1 Samuel 29:1-11
-
Kalak Pilisti la tek man Daud (1-11)
29 Pulung kerina pasuken Pilisti+ i Apek, kalak Israel erkemah i deher Mata Lau Jesreel.+
2 Penguasa-penguasa Pilisti maju erperang ras kelompok-kelompok pasukenna, lit si seratus kalak, lit ka si seribu kalak. Daud ras anak buahna pe ikut arah pudi ras Akis.+
3 Tapi nina pejabat-pejabat kalak Pilisti e, “Engkai maka ikut ka kalak Heber enda?” Nina Akis, “Enda Daud, pelayan Raja Saul arah Israel nari. Kenca tadingkenna Raja Saul, enggo lit setahun lebih dekahna ia ras aku,+ labo lit kudat kesalahenna mulai ia reh man bangku seh ngasa gundari.”
4 Tapi merawa pejabat-pejabat Pilisti man Akis, ning kalak e, “Suruh saja ia mulih+ ku ingan si enggo berekenndu man bana. Ula bere ia ikut erperang ras kita, gelah ula kita si serangna bas peperangen.+ La kin munuh pasukenta cara si mehulina man bana guna muat ukur tuanna?
5 La kin enda Daud si imaksud kalak ah sanga landek janah rende kerna ia, nina,
‘Bunuh Saul ribun kalak,Bunuh Daud puluhen ribu kalak’?”+
6 Emaka lebuh Akis+ me Daud, nina, “Ersumpah aku i lebe-lebe Jahwe si nggeluh, kam kalak si bujur kap, meriah ukurku adi ikut kam erperang ras pasukenku,+ sebap la lit kudat salahndu mulai kita ras seh ngasa gundari.+ Tapi penguasa si deban la tek man bandu.+
7 Emaka mulihlah kam alu dame, ula lakoken kai pe si erban merawa penguasa-penguasa Pilisti.”
8 Nina Daud, “Engkai? Kai kin si kulakoken? Mulai aku ras kam seh ngasa gundari, lit kin datndu salah budakndu enda? Engkai maka aku la banci ikut erperang ras kam ngelawan musuh-musuh Tuanku Raja?”
9 Nina Akis, “Menurutku, kam bali ulina ras malekat Dibata.+ Tapi enggo kataken pejabat-pejabat Pilisti, ‘Ula bere ia ikut erperang ras kita.’
10 Emaka pagi, lampas kam medak radu ras kalak si ikut ras kam, jenari lawes kena sanga wari enggo terang.”
11 Emaka lampas Daud medak ras anak buahna, mulih kalak e ku daerah kalak Pilisti. Kalak Pilisti pe lawes ku Jesreel.+
