1 Samuel 16:1-23
16 Emaka nina Jahwe man Samuel, “Asa kai nari dekahna latih ukurndu perban Saul?+ Enggo Kutulak ia jadi raja Israel.+ Isilah minak+ ku sada tanduk,* laweslah kam ndahi Isai+ kalak Betlehem, sebap enggo Kupilih salah sada anakna jadi raja.”+
2 Tapi nina Samuel, “Uga ningku lawes? Adi begi Saul pagi kerna si e, pasti bunuhna aku.”+ Ngaloi Jahwe, “Babalah sada lembu si nguda denga janah kataken, ‘Aku ku jenda guna mpersembahken korban man Jahwe.’
3 Undang Isai ku inganndu mpersembahken korban. I je pagi Kukataken man bandu kai si arus lakokenndu. Arus lantikndu man bangKu kalak si Kutuduhken man bandu.”+
4 Lakoken Samuel kai si kataken Jahwe. Kenca seh Samuel i Betlehem,+ jumpai peminpin-peminpin kota e Samuel janah nggirgir kalak e perban biarna. Nina kalak e, “Me si mehuli nge tujunndu reh ku jenda?”
5 Nina Samuel, “Ue, si mehuli. Reh aku ku jenda guna mpersembahken korban man Jahwe. Emaka, pebadialah diri kena janah ikutken aku mpersembahken korban.” Emaka ipebadia Samuel me Isai ras anak-anakna si dilaki, jenari undangna kalak e ikut mpersembahken korban.
6 Kenca seh kalak e janah idah Samuel si Eliap,+ nina Samuel, “Pasti ia si lantik Jahwe.”
7 Tapi nina Jahwe man Samuel, “Ula nenndu penampilenna bage pe gedang dagingna,+ perban labo ia si Kupilih. Sebap cara manusia ngenen la seri ras cara Dibata ngenen. Adi manusia, nenna kai si teridah, tapi Jahwe nenNa isi pusuh kalak.”+
8 Kenca si e, lebuh Isai me Abinadap+ janah babana ngadap Samuel, tapi nina Samuel, “Ia pe labo ipilih Jahwe.”
9 Kenca si e, baba Isai ka Sammah,+ tapi nina Samuel, “Ia pe labo ipilih Jahwe.”
10 Emaka, baba Isai pituna anakna si dilaki ngadap Samuel, tapi nina Samuel man Isai, “Sada pe kalak enda la ipilih Jahwe.”
11 Dungna nina Samuel man Isai, “Enda kin ngenca anakndu?” Nina Isai, “Lit denga si nguda,+ ia sangana mpermakani biri-biri.”+ Emaka nina Samuel man Isai, “Suruh ia ku jenda, sebap lenga kita banci man adi lenga ia reh.”
12 Emaka suruh Isai kalak ngelegisa janah babana ia njumpai Samuel. Anakna e nguda denga, mejile kel matana, janah seh kel gantengna.+ Emaka nina Jahwe, “Enda kalakna, lantiklah ia!”+
13 Emaka buat Samuel tanduk si isina minak,+ janah lantikna Daud i lebe-lebe senina-seninana. Mulai wari e, kesah si badia Jahwe erdahin bas Daud.+ Kenca si e, mulih Samuel ku Rama.+
14 Lanai bereken Jahwe kesah si badiaNa man Saul.+ Janah, pediat Jahwe latih ukur Saul.+
15 Emaka nina pelayan-pelayan Saul man bana, “O Raja, enggo pediat Dibata latih ukurndu.
16 Adi cocok kapndu Raja, suruhlah pelayan-pelayanndu enda ndarami kalak si beluh main harpa.*+ Tiap pediat Dibata latih ukurndu, mainkenna harpa e gelah tenang kapndu.”
17 Emaka nina Saul man pelayan-pelayanna, “Darami kena dage kalak si beluh main harpa, jenari baba ku jenda.”
18 Nina pelayan Saul, “Pernah kuidah lit sada anak Isai si beluh kel main harpa, kalakna perpang janah ia pejuang si megegeh.+ Beluh ia ngerana, ganteng kalakna,+ janah Jahwe ras ia.”+
19 Suruh Saul pelayanna njumpai Isai, nina, “Suruhlah anakndu Daud eme si mpermakani biri-biri reh njumpai aku.”+
20 Emaka suruh Isai me Daud lawes njumpai Saul. Kirimkenna ka roti, anak kambing, bage pe anggur si itama bas ingan si iban arah kulit, janah si e kerina tamakenna i datas kelede.
21 Reh Daud ndahi Saul janah mulai layanina Saul.+ Dungna, jadi kel ate Saul man Daud, janah banna ia si maba senjatana.
22 Kirimken Saul berita man Isai, “Pediatlah Daud tetap ngelayani aku, sebap jadi kel ateku ia.”
23 Tiap pediat Dibata latih ukur Saul, mis buat Daud harpa janah mainkenna, emaka tenang janah malem kel akap Saul, janah lanai latih ukurna.+
