1 Samuel 28:1-25
-
Idahi Saul kalak si beluh ngelebuh begu kalak mate i Endor (1-25)
28 Paksa si e, pepulung kalak Pilisti pasukenna guna nyerang Israel.+ Emaka nina Akis man Daud, “Pasti enggo tehndu maka kam ras anak buahndu ikut pagi erperang ras aku.”+
2 Nina Daud man Akis, “Pasti nge tehndu kai pagi si lakoken budakndu enda.” Nina Akis man Daud, “E me sebapna kupilih kam pagi jadi pengawalku, tetap pagi kam jadi pengawalku.”*+
3 Sanga si e, Samuel enggo mate, kerina kalak Israel ngandung jenari ikuburken kalak e ia bas kota asalna i Rama.+ Sope si e, enggo bunuh Saul arah negri e kerina peramal bage pe kalak si beluh ngelebuh begu kalak mate.+
4 Pulung pasuken Pilisti, erkemah kalak e i Sunem.+ Emaka, pepulung Saul kerina pasuken Israel, erkemah kalak e i Gilboa.+
5 Sanga idah Saul perkemahen kalak Pilisti, jantungen kel ia perban biarna.+
6 Amin gia pindo Saul petunjuk arah Jahwe,+ la pernah aloi Jahwe ia, bas nipi pe lang, arah Urim+ pe lang, arah nabi-nabi pe lang.
7 Dungna nina Saul man pelayan-pelayanna, “Darami kena dage sekalak diberu si beluh ngelebuh begu kalak mate+ gelah kupindo petunjuk man bana.” Nina pelayan-pelayanna, “Lit sekalak diberu si beluh ngelebuh begu kalak mate i Endor.”+
8 Emaka nyamar Saul, pakena baju si deban. Bas berngi wari, lawes ia ras dua pelayanna ndahi diberu e. Nina Saul, “Pakelah kengasupenndu guna ngelebuh begu kalak mate janah ramalndu min kai pagi si terjadi.+ Lebuhndulah begu kalak si kukataken pagi gelarna.”
9 Tapi nina diberu e man Saul, “Me enggo tehndu kai si ilakoken Saul, kerina peramal bage pe kalak si beluh ngelebuh begu kalak mate enggo bunuhna arah negri enda nari.+ Engkai maka jebakndu ka tendu aku? Gelah mate tendu aku?”+
10 Emaka ersumpah Saul i lebe-lebe Jahwe, nina, “Ersumpah aku i lebe-lebe Jahwe si nggeluh, labo pagi kam ihukum perban si e.”
11 Emaka nungkun diberu e man Saul, “Ise kin tendu si arus kulebuh?” Nina Saul, “Lebuhlah Samuel.”
12 Sanga idah diberu e “Samuel,”*+ serko ia, nina, “Saul kepeken kam! Engkai maka tipundu aku?”
13 Nina raja man bana, “Ula kam mbiar, kai kin si idahndu?” Nina diberu e man Saul, “Kuidah sekalak si bagi dibata ndarat arah taneh nari.”
14 Minter nina Saul man bana, “Uga ia kalakna?” Nina diberu e, “Si ndarat e sekalak dilaki si enggo metua, pakena jubah si bagi rompi.”+ Minter tandai Saul maka e “Samuel,” janah sujud ia.
15 Kenca si e, nina “Samuel” man Saul, “Engkai maka lebuhndu aku? Terganggu aku.” Nina Saul, “Mberat kel sangana masalahku. Serang kalak Pilisti aku, Dibata pe enggo tadingkenNa aku, lanai aloiNa aku, arah nabi-nabi pe lang, bas nipi pe lang.+ E me sebapna kulebuh kam gelah kuteh kai si arus kulakoken.”+
16 Nina “Samuel” ka, “Adi Jahwe pe enggo tadingkenNa kam janah Ia enggo jadi musuhndu,+ engkai ka maka pindondu petunjuk man bangku?
17 Pasti lakoken Jahwe kai si enggo katakenNa arah aku: Rigatken Jahwe pagi kerajanndu arah tanndu nari, berekenNa pagi e man kalak si deban eme man Daud.+
18 Perban la patuhindu perentah Jahwe janah la bunuhndu kalak Amalek si enggo erban merawa kel Dibata,+ e me sebapna maka ban Jahwe si bagenda man bandu bas wari enda.
19 Serahken Jahwe ka pagi kam ras Israel ku tan kalak Pilisti.+ Pagi, kam+ ras anak-anakndu si dilaki+ lit ras aku.* Serahken Jahwe ka pagi pasuken Israel ku tan kalak Pilisti.”+
20 Minter mbulak Saul ku taneh, seh kel ia biarna perban kata-kata “Samuel” e. Sitik pe lanai lit gegehna, perban enggo sada wari sada berngi dekahna kai pe la lit panna.
21 Sanga dahi diberu e Saul, idahna Saul lanai tenang, nina diberu e, “Enggo lakoken budakndu enda kai si katakenndu, enggo kupertaruhken kesahku.+ Enggo kulakoken kai si suruhndu.
22 Emaka, begikenndu min kata-kata budakndu enda. Gelah kusikapken man bandu sada potong roti. Panndulah roti e gelah lit gegehndu mulih.”
23 Tapi la ia nggit, nina, “La aku pet man.” Tapi lalap tami-tami pelayan-pelayanna ia bage pe diberu e. Dungna, begiken Saul kalak e, tedis ia janah kundul ia bas ingan medem.
24 Diberu e lit sada anak lembuna si mbur, minter gelehna.* Buatna ka tepung, banna jadi adonen, panggangna jadi roti si la itama ragi.
25 Hidangkenna si e man Saul bage pe pelayan-pelayanna, jenari mis kalak e man. Kenca si e, mulih kalak e bas berngi e.+
Cataten i teruh
^ As. “jadi si njaga takalku tiap wari.”
^ Ntah “mahluk roh si nyamar jadi Samuel.”
^ Maksudna, kalak e mate bagi Samuel.
^ Ntah “persembahkenna.”
