1 Samuel 17:1-58
17 Pepulung kalak Pilisti+ pasukenna guna erperang. Pulung kalak e i Soko+ i daerah kalak Juda, erkemah kalak e i Epes Demin+ si lit i antara Soko ras Aseka.+
2 Saul ras pasuken Israel pe pulung janah erkemah i Lembah Ela,+ jenari ban kalak e barisen perang guna ngelawan pasuken Pilisti.
3 Pasuken Pilisti lit bas sada gunung tapi pasuken Israel bas gunung si deban, janah lit lembah i antara kalak e.
4 Lit sekalak pejuang si reh arah perkemahen kalak Pilisti nari. Gelarna Goliat,+ asalna Gat nari,+ gedangna kira-kira telu meter.*
5 Pakena pelindung takal arah tembaga bage pe baju perang.* Baju perangna e iban arah tembaga janah beratna+ kira-kira 57 kilo.*
6 Lit tembaga si ngelindungi nahena janah bas gurungna lit lembing+ tembaga.
7 Tangke tombakna galangna asa kayu si ipake bas alat tenun,+ ujung tombakna si iban arah besi beratna kira-kira pitu kilo,* janah si maba perisaina* erdalan i lebe-lebena.
8 Tedis Goliat, megang ia ngerana man pasuken perang Israel,+ nina, “Erkai kena ku jenda? Erperang nge ate kena maka erbaris kena? Aku kap pejuang kalak Pilisti, janah kena budak-budak Saul ngenca! Pilihlah sekalak arah kena ngelawan aku.
9 Adi menang ia ngelawan aku janah bunuhna aku, jadi budak kena kami. Tapi adi menang aku janah kubunuh ia, kena jadi budak kami janah layani kena kami.”
10 Nina Goliat* ka, “Bas wari enda kulawan pasuken Israel.+ Adi pang kena, pilihlah sekalak arah kena nari ngelawan aku!”
11 Sanga begi Saul ras kalak Israel kai si kataken Goliat e, seh kel biarna kalak e janah nggirgir kalak e.
12 Daud eme anak Isai kalak Eprata+ arah Betlehem nari+ si lit i Juda. Lit waluh kalak anak Isai+ si dilaki,+ enggo metua kel Isai sanga Saul jadi raja.
13 Anak Isai sintua gelarna Eliap,+ si nomor dua gelarna Abinadap,+ janah si nomor telu gelarna Sammah.+ Enda ndai teluna anakna si galangna janah kalak e enggo ikut erperang ras Saul.+
14 Daud anak si nguda,+ janah teluna abangna ndai enggo ikut ras Saul.
15 Sanga Daud ngelayani Saul, mulih-ulih ia ku Betlehem ngurus biri-biri+ bapakna.
16 Sedekah 40 wari, tiap erpagi-pagi ras karaben lalap reh Goliat nokohi kalak Israel.
17 Bas sada wari, nina Isai man anakna Daud, “Buatlah keranjang* biji-bijin* si enggo ipanggang enda bage pe sepuluh roti enda, janah minter taruhken man abang-abangndu si lit i perkemahen.
18 Baba sepuluh potong keju* enda man peminpin si ngawasi seribu kalak. Selain si e, pastiken uga keadan abang-abangndu janah babalah buktina maka kalak e sehat-sehat saja.”
19 Kalak e sangana bas Lembah Ela+ bage pe Saul ras kerina pasuken Israel guna erperang ngelawan kalak Pilisti.+
20 Emaka bas erpagi-pagi si lampas, medak Daud janah suruhna kalak si deban guna njaga biri-biri. Jenari ersikap ia janah lawes bagi si isuruh Isai. Sanga seh ia bas perkemahen, pasuken sangana lawes ku ingan erperang janah ersurak tanda erperang.
21 Aturken pasuken Israel ras pasuken Pilisti barisen perangna janah siadap-adapen kalak e.
22 Minter tadingken Daud barangna ndai man kalak si njaga barang, jenari kiam ia ku ingan erperang. Seh kenca i je, sungkun Daud keadan abang-abangna.+
23 Sanga ngerana denga Daud ras kalak e, ndarat pejuang kalak Pilisti si gelarna Goliat,+ si asalna arah Gat nari. Maju ia arah pasuken perang Pilisti, janah belaskenna ka kata-kata si enggo pernah belaskenna,+ emaka begi Daud kerna si e.
24 Sanga kerina pasuken Israel ngidah dilaki e, kiamen kerina kalak e perban biarna.+
25 Nina pasuken Israel, “Nen min dilaki ah! Reh ia nokohi kalak Israel.+ Ise si ngasup munuh ia, bereken raja pagi melala erta man bana, anakna si diberu pe bereken raja empoina,+ janah keluargana lanai perlu nggalari ntah mereken kai pe si arusna ibereken kalak Israel man raja.”
26 Sungkuni Daud kalak si tedis i deherna, “Kai pagi si ibereken man kalak si banci munuh Goliat e, ras si banci erban kalak Israel lanai itokohi? Ise kin kalak Pilisti si la isunat e maka pang ia nokohi pasuken perang Dibata si nggeluh?”+
27 Emaka kataken kalak e bagi si kataken kalak ndai, “E me pagi si ibereken man kalak si munuh ia.”
28 Sanga Eliap+ abang Daud sintua megi maka Daud ngerana-ngerana ras kalak e, rawaina Daud, nina, “Erkai kam reh ku jenda? Ise suruhndu si njaga biri-biri i taneh mesawang?*+ Kuteh nge kam pejago-jagoken, la mehuli ukurndu, ngenen perang saja ngenca tendu reh ku jenda.”
29 Nina Daud, “Kai kin si enggo kuban? Me nungkun saja nge aku!”
30 Jenari tadingken Daud me Eliap. Kenca si e, sungkun Daud ka penungkunen si seri man kalak si deban,+ janah bagi si ndai ka jawapen kalak e.+
31 Lit piga-piga kalak si megi kai si kataken Daud e, janah laporkenna man Saul. Emaka suruh Saul ia reh ngadap.
32 Nina Daud man Saul, “Ula min sekalak pe mbiar perban ia. Budakndu enda pagi si lawes ngelawan kalak Pilisti ah.”+
33 Tapi nina Saul, “Labo kam ngasup ngelawan kalak Pilisti ah sebap kam kitik denga,+ ia enggo jadi prajurit ngudana nari.”
34 Nina Daud ngaloi, “Aku kap si mpermakani biri-biri bapakku. Sanga aku mpermakani, reh sada singa+ maba sada biri-biri arah rarasen e. Pernah ka reh sada beruang, bage kang si banna.
35 Emaka kuayaki binatang e, kuserang, janah kuselamatken biri-biri e arah babahna nari. Sanga serang singa ntah pe beruang e aku, kujemak kerahungna, kupekpek ngasa mate.
36 Budakndu enda enggo pernah munuh singa ras beruang. Bage ka nge pagi si kuban man kalak Pilisti si la isunat ah, sebap enggo tokohina pasuken perang Dibata si nggeluh.”+
37 Nina Daud ka, “Jahwe kap si nelamatken aku arah singa ras beruang nari, Ia ka pagi si nelamatken aku arah tan kalak Pilisti ah.”+ Emaka nina Saul, “Laweslah kam, mbera-mbera temani Jahwe kam.”
38 Emaka bereken Saul man Daud perlengkapen perangna. Tamakenna ka pelindung takal arah tembaga ku takal Daud, jenari berekenna baju perang man Daud.
39 Emaka iketken Daud pedangna ku baju perangna, janah cubakenna erdalan tapi la banci, sebap la ia biasa makesa. Nina Daud man Saul, “La aku banci erperang make si enda kerina, perban la biasa kupake.” Emaka, tangtangi Daud si e ndai kerina.
40 Baba Daud tongkatna, pilihna lima batu si licin arah lau maler* nari, tamakenna batu e ku tas permakanna. Babana ka senjatana, eme nali si iban arah kulit nari.*+ Kenca e, dahina Goliat.
41 Goliat pe reh ndahi Daud, reh dekahna reh deherna ia ku Daud, janah dilaki si maba perisaina erdalan i lebe-lebena.
42 Sanga Daud iidah Goliat, tokohi Goliat ia janah tawaina, perban Daud nguda denga, mejile matana, janah ganteng kalakna.+
43 Emaka nina Goliat man Daud, “Maka tongkat babandu ngelawan aku? Biang kin kapndu aku?”+ Jenari sumpahina Daud alu gelar dibata-dibatana.
44 Nina Goliat ka, “Mari ku jenda, gelah kubereken dagingndu ipan perik-perik i langit ras binatang liar.”
45 Ngaloi Daud, “Kam reh ngelawan aku alu pedang, tombak, ras lembing.+ Tapi aku reh ngelawan kam alu gelar Jahwe penguasa malekat,+ Dibata pasuken perang Israel si enggo tokohindu.+
46 Bas wari enda serahken Jahwe kam ku tanku,+ kubunuh kam janah kupotong kerahungndu. Bas wari enda pe, kubereken kerina mayat pasuken Pilisti man perik-perik i langit ras binatang liar. Alu bage, iteh kerina kalak si lit bas doni maka lit Dibata si benar bas Israel.+
47 Kerina kalak si pulung i jenda pe tehna kari maka labo perluken Jahwe pedang ntah pe tombak nelamatken kami,+ sebap Jahwe ngenca si banci mereken kemenangen man kami,+ janah kerina kena serahkenNa kari ku tan kami.”+
48 Jenari, terus Goliat erdalan ndeheri Daud, tapi meter kel Daud kiam ku arah barisen perang musuh ngelawan Goliat.
49 Masukken Daud tanna ku tas permakanna, buatna sada batu i je nari, janah benterkenna batu e alu nali si iban arah kulit, emaka kena perdempaken Goliat. Masuk batu e ku takal Goliat janah mbulak ia, langkem ku taneh.+
50 Amin pe la lit pedang Daud, tertalukenna Goliat janah bunuhna ia alu nali si iban arah kulit nari bage pe sada batu.+
51 Terus Daud kiam janah ngadi ia i samping Goliat. Buatna pedang Goliat,+ pedaratna arah sarungna nari, janah potongna kerahung Goliat guna mastiken maka Goliat e enggo mate. Sanga idah pasuken Pilisti maka pejuangna si megegeh enggo mate, kiamen kalak e kerina.+
52 Ersurak-surak pasuken Israel bage pe Juda, ayaki kalak e pasuken Pilisti mulai lembah e+ nari seh ku gerbang Ekron.+ Gedang-gedang dalan Saaraim,+ enterem pasuken Pilisti si bunuh kalak e. Mayat kalak e banci iidah mulai Gat nari seh ku Ekron.
53 Kenca dung ayak-ayak pasuken Israel pasuken Pilisti, jarah kalak e perkemahen kalak Pilisti.
54 Kenca si e, buat Daud takal Goliat, babana ku Jerusalem. Tapi senjata Goliat tamakenna bas kemahna.+
55 Sanga idah Saul lawes Daud ngelawan Goliat, sungkunna Abner+ peminpin pasukenna, “O Abner, anak ise kin dilaki si nguda denga ah?”+ Nina Abner, “La kuteh Raja, tuhu kel si kukataken e.”
56 Nina raja, “Cuba sungkunindu, anak ise kin dilaki si nguda denga ah.”
57 Sanga mulih Daud kenca bunuhna Goliat, minter baba Abner ia ngadap Saul. Sanga si e kanting Daud denga takal Goliat.+
58 Sungkun Saul me Daud, “Anak ise kin kam, Nakku?” Nina Daud, “Aku anak budakndu Isai,+ kalak Betlehem.”+
Cataten i teruh
^ Baju perangna e iban arah kain ntah pe kulit si ilapisi potongen-potongen logam si bentukna bagi sisik ikan.
^ Ntah “ampang-ampangna.”
^ As. “kalak Pilisti e.”
^ As. “sepuluh susu.”
^ Taneh si mbelang si jarang iingani.
