1 Samuel 22:1-23
22 Emaka lawes Daud je nari+ ku Gua Adulam+ guna nelamatken diri. Sanga begi senina-seninana ras keluarga bapakna kerna si e, lawes kalak e ndahi ia.
2 Selain si e, kerina kalak si lit masalahna, si lit utangna, bage pe si latih ukurna reh pulung ndahi Daud, ia si jadi peminpin kalak e. Lit kira-kira 400 kalak si ikut ras ia.
3 Emaka lawes Daud je nari ku Mispa i Moap, nina man raja Moap,+ “Pediat min bapakku ras mamakku tading i jenda seh ngasa kuteh pagi kai si lakoken Dibata man bangku.”
4 Emaka tadingken Daud kalak e ras raja Moap, tading kalak e ras ia sedekah Daud tading bas inganna cebuni.+
5 Kenca bage nina Nabi Gat+ man Daud, “Ula nai kam tading bas inganndu cebuni e, laweslah kam ku taneh Juda.”+ Emaka lawes Daud je nari ku kerangen Heret.
6 Saul sangana njemak tombakna janah kundul ia i teruh batang kayu tamariska si lit bas ingan si meganjang i Gibea,+ kerina pelayan-pelayanna lit i sekelilingna. Begi Saul i ja Daud ras anak buahna cebuni.
7 Emaka nina Saul man pelayan-pelayanna si lit i sekelilingna, “O kalak Benyamin, begiken min aku. Bereken anak Isai+ ah kin pagi juma man kena kerina bage pe kebun anggur? Banna ka kin pagi kena kerina jadi peminpin si ngawasi seribu kalak bage pe peminpin si ngawasi seratus kalak?+
8 Ersada kerina arih kena ngelawan aku! La lit ise pe si ngataken man bangku sanga anakku erban perjanjin ras anak Isai ah!+ La lit ise pe si rate mekuah man bangku, la lit ise pe si ngataken man bangku enggo ajuk-ajuk anakku pelayanku guna ngelawan aku, bagi si enggo terjadi enda.”
9 Ngaloi Doek+ kalak Edom si ngawasi pelayan-pelayan Saul si lit i je, nina,+ “Kuidah nge anak Isai ah reh ku Nop njumpai Ahimelek anak Ahitup.+
10 Pindoken Ahimelek petunjuk man Jahwe guna kepentingen Daud janah berekenna pangan man bana. Berekenna ka pedang Goliat kalak Pilisti man Daud.”+
11 Minter dilo Raja Saul Imam Ahimelek anak Ahitup bage pe kerina imam-imam si lit bas keluarga bapakna, si tading i Nop. Emaka, reh kalak e kerina njumpai raja.
12 Nina Saul, “O anak Ahitup, begiken min aku!” Nina ngaloi, “Ue, Tuanku.”
13 Nina Saul man bana, “Engkai maka ersada arihndu ras anak Isai ah guna ngelawan aku? Berendu roti ras pedang man bana, pindondu petunjuk man Dibata guna kepentingenna. Lawanna kap aku, timaina guna nyerang aku bagi si enggo terjadi enda.”
14 Ngaloi Ahimelek, “Bas kerina pelayan-pelayanndu, ise kin si setiana* kel bagi Daud?+ Kelandu kap ia,+ kepala pengawalndu, janah iergai kel ia bas istanandu.+
15 Enda denga kin tangtangna kupindo petunjuk man Dibata guna kepentingen Daud?+ Adi menurutku, labo masuk akal si katakenndu e, Raja! Ula min lit bas ukurndu si la mehuli kerna aku bage pe kerna kerina keluarga bapakku, sebap labo kuteh kai pe kerna si enda.”+
16 Tapi nina raja, “Kam arus mate Ahimelek,+ kam bage pe kerina keluarga bapakndu.”+
17 Emaka nina raja man pengawal-pengawalna si lit i sekelilingna, “Bunuh imam-imam Jahwe e, sebap kalak e enggo erpihak man Daud! Iteh kalak e maka Daud sekalak buronen, tapi la laporkenna bangku!” Tapi la nggit pelayan-pelayan raja munuh imam-imam Jahwe.
18 Emaka nina raja man Doek kalak Edom e,+ “Kamlah si munuh imam-imam e.” Emaka, minter bunuh Doek imam-imam e. Bas wari e, lit 85 kalak si make kain epod* si bunuhna.+
19 Kalak si tading i Nop+ eme kota imam-imam pe serangna ka alu pedang. Bunuhna kerina alu pedang eme dilaki, diberu, anak-anak, bayi, lembu, kelede, bage pe biri-biri.
20 Tapi, lit sekalak anak Ahimelek, kempu Ahitup si kiam nelamatken diri, ikutkenna Daud. Gelarna eme Abiatar.+
21 Nina Abiatar man Daud, “Enggo bunuh Saul imam-imam Jahwe.”
22 Nina Daud man Abiatar, “Sange pe enggo kuteh,+ pasti nge pagi kataken Doek kalak Edom e kerna si e man Saul sebap lit kuidah ia i je. Emaka aku nge si ertanggung jawap bas kematen kerina kalak si lit bas keluarga bapakndu.
23 Tadinglah kam ras aku. Ula kam mbiar, pasti kam kulindungi. Sebap ise pe si bunuhna tena kam, berarti bunuhna kap tena aku.”+
