1 Samuel 21:1-15
21 Kenca si e lawes Daud ku Nop+ ndahi Imam Ahimelek. Nggirgir Ahimelek perban biarna sanga jumpa ras Daud, nina, “Engkai maka sisada ngenca kam reh, la kuidah lit si nemani kam?”+
2 Ngaloi Daud, “Suruh raja aku ngelakoken sada tugas, tapi nina raja, ‘Ula sempat ise pe si metehsa kerna tugas e bage pe kerna kai si kuperentahken man bandu.’ Emaka kuban janji gelah jumpa ras anak buahku bas sada ingan.
3 Adi lit lima rotindu, ntah pangan kai pe, berekenlah man bangku.”
4 Tapi nina imam e, “La lit roti si biasa bas aku, roti si badia ngenca lit.+ Roti e banci ipan adi mbaru-mbaru enda anak buahndu la erhubungen seks ras diberu.”+
5 Ngaloi Daud, “Biasana adi lawes ate kami erperang, la kami erhubungen seks ras diberu.+ Adi sanga ndalanken tugas si biasa saja pe jaga anak buahku dagingna tetap badia, apai ka bas wari enda bas ndalanken tugas khusus.”
6 Emaka bereken imam e roti si badia man Daud,+ perban la lit roti si deban. Roti persembahen e lanai itama i lebe-lebe Jahwe, perban bas wari e roti ndai enggo iganti alu roti si mbaru.
7 Bas wari e lit ka sekalak pelayan Saul i je, i lebe-lebe Jahwe.* Ia kalak Edom+ gelarna Doek,+ ia pengawas permakan-permakan Saul.
8 Kenca si e nina Daud man Ahimelek, “La kubaba pedang ntah pe senjataku, perban tugas si suruh raja enda arus mis idalanken. Lit nge bas kam tombak ntah pe pedang?”
9 Nina imam e ngaloi, “Pedang Goliat+ lit i jenda, eme pedang kalak Pilisti si bunuhndu i Lembah Ela.+ Pedang e ibaluti alu kain i pudi epod* ah.+ Adi nggit kam, buatndu saja, sebap e ngenca si lit i jenda.” Nina Daud, “La lit pedang si deban bagi pedang e. Bereken dage man bangku.”
10 Bas wari e, kiam ka Daud nelamatken diri+ arah Saul, dungna seh ia i Gat, kota Raja Akis.+
11 Nina pelayan-pelayan Akis man bana, “La kin enda Daud, raja kalak Israel? La kin ia maksud kalak sanga landek janah rende, nina,‘Bunuh Saul ribun kalak,Bunuh Daud puluhen ribu kalak’?”+
12 Ukuri Daud kel kai si kataken kalak e, dungna mbiar kel ia+ man Akis raja Gat.
13 Emaka ban-ban Daud adon,+ perbahanenna pe bagi kalak adon i lebe-lebe kalak e. Coret-coretna pintu gerbang, pediatna naktaken teh-tehna ku janggutna.
14 Dungna nina Akis man pelayan-pelayanna, “Me idah kena nge ia adon! Engkai maka baba kena ia man bangku?
15 Akap kena kin kurang bas aku kalak adon, maka baba kena ka sada nari man bangku? Cocok kin kap kena ia masuk ku rumahku?”
Cataten i teruh
^ As. “pelayan Saul si itahan i lebe-lebe Jahwe,” mungkin perban lit sumpahna, la ia badia, ntah icurigai ia kena kusta.
