1 Samuel 30:1-31
30 Bas wari si peteluken, seh Daud ras anak buahna i Siklak.+ Enggo jarah kalak Amalek+ daerah i selatan,* enggo ka serangna ras tutungna daerah Siklak.
2 Kerina diberu ras kerina kalak si tading i je, mulai si nguda nari seh ku si metua enggo itaban.+ Kerinana babana, tapi la lit sekalak pe bunuhna.
3 Sanga seh Daud ras anak buahna i kota e, idahna kota e enggo meseng, kerina diberu kalak e bage pe anakna si dilaki ras si diberu enggo ibaba kalak ndai.
4 Emaka ngandung Daud ras anak buahna, la erngadi-ngadi kalak e ngandung seh asa lanai lit gegehna ngandung.
5 Duana diberu Daud pe ikut baba kalak e, eme Ahinoam kalak Jesreel, bage pe Abigail kalak Karmel, si mbarenda diberu Nabal.+
6 Latih kel ukur Daud perban kataken anak buahna maka benteri kalak e tena Daud alu batu. Merawa kel kalak e kerina sebap enggo bene anak-anakna si dilaki ras si diberu. Tapi pindo Daud gegeh man Jahwe Dibatana.+
7 Kenca si e, kataken Daud man Imam Abiatar+ anak Ahimelek, “Babalah epod* ena ku jenda.”+ Emaka baba Abiatar epod e man Daud.
8 Nungkun Daud man Jahwe,+ “Arus kin kuayaki perampok-perampok ah? Terayaki denga kin?” Nina Dibata, “Laweslah, ayakilah. Pasti nge terayakindu kalak e, janah mulihi pagi datndu kerina.”+
9 Mis lawes Daud radu ras 600 anak buahna.+ Lawes kalak e seh ku Lau* Besor, janah piga-piga anak buahna tading i je.
10 Terusken Daud perdalanenna ras 400 anak buahna, tapi 200 kalak nari enggo latihsa kapna emaka la ikut kalak e nyebrang Lau* Besor.+
11 Bas perdalanen, jumpa kalak e ras sekalak dilaki arah Mesir nari, baba kalak e ia ku Daud. Bere kalak e ia man ras minem.
12 Bereken kalak e ka sada potong roti ara si enggo ikerahken bage pe dua kue kismis. Kenca panna, mulihi ia megegeh sebap enggo telu wari telu berngi la lit kai pe panna ras inemna.
13 Kenca si e, sungkun Daud ia, “Ise tuanndu, ja nari asalndu?” Nina, “Aku kalak Mesir, tuanku kalak Amalek. Telu wari si lewat tadingken tuanku aku perban aku sakit.
14 Jarah kami daerah selatan* kalak Kereti,+ daerah kalak Juda, bage pe daerah selatan* Kalep.+ Tutung kami ka Siklak.”
15 Nina Daud, “Nggit nge kam naruhken kami ku perampok-perampok ah?” Nina, “Kutaruhken pagi kam ku perampok-perampok ah, tapi ersumpah kam lebe bas gelar Dibata maka labo pagi bunuhndu aku ntah pe serahkenndu aku man tuanku.”
16 Emaka taruhkenna Daud ku ingan perampok-perampok ndai. Perampok-perampok e merap kerina, kalak e sangana man, minem, ras erpesta, perban melala kel hasil jarahen si dat kalak e arah negri Pilisti bage pe negri Juda.
17 Lenga pe terang wari, enggo serang Daud kalak e janah terus serangna seh ngasa berngi. La lit sekalak pe si selamat+ selain 400 kalak si kiam nangkih unta.
18 Buat Daud mulihi kerina si enggo jarah kalak Amalek,+ selamatkenna ka duana diberuna.
19 La lit sada pe si bene, mulai arah si kitikna nari seh ngasa si galangna. Dat kalak e mulihi anak-anakna si dilaki ras si diberu, bage pe kerina barang-barangna si enggo ijarah.+ Dat Daud mulihi kerina si enggo ijarah.
20 Buat Daud kerina kambing, biri-biri, ras lembu kalak Amalek. Tama anak buah Daud binatang jarahen e i lebe-lebe kambing, biri-biri, bage pe lembu kalak e. Jenari arak-arak kalak e kerina, nina kalak e, “Enda kerina hasil jarahen Daud.”
21 Kenca si e, dahi Daud 200 kalak si tadingkenna i deher Lau* Besor,+ sebap lanai kalak e ngasup perban enggo latihsa. Ndarat kalak e njumpai Daud bage pe kalak si lit ras Daud. Sanga Daud seh i deher kalak e, sungkunna uga keadan kalak e.
22 Tapi kalak si jahat ras si la terpake si ikut ras Daud ngataken, “Perban la kalak e ikut ras kita, ula bereken man kalak e hasil jarahen si enggo sidat mulihi. Anak ras diberuna ngenca si banci buatna. Jenari banci kalak e lawes.”
23 Tapi nina Daud, “O senina-seninaku, ula min bage perbahanen kena man kai si enggo bereken Jahwe man banta, sebap Ia kap si enggo ngelindungi kita janah serahkenNa perampok-perampok si nyerang kita ku tanta.+
24 Adi bagena ning kena ngerana, labo lit si megikenca. Seri nge bagin kalak si ikut erperang ras kalak si njaga barang.+ Kerinana nge dat bagin.”+
25 Emaka mulai bas wari e, ban Daud si e jadi peraturen ras undang-undang bas Israel.
26 Sanga mulih Daud ku Siklak, kirimkenna deba hasil rampasen e man peminpin-peminpin Juda si jadi teman-temanna. Nina Daud, “Enda hadiah man kena. Enda hasil jarahen si ibuat arah musuh-musuh Jahwe.”
27 Kirimkenna hadiah man kalak si lit i Betel,+ si lit i Ramot sebelah selatan,* si lit i Jattir,+
28 si lit i Aroer, si lit i Sipmot, si lit i Estemoa,+
29 si lit i Rakal, si lit i kota-kota kalak Jerahmeel,+ si lit i kota-kota kalak Keni,+
30 si lit i Horma,+ si lit i Borasan, si lit i Atak,
31 si lit i Hebron,+ bage pe ku kerina daerah si pernah dahi Daud ras anak buahna.
