1 Samuel 25:1-44
25 Bas sada wari, mate Samuel.+ Pulung kerina kalak Israel guna ngandungi ia, kuburken kalak e ia i deher rumahna i Rama.+ Kenca si e, lawes Daud ku Taneh Mesawang* Paran.
2 Bas Maon,+ lit sekalak dilaki si erdahin i Karmel.*+ Seh kel ia bayakna, lit 3.000 biri-birina ras 1.000 kambingna. Ia sangana nggunting mbulu biri-birina i Karmel.
3 Gelar dilaki e Nabal.+ Ia keturunen Kalep.+ Gelar diberuna Abigail,+ ia mejile janah bijak kalakna. Tapi dilaki Abigail e kasar ras jahat.+
4 Bas taneh mesawang,* begi Daud berita maka Nabal sangana nggunting mbulu biri-birina.
5 Emaka suruh Daud sepuluh anak buahna njumpai Nabal, nina, “Laweslah kena ku Karmel. Sanga jumpa kena pagi ras Nabal, peseh salamku man bana.
6 Kataken bana, ‘Mbera-mbera gedang umurndu, dame akapndu, keluargandu, bage pe kerina si lit bas kam.
7 Kubegi beritana kam sangana nggunting mbulu biri-birindu. Sanga permakan-permakanndu ras kami, la ganggu kami kalak e.+ Sedekah kalak e i Karmel, la lit kadena pe si bene.
8 Sungkunlah pelayan-pelayanndu, ceritakenna pagi man bandu. Mbera-mbera jadi atendu ngidah anak buahku, sebap reh kami ndahi kam bas wari si dem keriahen enda.* Bere min budak-budakndu enda ras anakndu Daud kai pe si banci berendu.’”+
9 Emaka lawes anak buah Daud, katakenna si e kerina man Nabal bas gelar Daud. Kenca dung kalak e ngerana,
10 nina Nabal, “Ise kin Daud anak Isai e? Gundari enda, enterem kap budak-budak si kiam nadingken tuanna.+
11 Arus kin kubuat roti, lau, bage pe daging si enggo kusikapken man si nggunting mbulu biri-biriku, jenari kubereken e man kalak si la kuteh ja nari rehna?”
12 Emaka mulih anak buah Daud, laporkenna man Daud kerina si kataken Nabal.
13 Mis nina Daud man anak buahna, “Iket pedang kena bas awak kena!”+ Emaka kerina kalak e ngiket pedangna bas awakna. Daud pe iketna pedangna bas awakna. Lit kira-kira 400 kalak si ikut ras Daud, tapi 200 kalak si tading njaga barang.
14 Tapi lit sekalak pelayan si ngelapor man Abigail diberu Nabal, nina, “Suruh Daud si maba berita arah taneh mesawang* nari mpeseh salam man tuan, tapi sergang tuan si maba berita e janah hinana ia.+
15 Padahal mehuli kel kalak ah man kami. La pernah kami gangguna, sedekah kami ras kalak e i taneh mesawang,* kade kami pe la pernah bene.+
16 Sedekah kami mpermakani biri-biri i deher kalak e, kalak e bagi tembok si ngelindungi kami suari ras berngi.
17 Gundari ukurilah kai si atendu lakokenndu, sebap tuan bage pe kita kerina banci pagi kena cilaka perban si e.+ Janah tuan kalakna la terpake,+ mesera ngerana ras ia.”
18 Emaka minter buat Abigail+ 200 potong roti, inemen anggur bas dua ingan si galang, lima biri-biri si enggo igeleh, biji-bijin* si enggo ipanggang si buena lima keranjang,* 100 kue kismis, 200 kue buah ara si enggo ikerahken. Tamakenna si e kerina ku kelede-keledena.+
19 Kenca si e, nina man pelayan-pelayanna, “Leben kena lawes, reh kari aku.” Tapi la katakenna kai pe man Nabal dilakina.
20 Lawes Abigail nangkih kelede, Daud ras anak buahna nusur gunung nari ku arah Abigail. La banci idah kalak e Abigail perban gunung e, tapi dungna jumpa kalak e.
21 Sope si e, enggo kataken Daud, “Sia-sia kap kujagai kerina jang kalak ah ndai i taneh mesawang.* La lit kadena pe si bene,+ tapi perbahanenku si mehuli e balasna alu kai si jahat.+
22 Adi pagi erpagi-pagi lenga kin kubunuh kerina dilaki si lit bas keluarga Nabal, mbera-mbera Dibata si mbalas musuh-musuhku* janah terberaten ban Dibata hukumenna.”
23 Sanga Abigail ngidah Daud, mis ia nusur arah kelede nari, sujud ia i lebe-lebe Daud.
24 Jenari sujud ia ku nahe Daud, nina, “O Tuanku, aku sajalah si nanggungsa kesalahenna e. Pediatlah budakndu enda ngerana, begikenndu min kata-kataku.
25 Mindo kel aku Tuan, la padah diatendu Nabal si la terpake ah,+ sebap ia bali bagi gelarna. Nabal* kap gelarna, ia motu. Sanga reh pelayan-pelayan si isuruhndu, la aku i je.
26 Gundari o Tuanku, ersumpah aku i lebe-lebe Jahwe si nggeluh ras i lebe-lebe kam si nggeluh maka Jahwe kap si erbanca la surung+ bunuhndu+ musuh-musuhndu* janah la balasndu kalak e. Mbera-mbera musuh-musuh Tuanku bage pe kalak si atena ncilakai kam dungna bagi Nabal.
27 Alokenlah pemere+ si ibaba budakndu enda Tuanku, gelah banci berekenndu man pelayan-pelayanndu si ikut ras kam.+
28 Mindo aku, ampunilah kesalahen budakndu enda. Pasti ban Jahwe pagi keturunenndu lalap jadi raja,+ sebap erjuang kam bas peperangen Jahwe,+ janah la lit kejahaten si lakokenndu sedekah kam nggeluh.+
29 O Tuanku, adi lit kalak si ngayaki kam janah bunuhna tena kam, pasti kam lindungi Jahwe Dibatandu, bagi sekalak jelma si ngelindungi barangna si merga janah tamana bas tas. Tapi musuh-musuhndu benterkenNa pagi, bagi mbenterken batu alu nali si iban arah kulit nari.*
30 O Tuan, kenca enggo lakoken Jahwe pagi kerina si mehuli bagi si enggo janjikenNa man bandu, janah banNa kam jadi peminpin Israel,+
31 la pagi salah kapndu bandu, ntah pe nyesal kam perban munuh* alu la lit alasenna ntah pe perban balas dendam.+ Adi pasu-pasu Jahwe pagi kam Tuanku, ingetndu min budakndu enda.”
32 Emaka nina Daud man Abigail, “Terpujilah Jahwe Dibata Israel, si nuruh kam njumpai aku bas wari enda!
33 Mbera-mbera kam ipasu-pasu perban bijak perbahanenndu! Mbera-mbera kam ipasu-pasu perban banndu aku la surung munuh*+ alu tanku janah la aku balas dendam!
34 Ersumpah aku i lebe-lebe Jahwe Dibata Israel si erban aku la surung ncilakai kam,+ adi la min ndai meter kam reh ndahi aku,+ pagi erpagi-pagi lanai min ndai lit sekalak pe dilaki bas keluarga Nabal si tetap nggeluh.”+
35 Aloken Daud kai si baba Abigail, nina, “Mulihlah kam ku rumahndu alu dame. Enggo kubegiken kata-katandu, pasti kulakoken kai si pindondu e.”
36 Jenari mulih Abigail. Paksa si e, Nabal sangana erpesta i rumahna bagi sekalak raja. Ia sangana ersenang-senang janah mabuk. Emaka kai pe la lit ceritaken Abigail man Nabal seh ngasa paginna erpagi-pagi.
37 Pepaginna, sanga Nabal lanai mabuk, ceritaken diberuna man bana kerina si terjadi. Dungna, jantung Nabal bagi jantung kalak mate, lumpuh ia bagi batu.
38 Kira-kira sepuluh wari kenca si e, ban Jahwe ia mate.
39 Sanga begi Daud maka Nabal enggo mate, nina, “Terpujilah Jahwe si enggo mbela aku+ sanga aku hina Nabal,+ halangiNa budakNa gelah ula ngelakoken si jahat!+ Enggo balas Jahwe kap Nabal perban perbahanenna si jahat!” Jenari suruh Daud gelah sungkuni anak buahna Abigail gelah jadi diberu Daud.
40 Emaka dahi anak buah Daud me Abigail i Karmel, nina, “Enggo suruh Daud kami ngelegi kam gelah jadi diberuna.”
41 Minter ia sujud, nina, “Nggit aku jadi budak guna nuci nahe+ pelayan-pelayan tuanku.”
42 Kenca si e, tedis Abigail,+ nangkihina keledena. Lit lima kalak pelayanna si diberu erdalan arah pudina. Lawes ia ras anak buah Daud, dungna ia jadi diberu Daud.
43 Daud pe enggo ngempoi Ahinoam+ arah Jesreel nari,+ duana kalak e jadi diberu Daud.+
44 Tapi Mihal eme anak Saul+ si jadi diberu Daud, enggo ibereken Saul man Palti+ anak Lais, si asalna arah Gallim nari.
Cataten i teruh
^ Taneh si mbelang si jarang iingani.
^ Kota si lit i Juda; enda labo Gunung Karmel.
^ Taneh si mbelang si jarang iingani.
^ As. “wari si mehuli enda.”
^ Taneh si mbelang si jarang iingani.
^ Taneh si mbelang si jarang iingani.
^ Taneh si mbelang si jarang iingani.
^ Ntah banci saja “si mbalas Daud.”
^ Ertina “La Terpake; Motu.”
^ As. “la kam rutang dareh.”
^ Ntah “rutang dareh.”
^ Ntah “rutang dareh.”
