suku-suku Israel, bage pe sanga lantik Jahwe kam jadi raja Israel,+ me labo kapndu merga bandu sanga si e?+
18 Bas pudi wari, suruh Jahwe kam ndalanken sada tugas janah katakenNa, ‘Laweslah, bunuhlah kerina kalak Amalek si erdosa.+ Seranglah kalak e seh ngasa mate ia kerina.’+
19 Engkai maka la patuhindu kata-kata Jahwe? Merangap kel kam muati barang-barang jarahen,+ lakokenndu si la ngena ate Jahwe!”
20 Tapi nina Saul man Samuel, “Me enggo kupatuhi kata-kata Jahwe! Lawes nge aku ndalanken tugas si bereken Jahwe man bangku, kubaba ka nge Agak raja kalak Amalek, janah enggo kubunuh kerina kalak Amalek.+
21 Tapi buat pasuken e biri-biri ras lembu si mejilena arah jarahen si nandangi ikernepken. Si e persembahken kalak e tena man Jahwe Dibatandu i Gilgal.”+
22 Emaka nina Samuel, “Si apai kin si ngenana ate Jahwe: Mereken persembahen tutungen ras korban,+ ntah patuh man kata-kata Jahwe? Ulin kap patuh asangken mereken korban,+ janah ulin megiken alu tutus asangken lemak+ biri-biri jantan.
23 Sebap ngelawan+ Dibata bali jahatna ras ngeramal,+ janah sombong bali jahatna ras make ilmu sihir bage pe nembah berhala.* Perban lanai patuhindu perentah Jahwe,+ lanai teNa kam jadi raja.”+
24 Kenca si e, nina Saul man Samuel, “Aku enggo erdosa, sebap enggo kulanggar perentah Jahwe bage pe kata-katandu. Mbiar aku man jelma si enterem e, dungna kubegiken kai si kataken kalak e.
25 Emaka gundari, tolong, ampunilah dosaku, janah mulihlah ras aku gelah banci aku sujud man Jahwe.”+
26 Tapi nina Samuel, “Labo pagi aku mulih ras kam, sebap lanai patuhindu perentah Jahwe, janah lanai ate Jahwe kam jadi raja Israel.”+
27 Sanga lawes Samuel, tagangi Saul ujung jubah Samuel si bagi rompi, dungna merigat jubahna e.
28 Emaka nina Samuel, “Bas wari enda, enggo rigatken Jahwe kerajan Israel arah kam nari, janah berekenNa e man kalak si deban si ulin asangken kam.+
29 Selain si e, Dibata Israel Si Mulia,+ labo pernah erbual+ janah labo pernah ubahNa perukurenNa, sebap Ia labo manusia si banci berubah perukurenna.”+
30 Nina Saul man Samuel, “Aku enggo erdosa. Tapi tolong, ergaindu min aku i lebe-lebe peminpin bangsaku, bage pe i lebe-lebe kalak Israel. Raslah kita mulih gelah sujud pagi aku man Jahwe Dibatandu.”+
31 Emaka mulih Samuel ras Saul, janah sujud Saul man Jahwe.
32 Nina Samuel, “Babalah ku jenda Agak raja kalak Amalek.” Emaka reh Agak ndahi Samuel janah mbiar* kel ia, sebap enggo sempat ndai ia rukur, ‘Labo pagi aku ibunuh.’
33 Tapi nina Samuel, “Bagi pernanden si enggo kebenen anakna perban pedangndu, bage ka nandendu pasti kebenen anakna.” Kenca si e, ipotong-potong Samuel me Agak i lebe-lebe Jahwe i Gilgal.+
34 Jenari, mulih Samuel ku Rama, janah Saul pe mulih ku rumahna i Gibea Saul.
35 Lanai pernah jumpa Samuel ras Saul seh ngasa Samuel mate, sebap seh kel sedihna akap Samuel perban Saul.+ Jahwe pe menyesal perban enggo banNa Saul jadi raja Israel.+
