1 Samuel 23:1-29
23 Bas sada wari, lit si ngataken man Daud, “Kalak Pilisti sangana nyerang Kehila,+ jarah kalak e pangan arah ingan ngerik* nari.”
2 Emaka pindo Daud petunjuk man Jahwe,+ “Arus kin aku lawes nyerang kalak Pilisti e?” Nina Jahwe, “Laweslah kam, serang kalak Pilisti e, selamatken kalak Kehila.”
3 Tapi nina anak buah Daud man bana, “Bas Juda+ enda saja pe kita enggo mbiar, apai ka adi lawes kita ku Kehila ngelawan pasuken Pilisti!”+
4 Emaka pindo Daud petunjuk Jahwe sekali nari.+ Nina Jahwe, “Nusurlah kam ku Kehila sebap Kuserahken pagi kalak Pilisti e ku tanndu.”+
5 Emaka lawes Daud ras anak buahna ku Kehila guna nyerang kalak Pilisti, selamatkenna kalak Kehila.+ Enterem kel kalak Pilisti si bunuhna, buatna ka asuh-asuhen kalak e.
6 Sanga kiam Abiatar+ anak Ahimelek ndahi Daud ku Kehila, babana sada epod.*
7 Lit si ngatakenca man Saul, “Daud enggo reh ku Kehila.” Emaka nina Saul, “Enggo serahken Dibata ia man bangku,*+ sebap enggo jebak Daud bana alu masuk ku kota si lit gerbangna ras palangna.”
8 Emaka pepulung Saul kerina pasukenna guna nyerang Kehila janah ngepung Daud ras anak buahna.
9 Kenca begi Daud maka rencanaken Saul guna nyerang ia, kataken Daud man Imam Abiatar, “Baba min epod* ena ku jenda.”+
10 Kenca si e nina Daud, “O Jahwe Dibata Israel, enggo begi budakNdu enda maka reh ate Saul ku Kehila guna engkernepken kota enda perban aku.+
11 Serahken peminpin-peminpin* Kehila enda nge pagi aku ku tan Saul? Payo kin pagi reh Saul bagi si begi budakNdu enda? O Jahwe Dibata Israel, aloi min budakNdu enda.” Nina Jahwe ngaloi, “Pasti pagi ia reh.”
12 Nungkun ka Daud, “Serahken peminpin-peminpin Kehila enda nge pagi aku bage pe anak buahku ku tan Saul?” Nina Jahwe, “Ue, serahkenna pagi kena.”
13 Minter lawes Daud bage pe anak buahna si buena kira-kira 600 kalak.+ Tadingken kalak e Kehila, lawes kalak e ku ja pe kalak e banci pindah. Kenca enggo ikataken man Saul maka Daud enggo kiam arah Kehila, la surung ayakina Daud.
14 Tading Daud bas taneh mesawang* bas ingan-ingan si mesera ndahisa, eme daerah pegunungen Taneh Mesawang* Sip.+ Saul lalap ndarami Daud,+ tapi la serahken Jahwe ia ku tan Saul.
15 Sanga tading Daud i Taneh Mesawang* Sip si lit i Hores, teh Daud maka* Saul enggo berkat ndarami ia sebap bunuh Saul atena ia.
16 Emaka reh Jonatan anak Saul ndahi Daud ku Hores. Pegegehina Daud gelah reh tekna ia man Jahwe.+
17 Nina man Daud, “Ula kam mbiar, sebap labo kam pagi dat bapakku. Kam pagi si jadi raja Israel,+ aku pagi jadi kalak si nomor dua kenca kam. Bapakku Saul pe tehna kerna si e.”+
18 Emaka duana kalak e erban perjanjin+ i lebe-lebe Jahwe. Daud tetap tading i Hores tapi Jonatan mulih ku rumahna.
19 Lawes kalak Sip ndahi Saul ku Gibea,+ nina, “Daud sangana cebuni i deher daerah kami,+ bas ingan-ingan si mesera ndahisa si lit i Hores,+ i bukit Hakila+ si lit i sebelah selatan* Jesimon.*+
20 O Raja, rehlah kam katawari pe kapndu cocok. Serahken kami pagi ia ku tanndu.”+
21 Nina Saul, “Mbera-mbera pasu-pasu Jahwe kena, perban enggo cidahken kena perkuah ate man bangku.
22 To pastiken kena i ja ia situhuna, ise si ngidah ia i je, sebap lit si ngatakenca bangku ia licik kel.
23 Alu manjar-anjar, pastiken kenalah i ja saja ia cebuni, jenari reh ka kena man bangku, baba buktina. Adi bas daerah e kin pagi ia, ras pagi kita ku jah. Serser pagi kudarami ia arah ribun kalak* Juda.”
24 Emaka leben kalak e lawes ku Sip+ asangken Saul. Sanga si e, Daud ras anak buahna lit i Taneh Mesawang* Maon,+ i Araba+ si lit i sebelah selatan Jesimon.
25 Kenca si e, reh Saul ras pasukenna ndarami Daud.+ Kenca teh Daud kerna si e, minter ia nusur ku tebing batu+ si lit i Taneh Mesawang* Maon, tading ia i je. Sanga begi Saul kerna si e, ayakina Daud seh ku Taneh Mesawang Maon.
26 Sanga seh Saul bas bagin gunung si arah enda, Daud ras anak buahna enggo seh bas bagin gunung si arah ah. Pedas-pedas Daud kiam+ nadingken Saul. Tapi Saul ras pasukenna si atena nangkap Daud bage pe anak buahna enggo reh deherna.+
27 Tapi reh sekalak si maba berita ndahi Saul, nina, “Meterlah kam mulih, sebap enggo serang kalak Pilisti negrita!”
28 Emaka ngadi Saul ngayaki Daud,+ lawes ia ngadapi kalak Pilisti. E me sebapna ingan e igelari Tebing Batu Persirangen.
29 Emaka lawes Daud nangkeng i je nari, tading ia bas ingan-ingan si mesera ndahisa i En-gedi.+
Cataten i teruh
^ As. “Enggo dayaken Dibata ia ku bas tanku.”
^ Ntah banci saja “Serahken si mpuna taneh.”
^ Taneh si mbelang si jarang iingani.
^ Taneh si mbelang si jarang iingani.
^ Taneh si mbelang si jarang iingani.
^ Ntah banci saja “mbiar kel Daud perban.”
^ As. “kanan.”
^ Ntah banci saja “gurun pasir; taneh mesawang.”
^ Ntah “arah kerina keluarga.”
^ Taneh si mbelang si jarang iingani.
^ Taneh si mbelang si jarang iingani.
