1 Samuel 20:1-42
-
Jonatan setia man Daud (1-42)
20 Emaka kiam Daud arah Nayot si lit i Rama, jumpaina Jonatan, nina, “Kai kin si kulakoken?+ Kai kin salah ras dosaku man bapakndu maka bunuhna tena aku?”
2 Ngaloi Jonatan, “Si la mungkin kap e!+ Labo kam pagi mate. Labo lit kai pe lakoken bapakku, adi lenga kin cakapkenna lebe ras aku, la soal e perkara si mbelin ntah pe si kitik. Man kade bapakku ka muniken si e arah aku nari? Si e labo mungkin terjadi.”
3 Tapi nina Daud, “Pasti teh bapakndu keleng kel tendu aku,+ janah nina bapakndu, ‘Ula sempat teh Jonatan kerna si e, pasti merawa pagi ia.’ Tapi ersumpah aku i lebe-lebe Jahwe si nggeluh janah ersumpah aku i lebe-lebe kam si nggeluh, ntisik nari ngenca aku nggeluh.”+
4 Emaka nina Jonatan man Daud, “Kulakoken kai pe si katakenndu.”
5 Nina Daud man Jonatan, “Pagi kap perayan bulan baru,+ arusna ikut aku kundul guna man ras raja. Pediatndu min aku lawes, ndarat pagi aku arah kota guna cebuni seh ngasa kedun paksa karaben.
6 Adi darami bapakndu pagi aku, bagendalah nindu, ‘Mindo kel Daud man bangku gelah banci ia mis lawes ku kotana Betlehem,+ sebap kerina keluargana erban acara guna mpersembahken korban tahunen i jah.’+
7 Adi nina bapakndu, ‘Labo dalih,’ enda ertina la lit si man kebiarenku. Tapi adi merawa ia, teklah kam maka pasti cilakaina tena aku.
8 Buktikenlah kekelengenndu si setia man budakndu enda,+ sebap enggo erjanji kam man bangku i lebe-lebe Jahwe.+ Tapi adi salah kin aku,+ kamlah si munuh aku. Ula serahkenndu aku man bapakndu.”
9 Emaka nina Jonatan, “Ula kel bage nindu! Adi memang kuteh cilakai bapakku tena kam, pasti kukataken man bandu.”+
10 Nina Daud, “Ise pagi si ngatakenca man bangku adi merawa-rawa pagi bapakndu ngaloi kam?”
11 Nina Jonatan, “Ota, ndarat kita arah kota enda.” Emaka ndarat kalak e duana arah kota e nari.
12 Nina Jonatan ka, “Jahwe Dibata Israel si jadi saksina maka pagi ntah pe kedun, kira-kira bas jam si bagenda, kuusahaken pagi meteh sura-sura bapakku man bandu. Adi mehuli ukurna man bandu, kupeseh pagi berita e man bandu.
13 Tapi adi cilakai bapakku tena kam, janah la kukataken kerna si e man bandu, si dungna erban kam la selamat, pediatlah Jahwe si mereken hukumen si mberat man bangku. Mbera-mbera Jahwe ras kam,+ bagi mbarenda Ia ras bapakku.+
14 La soal aku nggeluh denga ntah pe enggo mate, mbera-mbera cidahkenndu kekelengenndu si setia man bangku bagi Jahwe.+
15 Amin pe pagi enggo kernepken Jahwe kerina musuhndu* arah doni enda, lalap min cidahkenndu kekelengenndu si setia man keluargaku.”+
16 Emaka ban Jonatan perjanjin ras keturunen Daud, nina, “Jahwe pagi si ngukum musuh-musuhndu.”
17 Emaka pindo Jonatan gelah ersumpah ka Daud perban kekelengenna man Jonatan, sebap Jonatan pe keleng tena Daud bagi ia engkelengi dirina.+
18 Jenari nina Jonatan man Daud, “Pagi kap perayan bulan baru,+ janah darami bapakku kam pagi perban kosong ingan kundulndu.
19 Paginna, pasti sungkunina kerna kam. Emaka arus kam reh ku jenda, ku inganndu pernah cebuni janah timaindulah i deher batu enda.
20 Kupanahken pagi telu anak panah ku samping batu e, tempa-tempa lit si man panahen i je.
21 Kenca si e, ningku pagi man pelayanku, ‘Darami anak panah ndai.’ Adi kukataken pagi man bana, ‘Anak panah ndai lit i sampingndu, buatlah,’ e ertina enggo banci kam mulih. Ersumpah aku i lebe-lebe Jahwe si nggeluh, maka aman kerinana janah labo lit si ncilakai kam.
22 Tapi adi ningku man bana, ‘Anak panah e ndauh denga ku jah,’ emaka laweslah kam, sebap e sura-sura Jahwe.
23 Kerna perjanjinta e,+ Jahwe si jadi saksina seh rasa lalap.”+
24 Emaka lawes Daud ndarat arah kota guna cebuni. Kenca seh perayan bulan baru, kundul raja guna man.+
25 Bagi biasana, kundul Saul i deher dingding. Siadap-adapen ia ras Jonatan, janah Abner+ kundul i samping Saul. Tapi, ingan kundul Daud kosong.
26 La lit kai pe si kataken Saul bas wari e, sebap nina bas ukurna, ‘Pasti lit si erban Daud la badia.+ Payo, pasti sangana ia najis.’
27 Bas wari si peduaken arah perayan bulan baru, ingan kundul Daud tetap denga kosong. Emaka nina Saul man Jonatan anakna, “Engkai maka nderbih ras sendah la reh anak Isai+ ku acara man-man enda?”
28 Ngaloi Jonatan, “Mindo ijin Daud man bangku gelah banci ia lawes ku Betlehem.+
29 Nina, ‘Lit acara keluargaku guna mpersembahken korban tahunen i kota Betlehem, janah pindoken seninaku ka gelah reh aku ku jah, emaka bere min aku lawes. Adi cocok kin kapndu, pediatlah aku lawes erbuni-buni ndahi senina-seninaku.’ E me sebapna maka la ia reh ku meja raja.”
30 Emaka, merawa kel Saul man Jonatan, nina, “Engko anak diberu pemberontak. Akapmu kin la kuteh enggo erpihak ko ras anak Isai ah? Pemelakenmu bam bage pe nandem.
31 Adi nggeluh denga kin anak Isai e bas doni enda, labo ko banci jadi raja, kedudukenmu selaku raja pe labo banci paguh.+ Emaka gundari, suruhlah kalak maba ia man bangku, sebap ia arus mate.”*+
32 Tapi, nina Jonatan man Saul bapakna, “Engkai maka arus ia ibunuh?+ Kai kin si enggo lakokenna?”
33 Megi si e, benterken Saul tombakna ku Jonatan guna munuh ia.+ Arah e iangka Jonatan maka tuhu-tuhu bunuh bapakna tena Daud.+
34 Minter tedis Jonatan, tadingkenna meja e, ngilas kel kapna. La lit kai pe panna bas wari si peduaken arah perayan bulan baru e, sebap latih kel ukurna ngukuri Daud,+ bage pe perban enggo pemelaken bapakna ia.
35 Pepaginna, lawes Jonatan ndarat arah kota nari njumpai Daud bagi si enggo janjikenna, janah lit sekalak pelayan si nguda denga nemani ia.+
36 Jenari nina man pelayanna, “Kiamlah kam, darami anak panah si kupanahken e.” Kiam pelayan e janah panahken Jonatan anak panah e ndauh ngelewati ia.
37 Kenca seh pelayan e bas ingan anak panah si panahken Jonatan, nina Jonatan man pelayan e, “La kin terdauhen denga ku jah anak panah e?”
38 Nina Jonatan ka man pelayanna e, “Meter! Pedasken! Ula pedekah-dekah!” Emaka buat pelayan Jonatan anak-anak panah e janah babana mulihken ku tuanna.
39 La angkai pelayan e kai pe kerna si e, Jonatan ras Daud ngenca si ngangkai ertina.
40 Kenca si e, bereken Jonatan senjatana man pelayan e, nina, “Baba enda ku kota.”
41 Kenca lawes pelayan e, ndarat Daud arah inganna cebuni si la ndauh je nari si lit i sebelah selatan. Kenca si e, sujud Daud, mungkuk ia telu kali, sidakepen* kalak e janah ngandung, tapi Daud si ngandungna kel.
42 Nina Jonatan man Daud, “Berkatlah kam bas kejuah-juahen, sebap kita enggo ersumpah+ bas gelar Jahwe, ninta, ‘Mbera-mbera Jahwe lit antara aku ras kam, bage pe antara keturunenku ras keturunenndu seh rasa lalap.’”+
Kenca si e, berkat Daud, janah Jonatan mulih ku kota.
Cataten i teruh
^ Ntah “musuh Daud.”
^ As. “sebap ia anak kematen kap.”
^ As. “sieman.” Bas jaman Pustaka, pertemanen icidahken alu sieman.
