1 Samuel 3:1-21
-
Samuel ijadiken nabi (1-21)
3 Sanga Samuel si kitik denga ngelayani+ Jahwe bas pengawasen Eli, jarang kel Jahwe langsung ngerana ntah pe mereken pengenehenen.*+
2 Bas sada wari, Eli si lanai jelas pengidahna janah lanai banci ngenen,+ sangana medem bas kamarna.
3 Lampu Dibata+ nggeluh denga, janah Samuel sangana medem i rumah pertoton*+ Jahwe, ingan Peti Perjanjin* Dibata.
4 Lebuh Jahwe me Samuel, ngaloi Samuel, “Enda aku.”
5 Jenari kiam Samuel ndahi Eli, nina, “Enda aku, Pak. Lebuhndu ndai aku?” Tapi nina Eli, “La lit kam kulebuh. Pedemken mulihi.” Emaka mulihken Samuel medem.
6 Lebuh Jahwe ka mulihi, “Samuel!” Minter Samuel medak, kiam ia ndahi Eli, nina, “Enda aku, Pak. Lebuhndu ndai aku?” Tapi nina Eli, “La lit kam kulebuh, Nakku. Pedemkenlah mulihi.”
7 (Samuel lenga nandai Jahwe, janah lenga pernah langsung begina berita arah Jahwe.)+
8 Erlebuh ka Jahwe petelu kaliken, “Samuel!” Mis Samuel medak, kiam ia ndahi Eli, nina, “Enda aku, Pak. Lebuhndu ndai aku?”
Sadar Eli maka Jahwe si ngelebuh anak e.
9 Emaka kataken Eli man Samuel, “Pedemkenlah mulihi. Adi lebuhNa ka kari kam, bagenda nindu, ‘Ngeranalah Kam Jahwe, budakNdu enda sangana megiken Kam.’” Jenari lawes Samuel, medem ka ia.
10 Reh Jahwe janah tedis i je, erlebuh ka Ia bagi si ndai, nina, “Samuel, Samuel!” Ngaloi Samuel, “Ngeranalah Kam, budakNdu enda sangana megiken Kam.”
11 Nina Jahwe man Samuel, “Lit teKu si Kulakoken bas Israel, si erban sengget pagi kerina kalak si megisa.+
12 Bas wari e pagi, Kulakoken kerina si enggo Kukataken kerna Eli ras keluargana, mulai tangtangna nari seh ku pendungina.+
13 Arus katakenndu man bana maka Kuhukum pagi keluargana seh rasa lalap, perban dosa si enggo tehna+ eme kerna anak-anakna si enggo numpahi Dibata,+ tapi la rawaina.+
14 E me sebapna Kusumpahi keluarga Eli. La lit korban ntah persembahen si banci ngampuni dosa keluarga kalak e.”+
15 Medem Samuel ngasa erpagi-pagi. Kenca si e, bukana kerina pintu rumah Jahwe. Mbiar Samuel nceritaken man Eli kerna kai si enggo idahna.
16 Lebuh Eli me Samuel, nina, “O Samuel!” Ngaloi Samuel, “Kai ndai, Pak?”
17 Sungkuni Eli ia, “Kai nina Dibata bandu? Ula buniken kai pe arah aku nari. Sada kata saja pe bunikenndu, mberat pagi hukumenndu ban Dibata.”
18 Emaka ceritaken Samuel kerina man bana, la lit kai pe si bunikenna arah ia nari. Nina Eli, “E kap peraten Jahwe. Pediatlah lakokenNa kai si mehuli kapNa.”
19 Samuel terus reh galangna. Jahwe+ tetap ras ia janah kerina si kataken Samuel terjadi.
20 Emaka kerina kalak Israel mulai arah Dan nari seh ku Berseba meteh maka Samuel enggo tuhu-tuhu ipilih Jahwe jadi nabiNa.
21 Rusur Jahwe ncidahken diriNa i Silo, i je ban Jahwe gelah reh jelasna tandai Samuel Ia arah kata-kata Jahwe.+
Cataten i teruh
^ Eme kerna kai pe si cidahken Dibata ku bas pikiren sekalak jelma.
^ Maksudna, kemah ingan ersembah.
^ Ntah “Peti Perpadanen.”
