1 Samuel 18:1-30
18 Kenca dung Daud ngerana ras Saul, Daud jadi teman Jonatan,+ kompak kel kalak e. Mulai keleng ate Jonatan man Daud bagi ia engkelengi dirina.+
2 Mulai bas wari e, suruh Saul me Daud gelah terus ngelayani ia, la berena ia mulih ku rumah bapakna.+
3 Keleng kel ate Jonatan man Daud bagi ia engkelengi dirina,+ emaka ban Jonatan ras Daud sada perjanjin.+
4 Tangtangi Jonatan jubahna si bagi rompi, jenari berekenna man Daud, berekenna ka perlengkapen perangna, pedangna, panahna, bage pe ikat pinggangna.
5 Mulai Daud ikut erperang, ku japa pe Daud isuruh Saul erperang, lalap ia menang.+ Emaka ban Saul ia jadi kepala pasuken,+ meriah ukur kerina kalak bage pe pelayan-pelayan Saul ngidah si e.
6 Sanga mulih Daud ras si debanna bas naluken kalak Pilisti nari, ndarat diberu-diberu arah kerina kota Israel ngalo-ngalo Raja Saul. Alu ermeriah ukur, rende+ ras landek kalak e janah mainkenna rebana+ bage pe alat musik si telu senarna.
7 Rende diberu-diberu si ngerayaken kejadin e,
“Ibunuh Saul ribun kalak,Ibunuh Daud puluhen ribu kalak.”+
8 Sanga begi Saul lagu e, la ia senang, merawa kel ia,+ nina, “Kataken kalak e puluhen ribu si bunuh Daud, tapi ribun kalak ngenca si kubunuh. Keduduken raja nari ngenca si lenga ibereken man bana!”+
9 Mulai bas wari e, curiga lalap Saul man Daud.
10 Paginna pediat Dibata latih ukur Saul,+ mulai lain perbahanen Saul bas rumahna. Daud sangana main harpa*+ bagi biasana. Sanga si e, Saul sangana njemak tombak,+
11 janah rukur ia, ‘Leket kari kuban Daud ku dingding ah!’ Emaka benterken Saul tombakna+ ku Daud, tapi banci elakken Daud dua kali.
12 Mbiar Saul man Daud, sebap Jahwe ras Daud,+ tapi Saul enggo tadingken Dibata.+
13 Ban Saul me Daud jadi peminpin si ngawasi seribu prajurit gelah lanai ia ngelayani Saul bas istana. Emaka Daud si minpin pasuken bas perang.+
14 Kai pe si lakoken Daud lalap berhasil,*+ sebap Jahwe si nemani ia.+
15 Sanga idah Saul maka Daud tuhu-tuhu berhasil, mbiar ia man bana.
16 Tapi kerina kalak Israel ras Juda engkelengi Daud, sebap ia si minpin kalak e bas peperangen.
17 Kenca e nina Saul man Daud, “Enda anakku sintua si diberu, gelarna Merap.+ Kubereken ia pagi jadi diberundu.+ Tapi arus kam terus pang ngelayani aku janah ikut bas kerina perang Jahwe.”+ Situhuna nina Saul bas ukurna, ‘Ula min tanku si ngelawan ia. Pediatlah tan kalak Pilisti si munuh ia.’+
18 Nina Daud, “Ise kin aku, ise kin keluarga bapakku bas Israel maka banci aku jadi kela raja?”+
19 Sanga enggo seh waktuna mereken Merap anak Saul man Daud, Merap enggo jadi diberu Adriel+ kalak Mehola.
20 Mihal anak Saul si diberu+ ngena atena Daud. Kerna si e ilaporken man Saul janah meriah kapna megisa.
21 Emaka nina Saul bas ukurna, ‘Kujebak ateku Daud alu mereken Mihal man bana, gelah bunuh kalak Pilisti pagi ia.’+ Nina Saul man Daud pedua kaliken, “Kam min teku jadi kelaku.”
22 Jenari, perentahken Saul pelayan-pelayanna, “Erbuni-bunilah kena ngerana man Daud, kataken bana, ‘Jadi kel ate raja man bandu. Kerina pelayan-pelayan raja pe jadi tena kam. Emaka empoilah anak raja e.’”
23 Kenca kataken pelayan-pelayan Saul kerna si e man Daud, nina Daud, “Akap kena kin menukah jadi kela raja? Aku enda kalak mesera, labo kalak terpandang.”+
24 Laporken pelayan-pelayan Saul man bana kai si enggo kataken Daud.
25 Megi si e nina Saul, “Bagenda ning kena man Daud, ‘Labo arapken raja uang mahar.+ Enda ngenca si pindo raja: Arus bunuhndu 100 kalak Pilisti guna mbalas musuh-musuh raja. Baba kulit sunaten+ kalak e, si jadi bukti maka kalak e enggo mate.’” Situhuna e taktik jahat Saul gelah Daud ibunuh kalak Pilisti.
26 Emaka ilaporken pelayan-pelayan Saul kerna si e man Daud, cocok akap Daud, emaka nggit ia jadi kela raja.+ Sope seh waktu si itetapken,
27 lawes Daud ras pasukenna, bunuhna 200 kalak Pilisti. Baba Daud man raja kerina kulit sunaten kalak Pilisti si bunuhna e, gelah banci ia jadi kelana. Emaka bereken Saul anakna Mihal jadi diberu Daud.+
28 Teh Saul maka Jahwe ras Daud,+ Mihal anakna pe ngena kel tena Daud.+
29 E erban Saul reh biarna man Daud, janah musuhi Saul me Daud segedang geluhna.+
30 Tiap lawes peminpin-peminpin Pilisti erperang ngelawan Israel, biasana Daud si menang. Selain si e, arah kerina pelayan-pelayan Saul si debanna, Daud si berhasilna.+ Janah gelarna tuhu-tuhu ihamati.+
Cataten i teruh
^ Harpa eme alat musik si ersenar bagi gitar, tapi bentukna beda.
^ Ntah “Pentar lalap perbahanen Daud.”
